Read Mizo_Old_version Leviticus 24 Bible Online

Leviticus 24 - Mizo_Old_version bible

Leviticus 24

¹Pathianin Mosia a bia a,

²“Israela thlahte chu olive hriak fîm tak, chhit tûra sâwr, khâwnvâr tihalh reng nân i hnêna rawn la tûrin thu pe rawh.

³Inbiakna puan ina thuhriattîrna puanzâr pâwn lamah chuan, tlai lam aṭanga zîng lam thleng atân LALPA hmaah Aronan dah fel rawh se; hei hi in thlahte zêl thlenga kumkhaw dân tûr a ni.

⁴LALPA hmaah khâwnvâr dahna thianghlim tak chungah chuan khâwnvârte chu dah fel ṭhîn rawh se.

⁵“Tin, chhangphut dip mi la la, chu chu chhang sâwm leh pahnihah i âwm tûr a ni; chhang pakhatah chuan epha hmun sâwma ṭhena hmun hnih hman tûr a ni.

⁶LALPA hmaah rangkachak hlang dawhkân chungah tlar hnihin, tlar khata paruk ve vein i tiang tûr a ni.

⁷Chhang chungah, a tlar hnihah chuan beraw fîm tak i dah tûr a ni, hriat rengna, LALPA tâna meia thilhlan ang a nih theih nân.

⁸Chawlhni apiangin LALPA hmaah a dah fel ṭhîn tûr a ni; kumkhaw thuthlunna, Israela thlahte tân a ni.

⁹Tin, Arona leh a fapate pual a ni ang a, hmun thianghlimah an ei tûr a ni; kumkhaw dâna LALPA tâna meia thilhlante zînga mi, a tâna thil thianghlim tak a ni,” tiin.

¹⁰Israel hmeichhe fapa, a pa Aigupta mi, mi pakhat chu Israela thlahte zîngah a va kal a; chu Israel hmeichhe fapa leh Israel mi, mi pakhat chu riahhmunah an insual a.

¹¹Israel hmeichhe fapa chuan ânchhe lawhin Pathian hming a sawichhia a; tichuan, Mosia hnênah an rawn hruai a. A nu hming chu Selomithi a ni a, Dan chi Dibria fanu a ni.

¹²LALPA kâ aṭanga thuchhuak nghah nân tân inah an khung a.

¹³Tin, LALPAN Mosia a bia a,

¹⁴“Anchhe lawhtu chu daipâwnah hruai ula; a hretu zawng zawng chuan a luah an kut nghat sela, mi zawng zawng chuan lungin dêng rawh se.

¹⁵Tin, Israela thlahte chu bia la, an hnênah, ‘Tu pawh a Pathian ânchhia lawh apiang chuan a sual mawh a phur ang a.

¹⁶Tin, LALPA hming sawichhia apiang chu tihhlum ngei tûr a ni. Mi zawng zawngin lungin an dêng ngei ngei tûr a ni; LALPA hming an sawichhiat chuan ram dang mi pawh, he rama mi rêng pawh tihhlum tûr a ni.

¹⁷Thi khawpa mi chunga kut thlâk apiang chu tihhlum ngei tûr a ni.

¹⁸Thi khawpa ran chunga kut thlâk apiang chuan a rûl tûr a ni: nun aiah nun.

¹⁹Tin, miin a ṭhenawm a tihhmêlhem chuan a tih ang tak chuan a chungah tih ve tûr a ni:

²⁰ruh tliak aiah ruh tliak, mit aiah mit, ha aiah ha; mi a tihhmêlhem angin a chungah pawh tih ve tûr a ni.

²¹Ran tihlum apiang chuan a rûl tûr a ni a; mi tihlum apiang chu tihhlum ve tûr a ni.

²²Ram dang mite tân leh he rama mi rêngte tân dân hmun khat in nei tûr a ni. Kei hi LALPA in Pathian ka nih hi,’ i ti tûr a ni,” tiin.

²³Tichuan, Mosia chuan Israela thlahte chu a bia a, ânchhe lawhtu chu daipâwnah an hruai chhuak a, lungin an dêng a. Israela thlahte chuan LALPAN Mosia thu a pêk ang chuan an ti ta a.