Read Mizo_Old_version Leviticus 7 Bible Online

Leviticus 7 - Mizo_Old_version bible

Leviticus 7

¹“ ‘Tin, hei hi bawhchhiat thawi dân tûr chu a ni, thil thianghlim tak a ni:

²hâlral thilhlan an talh ṭhinnaah bawhchhiat thawina pawh chu an talh tûr a ni; tin, a thisen chuan maichâm chu a theh vêl tûr a ni.

³Tin, a thau zawng zawng chu a hlân tûr a ni: a mei thau tak te, a kawchhûng thau te,

⁴a kal pahnih leh a bawhtu thau, a nêma mi leh a thin tuamtu râng, a kalte chawpin a phawrh ang a;

⁵tin, puithiam chuan LALPA tâna meia thilhlanah maichâm chungah a hâl tûr a ni. Chu chu bawhchhiat thawina a ni.

⁶Puithiam chhûngkuaa mipa tawh phawt chuan chumi chu an ei thei ang; hmun thianghlima ei tûr a ni. Chu chu thil thianghlim tak a ni.

⁷Bawhchhiat thawina chu sual thawina ang bawk a ni a, dân khat a ni: chumia inremna siamtu puithiam chuan chu chu a nei tûr a ni.

⁸Puithiam, mi tu pawh hâlral thilhlana a hlansaktu puithiam ngei chuan, hâlral thilhlana a hlan vun chu a pumbil tûr a ni.

⁹Tin, a urnaa ur chhangphut thilhlan apiang te, kan bêla kan leh thlênga ur zawng zawng chu a hlântu puithiam pual tûr a ni.

¹⁰Chhangphut thilhlan zawng zawng chu hriaka hmeh pawh, a ro pawh, a dang ang bawkin Arona fapate zawng zawngin an insem tlâng tûr a ni.

¹¹“ ‘Tin, hei hi miin LALPA hnêna a hlan tûr, remna thilhlan inthawi dân tûr chu a ni.

¹²Lâwm thu sawi nâna a hlan chuan, lâwm thu sawi inthawinaah chuan hriaka hmeh dawidim telh loh chhang leh, hriaka chulh dawidim telh loh chhangpêr pante leh, chhangphut dip tak hriaka ngun taka hmeh a hlân tel tûr a ni.

¹³Lâwm thu sawi nâna a remna thilhlan inthawinaah chuan, chhang dawidim telh a hlân tel tûr a ni.

¹⁴Tin, chumi ata chu thilhlan tina mi LALPA tâna thên thilhlan atân pakhat ṭheuh a hlân ang a; remna thilhlan thisena thehtu puithiam pual tûr a ni.

¹⁵Tin, lâwm thu sawi nâna a remna thilhlan inthawina sa chu thilhlan a hlan ni la lain ei zawh tûr a ni a; a tûk thlengin eng mah a khêk tûr a ni lo.

¹⁶“ ‘Amaherawhchu, a thilhlan inthawina chu thutiam emaw, mahni duhthua thilhlan emaw a nih chuan, a inthawina a hlan ni la la chuan ei tûr a ni a; tin, ei bâng chu a tûkah ei tûr a ni.

¹⁷Amaherawhchu, inthawina sa a ni thum ni thlenga la awm cheu chu hâl tûr a ni.

¹⁸A remna thilhlan inthawina sa chu ni thum ni thlenga an ei chuan, pawmsak a ni lo vang a, a hlântu pawh chu hlâna ngaih a ni hek lo vang; thil tenawm a ni ang a, tu pawh a ei apiangin an khawlohna mawh chu an phur ang.

¹⁹Tin, sa, thil thianghlim lo rêng rêng nêna intawk chu ei tûr a ni lo va, hâl tûr a ni. Tin, sa chu a thianghlim apiang chuan an ei ang.

²⁰Remna thilhlan inthawina sa, LALPA chanpual, thianghlim lo chunga eitu erawh chu, chu mi chu a chipuite zîng ata tuithlârin a awm tûr a ni.

²¹Tin, tu pawhin thil tenawm, thianghlim lo rêng rêng, mi thianghlim lo emaw, ran thianghlim lo emaw, thil thianghlim lo rêng rêng a khawiha, remna thilhlan inthawina sa, LALPA chanpual a ei chuan, chu mi chu a chipuite zîng ata tuithlârin a awm tûr a ni,’ tiin hrilh rawh,” tiin.

²²Tin, LALPA chuan Mosia a bia a,

²³“Israela thlahte hnênah, ‘Sebâwng emaw, berâm emaw, kêl emaw thau in ei tûr a ni lo.

²⁴Amaha thi thau leh sa seh thau chu thil dang engah pawh hman theih a ni ang a; ei erawh chu in ei hauh tûr a ni lo.

²⁵Tu pawh, LALPA tâna miin meia thilhlan an hlan sathau ei chu a chipuite zîng ata tuithlârin a awm tûr a ni.

²⁶In awmna tawh phawtah chuan thisen rêng rêng, sava emaw, ramsa emaw thisen in ei tûr a ni lo.

²⁷Tu pawh ni sela, thisen ei rêng rêng chu, chu mi chu a chipuite zîng ata tuithlârin a awm tûr a ni,’ tiin hrilh rawh,” tiin.

²⁸Tin, LALPA chuan Mosia a bia a,

²⁹“Israela thlahte hnênah, ‘LALPA hnêna a remna thilhlan inthawina hlân apiang chuan, LALPA tâna a thilhlan chu a remna thilhlan inthawina ata a rawn hlân tûr a ni.

³⁰LALPA tâna meia thilhlan chu ama kut ngeiin a rawn keng ang a; a thau chu a ir chawpin a rawn la tûr a ni, a ir chu LALPA hmaa thên thilhlana thên a nih theih nân.

³¹Tin, puithiamin maichâmah a thau chu a hâl ang a; a ir erawh chu Arona leh a fapate pual tûr a ni.

³²A bawp ding lam chu inremna thilhlan inthawina ata thên thilhlanah puithiam in pe tûr a ni.

³³Arona fapate zînga remna thilhlan thisen leh thau hlântu apiang chuan, a chanvo atân a bawp ding lam a nei tûr a ni.

³⁴A ir leh a bawp an thên ṭhin chu Israela thlahte an remna thilhlan inthawinate ata chu ka tîl hrang a, Israel thlahte kumkhaw tih dân tûr atân puithiam Arona leh a fapate ka pe a ni,’ tiin hrilh rawh,” tiin.

³⁵Hei hi a ni, anmahni hriak a thih nia Israela thlahten an pêk tûra LALPAN thu a pêk, puithiam hna thawka LALPA rawngbâwl tûra a hlan ni achina LALPA tâna meia thilhlan ata Arona chanvo leh a fapate chanvo tûr chu. Hei hi kumkhuaa an thlahte zêl thlenga an tih dân tûr a ni.

³⁷Hei hi Sinai thlalêra Israela thlahten thilhlan LALPA hnêna hlân tûra thu a pêk nia, Sinai tlânga LALPAN Mosia thu a pêk hâlral thilhlan te, chhangphut thilhlan te, sual thawina te, tihhranna te, remna thilhlan inthawina dân te chu a ni.