Read Mizo_Old_version Leviticus 25 Bible Online

Leviticus 25 - Mizo_Old_version bible

Leviticus 25

¹Tin, LALPAN Sinai tlângah Mosia a bia a,

²“Israela thlahte bia la, an hnênah, ‘Ram ka pêk che u in va thlen hun chuan, ram chu LALPA hmingin a châwl tûr a ni.

³I lovah kum ruk chhûng chu thil i chîng ang a, i grêp huan chu kum ruk chhûng i sât no vang a, a hâwngte i seng ang a;

⁴a kum sarih kum erawh chu ram chawlh dêrna, LALPA hminga chawlhna a ni ang a; i lovah buhbâl i chîng tûr a ni lo va, i grêp huan i sât no tûr a ni hek lo.

⁵I buhhli chu i seng tûr a ni lo va, i enkawl loh grêp chu i lo tûr a ni lo; ram chawlh dêrna kum a ni tûr a ni.

⁶Ram chawlh kuma mi chu in ei chawp atân a ni ang: i tân te, i chhiahhlawh leh i chhiahhlawhnu tân te, i hlawhfa tân te, i hnêna khawsa ram dang mi tân te,

⁷i bâwng rual tân te, i rama ran tân te. Chuta a hâwng zawng zawng chu ei chawp atân a ni ang.

⁸“ ‘Tin, chawlh kum, kum sarih chu i chhiar ang a, kum sarih hmun sarih a ni ang a; chawlh kum, kum sarih chhûng chu kum sawmli leh kum kua a ni ang.

⁹Chumi hnu thla sarihna, ni sâwm ni chuan tawtawrâwt ring tak chu i ham vêltîr ang a; inremna niah chuan in ram zawng zawngah tawtawrâwt in ham vêltîr tûr a ni.

¹⁰Tin, kum sawmngana chu in lâwm ang a, ram chhûng zawng zawngah, chuta awm zawng zawng hnênah zalênna thu in puang tûr a ni. In tân Jubili a ni ang a; mi tinin mahni ta ngai in ta leh ang a, mi tin mahni in chhûngkhûr ṭheuhvah in awm leh ang.

¹¹Chumi kum sawmngana chu in tân Jubili a ni ang a; eng mah in chîng lo vang a, a hli pawh in la lo vang a, grêp enkawl loh rah pawh in lo tûr a ni hek lo.

¹²Jubili a ni si a; in tân a thianghlim tûr a ni; chu in lova thil hâwng chu in ei tûr a ni.

¹³He Jubili kumah hian mi tinin mahni ta ngai in ta leh ṭheuh tûr a ni.

¹⁴I ṭhenawm hnênah eng emaw i hralha, i ṭhenawm laka eng emaw i lei pawhin in inbum tûr a ni lo.

¹⁵Jubili hnua kum zât ang zêlin i ṭhenawm thil i lei ang a, buhbâl hâwn kum tam azirin i hnênah a hralh tûr a ni.

¹⁶A kum tam dân azir zêlin a man chu i tipung ang a, a kum tlêm dân azir zêlin a man chu i tikiam ang; buhbâl hâwn kum tam dân azirin i laka hralh a ni e.

¹⁷In inbum tûr a ni lo va, i Pathian chu i ṭih tûr a ni. Kei hi LALPA in Pathian chu ka ni si a.

¹⁸“ ‘Chuvângin, ka thuruatte chu i zâwmin ka rorêlte chu i pawmin i ṭih tûr a ni; tichuan, chu ramah chuan thlamuang takin in khawsa dâwn nia.

¹⁹Ram chuan a rah a chhuah ang a, hnianghnârin in chên ang a, thlamuang takin in va khawsa dâwn nia.

²⁰A nih leh, “A kum sarih kum chuan eng nge kan ei ang le? Ngai teh, eng mah kan chîng dâwn si lo va, kan thil hâwngte kan seng bawk dâwn si lo va,” in ti a nih chuan,

²¹a kum ruk kum chuan ka malsâwmna in chungah ka thlentîr ang a, kum thum chhûng atân chuan rah a chhuah ang.

²²Tin, a kum riat kum chuan in chîng ang a, thil hâwng in vawn, a hluite chu in ei ang a, a kum kaw kum thlengin; a lo thar leh thleng chuan in vawn, a hluite chu in ei tûr a ni.

²³“ ‘Kumkhua atân ram chu hralh hlen tûr a ni lo, ram chu ka ta a ni si a; mikhual, ka hnêna khawsa mai in ni si a.

²⁴In ram luah zawng zawng chu a neitu hmasain a tlan lêt thei tûr a ni.

²⁵I unau chu lo retheiin, a ram ṭhenkhat lo hralh sela, a laichîn bul berin a unauvin a lo hralh chu a rawn tlan tûr a ni.

²⁶Tin, miin tlansaktu tûr a neih lohva, a lo neihnuna, tlanna khawp a neih chuan,

²⁷a hralh chin kum chu chhût sela, a hralhna pa chu a têl chuanna chu pe kîr rawh se; tichuan, a ram chu a luah leh ang.

²⁸A tâna a tlan lêt leh theih loh erawh chuan, a hralh tâka chu Jubili kum thlengin a leitu kutah chuan awm rawh se; tin, Jubili kum chuan a chhuak leh ang a, ani chuan a ram chu a luah leh ang.

