Read Mizo_Old_version Leviticus 4 Bible Online

Leviticus 4 - Mizo_Old_version bible

Leviticus 4

¹Tin, LALPA chuan Mosia a bia a,

²“Israela thlahte chu bia la, ‘LALPAN thil tih loh tûra thu a pêkte, a enga pawh hi miin hriat loh vângin lo ti palh sela, a titu chu

³hriak thih puithiam ni sela, mipui thiam loh chantîr thei thil a tihsual chuan, a thil tihsual tâk sual thawi nân LALPA hnênah bâwngtuai sawisêl bo, sual thawinaah hlân rawh se.

⁴Bâwng chu inbiakna puan in kawngka bulah LALPA hmaah a rawn kai ang a, bâwng lu chungah a kut a nghat ang a, LALPA hmaah bâwng chu a talh tûr a ni.

⁵Tin, hriak thih puithiam chuan bâwng thisen eng emaw zât chu a la ang a, inbiakna puan inah chuan a rawn keng ang.

⁶Puithiam chuan thisenah chuan a kutzungṭang a chiah ang a, a ṭhen chu LALPA hmaah, hmun thianghlim puanzâr bulah chuan vawi sarih a theh tûr a ni.

⁷Tin, puithiam chuan LALPA hmaah, inbiakna puan ina rimtui hâlna maichâm kîahte chuan thisen chu tlêm a tât ang; tin, bâwng thisen la awm zawng zawng chu, inbiakna puan in kawngka kianga hâlral thilhlan maichâm bulah chuan a chhûng chhuak tûr a ni.

⁸Tin, sual thawina bâwng thau zawng zawng chu a la vek ang a; remna thilhlan inthawina bâwngpaa mi lâk angin, a kawchhûng thau leh a rîlbawh zawng zawng leh a kal pahnih leh a bawhtu thau a nêma mi leh a thin tuamtu râng, a kalte chawpin a phawrh ang a; tin, puithiamin hâlral thilhlan maichâmah a hâl tûr a ni.

¹¹Tin, bâwng vun te, a sa zawng zawng te, a lu nên, a kete nên, a kawchhûng te, a êk te,

¹²a bâwng pum chu dai pâwn lam hmun faiah, vut paihnaah a kalpui ang a, thing chungah a hâl ang; vut paihnaah chuan hâl tûr a ni.

¹³“ ‘Israel chu a hnam puma an lo suala, hre lova LALPA thupêk eng pawh an lo bawhchhiat palh chuan,

¹⁴chu thil tihsual chu hriat chhuah a nih veleh mipuiin sual thawi nân bâwngtuai an hlân ang a, inbiakna puan in kawtah an rawn kai tûr a ni.

¹⁵Tin, mipuiho upate chuan LALPA hmaah bâwng lu chungah chuan an kut an nghat ang a; tin, bâwng chu LALPA hmaah talh tûr a ni.

¹⁶Tin, hriak thih puithiam chuan inbiakna puan inah bâwng thisen eng emaw zât chu a rawn keng ang a;

¹⁷tin, puithiamin thisenah chuan a kutzungṭang a chiah ang a, puanzâr bulah LALPA hmaah vawi sarih a theh tûr a ni.

¹⁸Tin, thisen chu inbiakna puan ina LALPA hmaa maichâm kîah chuan tlêm a tât ang a; thisen la awm zawng zawng chu inbiakna puan in kawngka kianga, hâlral thilhlan maichâm bulah chuan a chhûng chhuak tûr a ni.

¹⁹Tin, a thau zawng zawng chu a la vek ang a, maichâmah a hâl tûr a ni.

²⁰Chutiang chuan bâwng chu a ti ang a; sual thawina bâwng a tih ang chiahin hei pawh hi a ti tûr a ni. Tin, puithiamin inremna a siamsak ang a, ngaihdam an ni ang.

²¹Tin, bâwng chu daipâwn lamah a kalpui ang a, bâwng hmasa a hâl angin a hâl tûr a ni. Chu chu mipuite tâna sual thawina a ni.

²²“ ‘Rorêltuin thil a tihsuala, LALPA a Pathianin tih loh tûra thu a pêk zawng zawng a enga pawh a tih palha thiam loh a chana,

²³a thil sual tih chu hriattîr a nih chuan a thilhlanah kêl, a pa, sawisêl bo a rawn kai ang.

²⁴Kêl lu chungah chuan a kut a nghat ang a, LALPA hmaa hâlral thilhlan an talh ṭhinnaah chuan a talh tûr a ni. Chu chu sual thawina a ni.

²⁵Tin, puithiamin sual thawina thisen chu a kutzungṭangin tlêm a pir ang a, hâlral thilhlan maichâm kîahte chuan a tât ang a, hâlral thilhlan maichâm bulah a thisen chu a chhûng chhuak tûr a ni.

²⁶Tin, a thau zawng zawng chu remna thilhlan inthawina thau a hâl angin maichâmah a hâl tûr a ni. Tichuan, a sual chungchâng thu-ah chuan puithiamin inremna a siamsak ang a, ngaihdam a ni ang.

²⁷“ ‘Tin, vântlâng zînga mi a tua pawhin LALPAN tih loh tûra thu a pêkte a enga pawh tisual palhin, thiam loh lo chang ta sela,

²⁸a thil sual tih chu hriattîr a nih chuan a thilhlanah kêl, a nu, sawisêl bo, a thil tihsual tâk sual thawi nân a rawn kai tûr a ni.

²⁹Sual thawina lu chungah chuan a kut a nghat ang a, hâlral thilhlanna hmunah chuan sual thawina chu a talh tûr a ni.

³⁰Tin, puithiamin thisen chu a kutzungṭangin tlêm a pir ang a, hâlral thilhlan maicham kîahte chuan a tât ang a, a thisen la awm zawng zawng chu maichâm bulah chuan a chhûng chhuak tûr a ni.

³¹Tin, a thau zawng zawng chu remna thilhlan inthawina thau an lâk angin a la vek ang a; tin, puithiamin LALPA tâna rimtuiah maichâmah a hâl tûr a ni. Tichuan, puithiamin inremna a siamsak ang a, ngaihdam a ni ang.

³²“ ‘Tin, sual thawi nâna a thilhlana berâmno a rawn ken chuan, a nu, sawisêl bo a rawn keng tûr a ni.

³³Sual thawina lu chungah chuan a kut a nghat ang a, hâlral thilhlan an talhnaah chuan sual thawi nân a talh tûr a ni.

³⁴Tin, puithiamin sual thawina thisen chu a kutzungṭangin tlêm a pir ang a, hâlral thilhlan maichâm kîahte chuan a tât ang a, a thisen la awm zawng zawng chu maichâm bulah chuan a chhûng chhuak ang.

³⁵A thau zawng zawng chu berâmno thau, remna thilhlan inthawinaa mi lâk angin a la vek ang a, puithiamin LALPA tâna meia thilhlan angin maichâmah a hâl tûr a ni. Tichuan, puithiamin a thil tihsual tâk chungchâng thu-ah inremna a siamsak ang a, ngaihdam a ni ang.