Read Mizo_Old_version Leviticus 3 Bible Online

Leviticus 3 - Mizo_Old_version bible

Leviticus 3

¹“ ‘A thilhlan chu remna thilhlan inthawi a niha, bâwng rual zînga mi a hlan chuan, a nu emaw, a pa emaw pawh ni sela, LALPA hmaah sawisêl bo a hlân tûr a ni.

²A thilhlan lu chungah chuan a kut a nghat ang a, inbiakna puan in kawngka bulah a talh ang a; tin, Arona fapa puithiamte chuan maichâm chu thisen chuan an theh vêl tûr a ni.

³Tin, remna thilhlan inthawinaa mi LALPA tâna meia thilhlan a hlân ang a; a kawchhûng thau leh a rîlbawh zawng zawng leh,

⁴a kal pahnih leh, a bawhtu thau a nêma mi leh a thin tuamtu râng, a kalte chawpin a phawrh tûr a ni.

⁵Tin, Arona fapaten maichâmah, meia thil awm chunga hâlral thilhlan chungah chuan an hâl tûr a ni; chu chu LALPA tâna rimtui tak, meia thilhlan a ni.

⁶“ ‘Tin, remna thilhlan inthawinaa LALPA tâna a thilhlan chu berâm rual zînga mi a nih chuan a nu pawh ni sela, a pa pawh ni sela, sawisêl bo a hlân tûr a ni.

⁷A thilhlana berâmno a hlan chuan LALPA hmaah a hlân ang a.

⁸A thilhlan lu chungah chuan a kut a nghat ang a, inbiakna puan in kawtah a talh ang a; tin, Arona fapaten maichâm chu thisen chuan an theh vêl tûr a ni.

⁹Tichuan, remna thilhlan inthawinaa mi, LALPA tâna meia thilhlan a hlân ang; a thau te, a mei thau tak a tluanin, a kâwngruh thlengin a la vek ang a; a kawchhûng thau te, a rîlbawh zawng zawng te,

¹⁰a kal pahnih leh a bawhtu thau a nêma mi leh a thin tuamtu râng, a kalte chawpin a phawrh tûr a ni.

¹¹Tin, puithiamin chu chu maichâmah a hâl tûr a ni; chu chu LALPA tâna meia thilhlan ei tûr chhiah a ni.

¹²“ ‘A thilhlan chu kêl a nih chuan LALPA hmaah a hlân ang a.

¹³A lu chungah a kut a nghat ang a, inbiakna puan in kawtah a talh ang a; tin, Arona fapaten maichâm chu thisen chuan an theh vêl tûr a ni.

¹⁴Tin, chumia a thilhlan chu a hlân ang a, LALPA tâna meia thilhlan chu; a kawchhûng thau leh a rîlbawh zawng zawng leh,

¹⁵a kal pahnih leh a bawhtu thau a nêma mi leh, a thin tuamtu râng, a kalte chawpin a phawrh tûr a ni.

¹⁶Tin, chûng chu puithiamin maichâmah a hâl tûr a ni a, rimtui atâna meia thilhlan ei tûr chhiah a ni. A thau zawng zawng chu LALPA pual a ni.

¹⁷Thau emaw, thisen emaw ei loh tûr tih hi in thlahte zêl tân pawh in awmna apiangah zawm tûra thupêk ding reng a ni ang,’ ti rawh,” tiin.