Read Mizo_Old_version Leviticus 26 Bible Online

Leviticus 26 - Mizo_Old_version bible

Leviticus 26

¹“ ‘Milem in insiam tûr a ni lo va, milem siam chawp emaw, lung phun emaw in din tûr a ni lo va, chibai bûk atân in ramah hian milem chuanna lung in phun tûr a ni hek lo: kei hi LALPA in Pathian chu ka ni si a.

²Ka Chawlhnite chu in serh ang a, ka hmun thianghlim chu in zah tûr a ni: kei hi LALPA chu ka ni.

³“ ‘Ka thuruatte chu in zawma, ka thupêkte in pawma, in zawm chuan,

⁴ruahtuite chu a hun têah ka tlâktîr ang a, lei chuan thil a hâwntîr ang a, rama thingte chuan rah an chhuah ang a.

⁵In hruiha buh chuan grêp lawh hun a man phâk ang a, in lawh chuan thil chîn hun a man phâk ang a; in chhang chu hnianghnârin in chên ang a, in ramah hian thlamuang takin in khawsa ang.

⁶He ram hi râlmuang takin ka awmtîr ang a, in mu hle hle ang a, tu mân an tihlau lo vang che u; ramsa sualte chu he ram ata hi ka hnawt ṭiau vang a, khandaihin in ram a fang tlang hek lo vang.

⁷In hmêlmate chu in ûm ang a, in hmaah khandaiha thahin an awm ang.

⁸Mi pangain za in ûm ang a, zain sîng in ûm ang a; in hmêlmate chu in hmaah khandaiha thahin an awm ang.

⁹Tin, ka duhsak ang che u a, chi tam tak ka thlahtîr ang che u a, ka tipung ang che u; tin, in lakah ka thuthlung ka tinghet ang.

¹⁰Rei tak in vawn a hluite chu in ei ang a, a thar dah nân a hluite chu in la chhuak ang.

¹¹In zîngah ka biakbûk chu ka awmtîr ang a, ka nunna chuan a hnuchhawn lo vang che u.

¹²In zîngah ka chêng ang a, in Pathian ka ni ang a, nangni pawh ka mite in ni ang.

¹³Kei hi LALPA in Pathian, an bawih in nih lohna tûra Aigupta ram ata hruai chhuaktu che u chu ka ni a; in nghâwngkawlte chu ka titliak a, ding charin ka kaltîr tâk che u hi.

¹⁴“ ‘Amaherawhchu, ka thu in pawm lohva, hêng thupêk zawng zawngte hi in zawm lohva,

¹⁵ka thuruatte in duh lohva, in nunnain ka rorêlte a huata, ka thupêk zawng zawngte zâwm lova ka thuthlung in bawhchhiat chuan,

¹⁶kei pawhin in chungah hei hi ka ti ang: in chungah thil hlauhawm tak, in nunna tihmuih telh telh leh in mit tichau telh telh ngawrna leh sikserhte ka lêntîr ang. Tin, in thlai chite chu in chîng thlâwn mai mai a ni ang, in hmêlmate chuan an ei zêl dâwn a ni.

¹⁷In chungah chuan ka hmai ka thuar ang a, in hmêlmate hmaah in tlâwm ang; nangmahni hawtuten in chungah ro an rêl ang a, tu ma ûm lohvin in tlân ang.

¹⁸Tin, chuti chung pawha ka thu in la pawm loh cheu chuan, in sualte avângin vawi sarih ka la hrem leh ang che u.

¹⁹In chakna chhuan tawlawl chu ka chhu chhia ang a, in vân chu thîr angah ka siam ang a, in lei chu dâr angah.

²⁰Tin, in tha in sêng thlâwn mai mai a ni ang; in ram chuan thil a hâwntîr lo vang a, rama thingte chuan rah an chhuah hek lo vang.

²¹Mi kalhzâwnga in awma, ka thu in pawm loh chuan in sualnate azirin, a leh sarihin in chungah hremna ka thlentîr ang.

²²“ ‘Tin, in zîngah ramsate ka rawn kaltîr ang a, chu chuan in fate a lâksak ang che u a, in rante a sehsak ang che u a, a tikiam tial tial ang che u a, in kawngte a lo ṭhing ṭhuap ang.

²³Chuti chung pawha ka thununna in pawm chuan lohva, mi kalhzâwnga in la awm cheu chuan,

²⁴kei pawh nangmahni kalhzâwngin ka awm ang a, keimah ngeiin in sual avângin vawi sarih ka hrem ang che u.

