Read Mizo_Old_version Leviticus 20 Bible Online

Leviticus 20 - Mizo_Old_version bible

Leviticus 20

¹Tin, LALPAN Mosia a bia a,

²“Israela thlahte hnênah chuan, ‘Israela thlahte zînga mi emaw, Israel rama khawsa ram dang mi emaw, an rîla rah Moleka pe apiangte chu tihhlum ngei tûr a ni a; hemi rama mite hian lungin an dêng tûr a ni.

³Tin, kei pawhin, ka hmun thianghlim tibawlhhlawh tûr leh, ka hming thianghlim tibawrhbâng tûra a rîla rah Moleka a pêk avângin, chu mi chungah chuan ka hmai ka thuar ang a, a chipuite zîng ata ka tiboral ang.

⁴Tin, hemi rama mite hian a rîla rah Moleka a pêk an hai dera an tihhlum loh chuan,

⁵amah leh a chhûngte chungah chuan ka hmai ka thuar ang a, Moleka laka uire tûra mi uiresan apiangte nên an chipuite zîng ata ka tiboral ang.

⁶Tin, an laka uire tûra ramhuai aienthiam zâwlte leh dawithiamte pantu chungah chuan ka hmai ka thuar ang a, a chipuite zîng ata ka tiboral ang.

⁷Intithianghlim ula, thianghlimin awm rawh u: kei hi LALPA in Pathian chu ka ni si a.

⁸Ka thupêkte chu in pawmin in zâwm tûr a ni; kei hi LALPA, a tithianghlimtu che u ka ni.

⁹“ ‘A nu emaw, a pa emaw ânchhe lawh apiang chu tihhlum ngei tûr a ni. A nu emaw, a pa emaw ânchhe lawh a ni a, a chungah a thisen mawh chu a awm tûr a ni.

¹⁰Mi nupui uiretu, a ṭhenawm nupui uiretu chu, a uirepa leh a uirenu chu tihhlum ngei tûr a ni.

¹¹Tin, pate nupui mutpui chu, a pa saruakna hlîm a ni a; tihhlum ve ve ngei tûr an ni a, an thisen mawh chu an chungah a awm tûr a ni.

¹²Miin a monu a mutpui chuan tihhlum ve ve ngei tûr an ni ang; suahsualna chungchuang ti an ni a, an thisen mawh chu an chungah a awm tûr a ni.

¹³Miin hmeichhia a mutpui anga mipa a mutpui chuan thil tenawm tak an ti ve ve a ni a, tihhlum ngei tûr an ni; an thisen mawh chu an chungah a awm tûr a ni.

¹⁴Miin nufa faa nupuia a neih chuan suahsualna nasa tak a ni a, in zînga suahsualna a awm loh nân amah leh anni pahnih pawh hâl hlum tûr an ni.

¹⁵Miin ran a mutpui chuan tihhlum ngei tûr a ni a, ran pawh chu in tihlum tûr a ni.

¹⁶Tin, hmeichhiain ran a va hnaiha, a inpâwltîr chuan hmeichhia chu i tihlum tûr a ni, ran pawh chu. Tihhlum ngei tûr an ni a; an thisen mawh chu an chungah a awm tûr a ni.

¹⁷“ ‘Miin a farnu, a pa fanu emaw, a nu fanu emaw a neiha, a saruakna a hmuha, ani pawhin a saruakna a hmuh chuan thil zahthlâk tak a ni a, an chipuite thlahho mit hmuhah tihboral tûr an ni; a farnu saruakna hlîm a ni a, a khawlohna mawh a phur ang.

¹⁸Tin, miin hmeichhia a fel loh laia a mutpuia, a saruakna a hlîm chuan a thi chhuahna hlîm a ni a; an chipuite zîng ata tihboral ve ve tûr an ni.

¹⁹Chutichuan, i nu laizâwn emaw, i pa farnu emaw saruakna i hlîm tûr a ni lo; a laichîn hnai saruaka siam a ni a; an khawlohna mawh an phur ang.

²⁰Miin a pami nupui a mutpui chuan a pami saruakna hlîm a ni a; an sual mawh an phur ang a, fanau lovin an thi ang.

²¹Miin a unaupa nupui a neih chuan thil bawlhhlawh a ni a; a unaupa saruakna hlîm a ni a; fanau lovin an awm ang.

²²“ ‘Chutichuan, ka thupêk zawng zawng te, ka rorêl zawng zawngte in pawm ang a, in zâwm tûr a ni; tichuan, awm tûra ka hruaina che u ram chuan a luak chhuak dâwn lo che u nia.

²³In hmaa ka hnawh chhuah tâk hnam dânte chu in zawh tûr a ni lo; hêng thil zawng zawng hi an ti ṭhîn a, chu vâng chuan ka ten a ni.

²⁴Amaherawhchu, nangni hnênah chuan, “An ram, hnutetui leh khawizu luanna ram chu in luah ang a, in luah atân ka pe ang che u,” ka lo ti tawh a ni. Kei hi LALPA in Pathian, hnam dangte laka tihrangtu che u hi ka ni.

²⁵Chuvângin, sa thiang leh thiang lo leh sava thiang leh thiang lo in thlei hrang ang a; sa emaw, sava emaw, leia a bawha bawkvâk chi rêng rêng emaw, in tâna thiang lova ka thlei hrante chuan in nunna in titenawm tûr a ni lo.

²⁶Ka tâna mi thianghlim in ni tûr a ni; kei LALPA hi ka thianghlim si a; ka ta in nihna tûrin hnam dangte lakah ka tihrang che u a ni.

²⁷“ ‘Mipa pawh hmeichhia pawh, ramhuai aienthiam zâwl emaw, dawithiam emaw chu tihhlum ngei tûr a ni; lungin an dêng tûr a ni; an thisen mawh chu an chungah a awm tûr a ni,’ ti leh bawk rawh,” tiin.