Read Mizo_Old_version Leviticus 27 Bible Online

Leviticus 27 - Mizo_Old_version bible

Leviticus 27

¹Tin, LALPAN Mosia a bia a,

²“Israela thlahte bia la, an hnênah, ‘Miin eng emaw pawimawh bîk chungchângah thu a tiam chuan, a mihring hu tâwk i ruat ang chu LALPA pual a ni ang a,

³mipa a nih chuan i ruat dân tûr chu kum sawmhnih aṭanga kum sawmruk mi chu hmun thianghlim sekel ang, tangkaraw sekel sawmnga hu a ni ang;

⁴hmeichhia a nih chuan i ruat dân tûr chu sekel sawmthum a ni ang.

⁵Tin, kum nga aṭanga kum sawmhnih mi a nih chuan, i ruat dân tûr chu mipa chu sekel sawmhnih, hmeichhia chu sekel sâwm a ni ang.

⁶Tin, thla khat aṭanga kum nga mi a nih chuan, i ruat dân tûr chu mipa chu tangkaraw sekel nga, hmeichhia chu tangkaraw sekel thum a ni ang.

⁷Tin, kum sawmruk aṭanga a chung lam a nih chuan, i ruat dân tûr chu mipa chu sekel sâwm leh panga, hmeichhia chu sekel sâwm a ni ang.

⁸Amaherawhchu, i ruat aia a lo retheih chuan puithiam hnênah hruai tûr a ni ang a, puithiamin a lo ruat ang; thutiamtu theih tâwk ang ang puithiamin a lo ruat ang.

⁹“ ‘Tin, thilhlan, LALPA hnêna an hlan tûr chu ran a nih chuan, tu pawhin LALPA tâna chutiang an pêk rêng rêng chu thil thianghlim a ni tûr a ni.

¹⁰A tidanglam tûr a ni lo va, a ṭhain a chhia, a chhiain a ṭha thlâkthleng tûr a ni hek lo; ran, ran vêka a thleng luih chuan a pahnihin a thlengna nên chuan a thianghlim tûr a ni.

¹¹Tin, ran thianghlim lo, LALPA hnêna hlan ngai loh mi a nih chuan, ran chu puithiam hmaah a dah tûr a ni;

¹²tin, puithiam chuan a ṭhat dân azirin a man tâwk a lo ruat ang a; nang puithiamin i ruat tâwk ang apiang chu a ni zêl ang.

¹³Amaherawhchu, a tlan leh tak tak dâwn chuan i ruat zât hmun ngaa ṭhena hmun khat a belh tûr a ni.

¹⁴“ ‘Tin, miin a in chu LALPA pual atâna a hlan dâwn chuan a ṭhat leh ṭhat loh azirin puithiamin a ruat tûr a ni; puithiam ruat ang ang chu a ni ang.

¹⁵Tin, a hlântu chuan a in chu a tlan leh dâwn chuan, a man tûra i ruat zât hmun ngaa ṭhena hmun khat a belh tûr a ni; tichuan, a ta a ni leh ang.

¹⁶“ ‘Tin, miin a rama lo, a ṭhen LALPA pual atâna a hlan dâwn chuan i ruat dân tûr chu a chi tuh azir zêlin a ni ang. Barli homer khat hmun chu tangkaraw sekel sawmnga man a ni ang.

¹⁷A lo chu Jubili kum aṭanga hlan a nih chuan i ruat ang chu a ni reng ang a.

¹⁸Jubili kum hnua hlan a nih erawh chuan, puithiamin a man chu Jubili thlen lehna tûr kum azir zêlin a ruatsak ang a, i ruat dân aṭanga a kiam tâwk siam a ni ang.

¹⁹A hlântuin a tlan leh dâwn tak tak chuan, a man i ruat zât hmun ngaa ṭhena hmun khat a belh ang a, a ta a ni leh chiah ang.

²⁰Lo chu a tlan duh lo emaw, mi dang hnênah a hralh emaw a nih chuan tlan leh theih a ni tawh lo vang;

²¹Jubili kuma a chhuah leh hun chuan lo chu LALPA tâna thianghlim, a puala lo hluihlâwn ang a ni ang a, puithiam ta tûr a ni ang.

²²A rama mi ni lo, lo a lei LALPA hnêna a hlan chuan,

²³Jubili kum thlengin i ruat dân angin puithiamin a man chu a ruatsak ang a, i ruat ang chuan LALPA tâna thil thianghlimah chumi ni chuan a pe tûr a ni.

²⁴Tin, Jubili kum chuan a leina pa, a ram neitu pângngai chuan a nei leh ang.

²⁵I ruat dân zawng zawng chu hmun thianghlim sekel ang zêl a ni tûr a ni; sekel khat chu gera sawmhnih a ni ang.

²⁶“ ‘Amaherawhchu, ran zînga piang hmasa ber, a pian hmasak ber avânga LALPA pual atâna ruat tawh phawt chu tu mân an hlân tûr a ni lo; sebâwngpa pawh, berâm pawh ni sela, LALPA pual a ni.

²⁷Tin, ran thianghlim lo a nih chuan i ruat dân angin a tlan tûr a ni ang a, a hmun ngaa ṭhena hmun khat a belh tûr a ni; tin, tlan a nih loh chuan i ruat dân angin hralh tûr a ni ang.

²⁸“ ‘Amaherawhchu, miin a thil neihte zînga mi, LALPA puala a hlan tawh phawt chu, mihring emaw, ran emaw, a rama lo emaw pawh ni se, hralh tûr a ni lo va, tlan tûr a ni hek lo; chutianga thil hlan tawh zawng zawng chu LALPA tâna thianghlim tak a ni.

²⁹Mihring pawh ni se, chutianga hlan tawh phawt chu tlan tûr a ni lo; tihhlum ngei ngei tûr a ni.

³⁰“ ‘Ram chhûnga mi, sâwma pakhat zawng zawng, lova thil hâwngte pawh, thei rahte pawh LALPA pual a ni a; LALPA tâna thianghlim a ni.

³¹Miin a sâwma pakhat zînga mi a eng pawh a tlan dâwn chuan a hmun ngaa ṭhena hmun khat a belh tûr a ni.

³²Ran leh berâm rual zînga sâwma pakhat, tiang hnuaia lût a sâwmna zêl chu LALPA tâna thianghlim a ni ang.

³³A chhiat leh ṭhat a fiah tûr a ni lo va, a thlâkthleng tûr a ni hek lo; a thleng luih chuan a pahnihin a thlengna nên chuan thil thianghlim a ni ang a, tlan leh theih a ni lo vang,’ ti rawh,” tiin.

³⁴Hêng hi Sinai tlânga Israela thlahte tâna LALPAN Mosia a pêk, thupêkte chu a ni.