²⁵In chungah khandaih ka lên ang a, chu chuan thuthlung phuba a la ang. Mahni khaw chhûng ṭheuhvah in tawm khâwm ang a, in zîngah hri ka lêntîr ang; tin, hmêlmate kuta pêk in ni ang.

²⁶In rin pui ber chhang ka tihchahsak che u hunah chuan, hmeichhe sâwmin a âwmna pakhatah an âwm ang a, in chhang chu bûk chiah zêlin an pe leh ang che u; in ei ang a, in kham chuang lo vang.

²⁷“ ‘Chuti chung pawha ka thu in pawm chuan lohva, mi kalh zâwnga in la awm cheu chuan,

²⁸thinrim takin nangmahni kalhzâwngin ka awm ang a; in sual avângin vawi sarih ka hrem bawk ang che u.

²⁹In fapate sa in ei ang a, in fanute sa in ei bawk ang.

³⁰Tin, in hmunsângte ka tichim ang a, in ni lemte ka titlu ang a, in ruangte chu in milemte ruang chungah ka paih ang; tin, ka nunna chuan a haw dâwn che u a ni.

³¹In khawpuite chu ka tiṭiau vang a, in hmun thianghlimte chu ka tiram ang a, in rimtuite chu ka hnîm lo vang.

³²In ram chu ka tiṭiau vang a, in hmêlma chuta awmte chuan mak an ti ang.

³³Tin, hnam dangte zîngah ka tidarh ang che u a, a ûm tûr che uin khandaih chu ka phawi ang; tichuan, in ram chu a ṭiau vang a, in khuate chu a ram ang.

³⁴“ ‘Tin, ram chuan a ṭiau chhûng zawng leh, in hmêlmate rama in awm chhûng chuan a Chawlhniahte chuan a hlim ang; chutih hnuah chuan ram chu a châwl ang a, a Chawlhniahte chuan a hlim ang.

³⁵A ṭiau chhûng zawng chuan a châwl ang; in awm laia in Chawlhnia châwl ve ṭhîn lote kha.

³⁶Tin, in zînga mi la awm chhunte chu, an hmêlmate ramah an thinlungah chauhna ka awmtîr ang; tin, hnahthel lêng riin a ûm ang a, khandaih laka tlânchhia angin an tlânchhia ang a, tu ma ûm hleih lohvin an tlu ang.

³⁷Tu ma ûm hleih lohvin khandaiha ûm ang maiin an inpal thlu rem rum ang; in hmêlmate lo dang tûrin chakna rêng rêng in nei lo vang.

³⁸Hnam dangte zîngah in boral ang a, in hmêlmate ram chuan a ei zo vang che u.

³⁹Tin, in zînga mi la awm chhunte chu in hmêlmate ramah an khawlohna avângin an hmuih telh telh ang; an pi leh pute chuan an khawlohnate an hmuih phah angin, anni pawhin an hmuih phah ve bawk ang.

⁴⁰“ ‘Ka chunga an sualna avâng leh an khawlohna leh, an pi leh pute khawlohna leh mi kalh zâwnga an awm avânga,

⁴¹kei pawh anmahni kalh zâwnga ka awma, an hmêlmate rama ka awmtîrte chu an phat lohva, an thinlung tan loh chu a intihhnuaia, an khawlohna avânga hremna chu an pawm chuan,

⁴²Jakoba hnêna ka thuthlung chu ka hre reng ang a, Isaaka leh Abrahama hnêna ka thuthlungte pawh ka hre reng ang a; tin, ram pawh chu ka hre reng bawk ang.

⁴³Ram pawh chu an kiansan ang a, anmahni awm lova a ṭiau chhûng chuan a chawlh niahte chuan a hlim ang; ka rorêlnate an duh loh avâng leh an nunnain ka thuruatte a huat ṭhin avângin, an khawlohna hremna chu an pawm tûr a ni.

⁴⁴Chuti chung pawh chuan an hmêlmate rama an awm chu, anmahni tiboral dêr tûrin an laka ka thuthlung bawhchhiain ka paihthla lo vang a, ka haw hek lo vang. Kei hi LALPA an Pathian chu ka ni si a.

⁴⁵An Pathian ka nih theihna tûra hnam tinte mit hmuha Aigupta ram ata ka hruai chhuah, an thlahtute thuthlung chu anmahni avâng hian ka hre reng zâwk ang. Kei hi LALPA chu ka ni,’ ti rawh,” tiin.

⁴⁶Hêng hi Sinai tlânga Mosia hmanga amah leh Israela thlahte kâra LALPAN a siam thupêk te, rorêl te leh dân te chu a ni.