Read Mizo_Old_version Leviticus 21 Bible Online

Leviticus 21 - Mizo_Old_version bible

Leviticus 21

¹Tin, LALPAN Mosia hnênah, “Arona fapa, puithiamte chu bia la, an hnênah, ‘An chipuite zînga mitthi avângin tu mah an intibawlhhlawh tûr a ni lo;

²an chhûng bul - an nu te, an pa te, an fapa te, an fanu te, an unau te,

³an farnu, an la awmpui, nula, pasal la nei lo te avâng chuan an intibawlhhlawh thei ang.

⁴An chipuite zînga a puipa ber an nih avângin an intibawlhhlawhin an intibawrhbâng tûr a ni lo.

⁵“ ‘An lu an mêt kawlh tûr a ni lo va, an khabe hmul sîr tuak an tan tûr a ni bawk lo va, an taksa an zai tûr a ni hek lo.

⁶An Pathian tân mi thianghlim an ni tûr a ni a, an Pathian hming an tihliau tûr a ni lo; LALPA tâna meia thilhlan te, an Pathian tâna ei tûr chhiahte an hlân ṭhîn a ni a; chuvângin, an thianghlim tûr a ni.

⁷Hmeichhia, nawhchizuar emaw, hminghliau emaw, a pasal mâk hnu emaw an nei tûr a ni lo; an Pathian tân mi thianghlim an ni si a.

⁸Chuvângin, i tithianghlim tûr a ni; i Pathian tâna ei tûr chhiah chu an hlân ṭhîn si a. I tân mi thianghlim an ni tûr a ni; kei LALPA, a tithianghlimtu che u hi ka thianghlim si a.

⁹Puithiam tu pawh a fanu nawhchizuara a intihbawrhbân chuan a pa tibawrhbâng a ni a, hâl tûr a ni.

¹⁰“ ‘A unaute zînga puithiam lalber, a lû hriak thih mia thih tawh, silhfên bel tûra tihhran tawh chuan a sam a thlah tûr a ni lo va, a puante a pawt thlêr tûr a ni lo va;

¹¹mitthi ruang awmnaah a lût tûr a ni lo va, a nu emaw, a pa emaw avângin a intibawrhbâng tûr a ni hek lo;

¹²hmun thianghlim ata chu a chhuak tûr a ni lo va, a Pathian hmun thianghlim a tibawrhbâng tûr a ni bawk hek lo; a Pathian hriak thih mia tihhranna chu a chungah a awm si a: kei hi LALPA chu ka ni.

¹³Nupuiah chuan nula thianghlim a nei tûr a ni.

¹⁴Hmeithai emaw, mâk hnu emaw, hmeichhe hminghliau emaw, nawhchizuar emaw chu a nei tûr a ni lo va; ama chipui, nula thianghlim nupuiah a nei tûr a ni.

¹⁵Tin, a chipuite zîngah a thlahte chu a tibawrhbâng tûr a ni lo. Kei hi LALPA, a tithianghlimtu chu ka ni si a,’ ti rawh,” a ti a.

¹⁶Tin, LALPAN Mosia a bia a,

¹⁷“Arona hnênah, ‘An chhuante zêl thlenga i thlahte zînga chiangkuan lohna nei apiang chuan, a Pathian ei tûr chhiah hlân tûrin rawn hnaih suh se.

¹⁸Tu pawh chiangkuan lohna nei apiang chuan an rawn hnaih hauh tûr a ni lo: mitdel te, kebai te, hnârpêr te, fuke sei lutuk apiang te,

¹⁹ke tliak te, kut tliak te,

²⁰êlkun te, mi tawngchham te, mit chiangkuang lo te, mi buar te, mi phuhlip te, tilmu keh te chuan.

²¹Puithiam Arona thlah chiangkuan lohna nei rêng rêng chuan LALPA tâna meia thilhlan hlân tûrin an rawn hnaih tûr a ni lo. Chiangkuan lohna nei an ni a; an Pathian ei tûr chhiah hlân tûrin an rawn hnaih hauh tûr a ni lo.

²²An Pathian ei tûr chhiah, a thianghlim leh a thianghlim ber pawh chu an ei thei ve ve ang.

²³Amaherawhchu, chiangkuan lohna nei an nih avângin puanzâr chhûngah emaw, maichâm kiang hnaiah emaw zawng an kal thei lo vang, ka hmun thianghlimte an tibawrhbâng dah ang e. Kei hi LALPA, anmahni tithianghlimtu chu ka ni si a,’ ti rawh,” tiin.

²⁴Chutiang chuan Mosia chuan Arona leh a fapate leh Israela thlahte zawng zawng hnênah a sawi a.