Read Mizo_Old_version Leviticus 6 Bible Online

Leviticus 6 - Mizo_Old_version bible

Leviticus 6

¹Tin, LALPA chuan Mosia a bia a,

²“Tu pawhin thil tisualin, LALPA thu bawhchhe ta sela, sum kawltîr thu emaw, hlêp thu emaw, rûkrûk thu emawa a ṭhenawmte tihderin a ṭhenawmte bum ta sela,

³a nih loh leh, thil bote chharin, tihderin dâwtin chhia chham ta sela, hêng thil zawng zawng a enga pawh hi a tihsual chuan,

⁴heti hi a ni ang a, a sual ngeia, thiam loh a chan chuan a thil rûk te, buma a thil lâk te, a hnêna sum kawltîr te, thil bo a chhar te,

⁵dâwta chhia a chhamna thil eng pawh chu a rûl leh tûr a ni. A kim chiahin a rûl leh vek ang a, a hmun ngaa ṭhena hmun khat chu a chuangin a belh ang a, thiam loh a chan ni chuan a neitu chu a pe tûr a ni.

⁶A bawhchhiat thawina berâm rual zînga mi, i ngaiha âwm tâwk, berâmpa sawisêl bo, bawhchhiat thawinaah LALPA tân puithiam hnênah a rawn kai tûr a ni.

⁷Tichuan, puithiamin LALPA hmaah inremna a siamsak ang a, ngaihdam a ni ang, thiam loh channa tûra thil a tih apiang chungchângahte chuan,” tiin.

⁸Tin, LALPAN Mosia a bia a,

⁹“Arona leh a fapate hnênah, ‘Hei hi hâlral thilhlan dân tûr chu a ni: hâlral thilhlan chu maichâm chunga a hâlnaah chuan zankhuain a tûk thlengin a awm ang a; tin, maichâma mei chu a nung reng tûr a ni.

¹⁰Tin, puithiam chuan a puan zai sîn silhfên a inbel ang a, a tisa khuh nân a puan zai sîn kekawr a ha ang a; tin, maichâma hâlral thilhlan kâng vâpte chu a la ang a, maichâm sîrah a dah tûr a ni.

¹¹Tin, a silhfên chu a hlîp ang a, silhfên dang a inbel ang a, a vâpte chu daipâwn lam hmun faiah a kalpui tûr a ni.

¹²Tin, maichâm chunga mei chu tihnun reng a ni ang a, a mit tûr a ni lo. Tin, puithiam chuan tûk tin thing a tuah ang a, hâlral thilhlan chu a dah fel ang a; chutah chuan remna thilhlante thau chu a hâl tûr a ni.

¹³Maichâmah mei a nung reng ang a; a mit tûr a ni lo.

¹⁴“ ‘Tin, hei hi chhangphut thilhlan dân tûr chu a ni: Arona fapate chuan maichâm bulah, LALPA hmaah an hlân tûr a ni.

¹⁵Tin, anin a vei khatin chhangphut thilhlana mi, chhangphut dip tak leh a hriak leh chhangphut thilhlan chunga beraw zawng zawng chu a la chhuak ang a, chu chu LALPA tâna rimtui tak, hriat rengna atân maichâmah a hâl tûr a ni.

¹⁶Tin, lâk bângte chu Arona leh a fapaten an ei tûr a ni; chu chu hmun thianghlimah dawidim tel lovin an ei ang a; inbiakna puan in kawtlaiah an ei tûr a ni.

¹⁷Dawidim telin ur tûr a ni lo. Meia ka thilhlana an chanvo atân ka pêk a ni; chu chu sual thawina leh bawhchhiat thawina anga thil thianghlim tak a ni.

¹⁸Arona thlah mipa zawng zawngin an ei tûr a ni. Chu chu LALPA tâna hâlral thilhlan chungchâng thu-ah in thlahte zêl chena kumkhaw dân a ni ang. Tu pawh chumi khawih apiangte chu tihhran an ni ang,’ tiin thu pe rawh,” tiin.

¹⁹Tin, LALPA chuan Mosia a bia a,

²⁰“Hriak thiha a awm nia Arona leh a fapaten LALPA hnêna an hlan tûr thilhlan chu hei hi a ni: chhangphut thilhlana hlan ṭhin tûr, chhangphut dip tak epha hmun sâwma ṭhena hmun khat, zîngah a chanve, tlaiah a chanve.

²¹Urna thlêngah hriak pawlha siam tûr a ni. A inchiahchhuah hunah i rawn la lût ang a, a phel tê têin chhangphut thilhlan chu LALPA tâna rimtuiah i hlân tûr a ni.

²²A fapate zînga mi a thlâktu, hriak thih puithiam chuan a hlân ang a; kumkhaw dân tûr angin LALPA tân hâl ral vek tûr a ni.

²³Puithiam chhangphut thilhlan apiang chu hâl ral vek tûr a ni a, ei hauh loh tûr a ni,” tiin.

²⁴Tin, LALPA chuan Mosia a bia a,

²⁵“Arona leh a fapate hnênah, ‘Hei hi sual thawi dân tûr chu a ni: hâlral thilhlan talh ṭhinnaah sual thawina pawh chu LALPA hmaah talh tûr a ni. Chu chu thil thianghlim tak a ni.

²⁶Sual thawina hlântu puithiam chuan a ei ang a; inbiakna puan in kawtlaiah, hmun thianghlimah ei tûr a ni.

²⁷Tu pawh chumi sa khawih apiangte chu tihhran an ni ang; tin, a thisen chu eng puanah pawh theh per ni sela, a kaina apiang chu hmun thianghlimah i su tûr a ni.

²⁸A chhumna hlum bêl chu tihkeh tûr a ni a; dâr bêla chhum a nih erawh chuan nawh faia tleuh fai tûr a ni.

²⁹Puithiam chhûngkuaa mipa tawh phawt chuan chumi chu an ei thei ang. Chu chu thil thianghlim tak a ni.

³⁰Sual thawina, a thisen hmun thianghlima inremna siamna tûra inbiakna puan ina rawn lâk chu ei tûr a ni lo; hâl tûr a ni.