Read Mizo_Old_version Leviticus 22 Bible Online

Leviticus 22 - Mizo_Old_version bible

Leviticus 22

¹Tin, LALPAN Mosia a bia a,

²“Arona leh a fapate hnênah sawi la, Israela thlahte thil thianghlim, ka tâna an hlan lakahte chuan inthiarfihlîm rawh se, ka hming an tihliau dah ang e. Kei hi LALPA chu ka ni a.

³An hnênah, ‘In chhuante zêl thlenga in thlahte zawng zawng zînga mi, tu pawh bawlhhlawh chunga Israela thlahten LALPA tâna an hlan thil thianghlim rawn hnaih apiang chu, ka lak ata tuithlârin a awm tûr a ni. Kei hi LALPA chu ka ni.

⁴“ ‘Arona thlah tu pawh phâr emaw, thil pût emaw chuan, a thianghlim hma loh chuan thilhlan thianghlimte zinga mi chu a ei tûr a ni lo. Tin, tu pawh, mitthi tihbawlhhlawh emaw, chi chhuaka emaw khawih apiang te,

⁵tu pawh amah tibawlhhlawh thei, a bawha bawkvâk rêng rêng emaw, bawlhhlawh kai theih nei mi emaw khawih apiangte;

⁶chutiang khawihtu chu tlai lam thlengin a bawlhhlawh ang a; tin, a inbual loh chuan thilhlan thianghlimte zînga mi chu a ei tûr a ni lo.

⁷Tin, ni a tlâk chuan a thianghlim tawh ang; chumi hnuah chuan thilhlan thianghlimte zînga mi chu a ei thei tawh ang, a ei tûr a nih avângin.

⁸Intibawlhhlawh tûrin amaha thi emaw, sa seh emaw a ei tûr a ni lo. Kei hi LALPA chu ka ni.

⁹Chuvângin, ka thupêk chu a pawm tûr a ni; chuti lo zawng, an tihbawrhbân chuan a sual mawh an phur ang a, an thih phah ang. Kei hi LALPA, anmahni tithianghlimtu ka ni si a.

¹⁰“ ‘Ram dang miin thilhlan thianghlim chu an ei tûr a ni lo; puithiam hnêna khawsa emaw, inhlawhfa emaw chuan thilhlan thianghlim chu an ei tûr a ni lo.

¹¹Amaherawhchu, puithiamin tu emaw ama suma a lei chuan, chu mi chuan a ei thei ang; tin, a ina piangte chuan a ei tûr chu an ei ve ang.

¹²Puithiam fanuin ram dang mi a neih chuan thên thilhlan, thilhlan thianghlimte zînga mi chu a ei tûr a ni lo.

¹³Amaherawhchu, puithiam fanu chu fa nei lovin hmeithaiin emaw, mâkin emaw a awma, a pa in lama a kîr leh chuan a nulât lai ang bawk khân a pa ei tûr chu a ei ve leh ang; nimahsela, ram dang mi chuan an ei tûr a ni lo.

¹⁴Miin hre lova thilhlan thianghlim chu a ei chuan a hmun ngaa ṭhena hmun khat chu a dah belh ang a, thilhlan thianghlim chu puithiam a pe tûr a ni.

¹⁵An thilhlan thianghlimte ei chuan thiam lohna thlensaktu, khawlohna mawh chu inphurhtîr tûrin Israela thlahte thilhlan thianghlim, LALPA hnêna an hlante chu an tibawrhbâng tûr a ni lo. Kei hi LALPA, anmahni tithianghlimtu chu ka ni si a,’ ti rawh,” tiin.

¹⁷Tin, LALPAN Mosia a bia a,

¹⁸“Arona leh a fapate leh Israela thlahte zawng zawng bia la, an hnênah, ‘Israel chhûngkaw zînga mi emaw, Israel-te zînga awm, ram dang mi emaw, tu pawh an thilhlan, hâlral thilhlana LALPA hnêna an hlan, an thutiamna emaw, mahni duh thua thilhlan emaw hlân apiangte chuan,

¹⁹chhân tlâk in nih theihna tûrin bâwng emaw, berâm emaw, kêl emaw, a pa sawisêl bo in hlân tûr a ni.

²⁰Sawisêl kai rêng rêng chu in hlân tûr a ni lo; pawmsak tlâk che u a ni dâwn si lo va.

²¹Tu pawh thutiam tikimchang tûrin emaw, mahni duh thua thilhlanah emaw remna thilhlan inthawina, a ran rual zînga mi emaw, a berâm rual zînga mi emaw LALPA hnêna hlân apiang chuan, pawm tlâk a nih theih nân sawisêl bo a hlân tûr a ni a; sawisêl kaina rêng rêng a awm tûr a ni lo.

²²A mitdel te, a ruh tliak te, a silawng te, pân nei te, a tangseh te, a phâr te chu LALPA hnênah in hlân tûr a ni lo va, meia thilhlanah LALPA hnênah maichâmah in hlân tûr a ni hek lo.

²³Mahni duh thua thilhlanah chuan bâwngpa emaw, berâmno emaw fuke sei lua emaw, tawi lua emaw pawh in hlân thei ang a; thutiam nân erawh chuan pawmsak a ni lo vang.

²⁴A tilmu chhut duk emaw, chhut perh emaw, chhut keh emaw, lâk emaw chu LALPA hnênah in hlân tûr a ni lo va, in ramah hian chutiang chu inthawi nân in hmang tûr a ni hek lo.

²⁵Ram dang mi aṭanga lain chûng zînga mi rêng rêng chu in Pathian ei tûr chhiahah in hlân tûr a ni lo, chûnga chhiatna leh sawisêl kaina a awm avâng chuan; pawmsak theih che u a ni lo vang,’ ti rawh,” tiin.

²⁶Tin, LALPAN Mosia a bia a,

²⁷“Bâwngpa emaw, berâm emaw, kêl emaw, a lo pianin a pui hnênah ni sarih a awm tûr a ni; ni riat ni aṭanga chumi hnu lamah chuan LALPA tâna meia thilhlanah pawm theih a ni ang.

²⁸Bâwngpui emaw, berâmpui emaw, a no nên ni khatah in talh tûr a ni lo.

²⁹Tin, lâwm thu sawi inthawia LALPA hnêna in inthawi hunin, chhân tlâk in nih theihna tûrin in inthawi tûr a ni.

³⁰Chumi ni chuan ei zawh tûr a ni a; a tûk thlengin eng mah in khêk tûr a ni lo. Kei hi LALPA chu ka ni.

³¹Chuvângin, ka thupêkte hi in pawmin in zâwm tûr a ni. Kei hi LALPA chu ka ni.

³²Tin, ka hming thianghlim hi in tihliau tûr a ni lo va, Israela thlahte zîngah chawimawiin ka awm tûr a ni. Kei hi nangmahni chawimawitu,

³³in Pathian ni tûra Aigupta ram ata hruai chhuaktu che u ka ni. Kei hi LALPA chu ka ni,” tiin.