²⁹“ ‘Tin, miin kulh nei khuaa in a hralh chuan, a hralh achin kum khat zên zâwn chhûng chuan a tlan leh thei ang; kum khat pumhlûm chhûng chuan tlan leh theihna a nei ang.

³⁰Kum khat chhûnga a tlan theih loh chuan, kulh nei khuaa in chu kumkhuain, a thlahte zêl thleng pawhin a leitu ta a ni tlat tûr a ni a. Jubili-ah pawh a chhuak chuang lo vang.

³¹Kulh nei lo khuaa inte erawh chu thingtlâng ram anga ngaih a ni ang a. Tlan theih a ni ang a, Jubili-ah a chhuak ang.

³²Amaherawhchu, Levi-hote khua, an chanpuala khuaa inte chu Levi-hote chuan eng lai pawhin an tlan thei ang.

³³Tin, Levi-ho zînga miin a tlan loh chuan hralh tawh in leh a chanpual khua chu Jubili-ah a chhuak ang; Levi-hote khuaa inte chu Israela thlahte zînga an chanpual a ni si a.

³⁴An khaw dai vêla lote erawh chu hralh theih a ni lo vang, an kumkhaw chanpual a ni si a.

³⁵“ ‘I unau a lo retheiha, a rawn belh che chuan i lo chhawmdâwl tûr a ni; mikhual, i hnêna khawsa angin i awmpui tûr a ni.

³⁶A lakah tangka emaw, thil emaw, a pung la suh; Pathian ṭih zâwk rawh, i unau chu i hnêna a khawsak theih nân.

³⁷A pung ûmin i sum i pûktîr tûr a ni lo va, pung ûmin i ei tûrte pûktîr hek suh.

³⁸Kei hi LALPA in Pathian, Kanaan ram pe tûr che u leh in Pathian ni tûra Aigupta ram ata hruai chhuaktu che u ka ni.

³⁹“ ‘Tin, i bula chêng i unau a lo retheiha, i hnêna a rawn tlûk luh chuan bawih angin i chhawr tûr a ni lo.

⁴⁰Inhlawhfa ang leh i hnêna khawsa ve angin i hnênah a awm tûr a ni a, Jubili kum thlengin i rawng a bâwl ang.

⁴¹Chumi zawhah chuan i hnên ata a chhuak ang a, amah leh a fate nên anmahni chhûngkaw ngaiah an lût leh ang. An pi leh pute in leh lo chu an luah leh tûr a ni.

⁴²Aigupta ram ata ka hruai chhuah, ka chhiahhlawhte an ni si a; bawih hralha hralh tûr an ni lo.

⁴³Rura takin a lakah i awm tûr a ni lo va, i Pathian chu i tih tûr a ni zâwk.

⁴⁴Bawihnu leh bawihpaa i neih tûrte chu in vêl hnamte zînga mi, bawihnu leh bawihpa atân chuan in lei tûr a ni.

⁴⁵Tin, in zînga khawsa ram dang mi leh in rama piang an chhûngte zînga mite pawh in lei thei bawk ang; chûng chu in mi in sa an ni ang.

⁴⁶Tin, in hnua in fate rochun atân an mi an saa an neih atân in siam ang a; chûng zînga mite chu kumkhuaa in bawih atân in nei ang. Amaherawhchu, in unau Israela thlahte lakah chuan rura takin in awm tûr a ni lo.

⁴⁷“ ‘Ram dang mi emaw, i hnêna khawsa tu emaw a lo neihnuna, a kianga i unaupa a lo retheiha, i hnêna ram dang mi hnênah emaw, i hnêna khawsa hnênah emaw, ram dang mite thlah chhûng hnênah emaw a tlûk luh chuan,

⁴⁸a tlûk luh hnu pawhin tlan leh theih a ni ang. A unaute zînga miin an tlan thei ang a:

⁴⁹a pamiin emaw, a pami fapain emaw a tlan thei ang a; a chite zinga a laichîn hnaiin a tlan thei bawk ang. Tin, amah pawh a lo neihnun leh chuan a intlan thei ang.

⁵⁰A tlûk luhna pa nên a tlûk luh aṭanga Jubili kum leh tûr chhût dun sela: a tlûk luh man chu a kum azirin a ni ang a; tin, hlawhfaa rawih chhût ang zêla chhûtsak a ni ang.

⁵¹Kum tam tak a la bâk chuan a tlanna man chu a belh chhûng hu tâwk man a pe kîr leh tûr a ni.

⁵²Jubili kum thlenna tûr kum rei lo tê chauh a la awm a nih chuan chhût dûn sela; a awm kum tam zia azirin a tlanna man a pe kîr tûr a ni.

⁵³Kum khat bi zêla rawih inhlawhfa angin a bêl tûr a ni a, i mit hmuhah rura takin a ti tûr a ni lo.

⁵⁴Chûng ang zâwnga tlan a nih loh pawhin, Jubili kum chuan a chhuak ang - amah leh a fate nên.

⁵⁵Israela thlahte chu keima chhiahhlawhte an ni si a; Aigupta ram ata ka hruai chhuah, ka chhiahhlawhte an ni: kei hi LALPA in Pathian chu ka ni.