Read Mizo_Old_version Leviticus 8 Bible Online

Leviticus 8 - Mizo_Old_version bible

Leviticus 8

¹Tin, LALPAN Mosia a bia a,

²“Arona chu a fapate nên hruai la, silhfên te, hriak thih mi te, sual thawina bâwngpa te, berâmpa pahnih te, chhang dawidim telh loh bâwm khat nên chuan keng bawk la;

³tin, mi zawng zawng chu inbiakna puan in kawngka vêlah awm khâwmtîr rawh,” tiin.

⁴Tin, Mosia chuan LALPAN thu a pêk ang chuan a ti a; mi zawng zawng chu inbiakna puan in kawngka vêlah chuan an awm khâwm a.

⁵Tin, Mosian pung khâwmho hnênah chuan, “Hei hi a ni, LALPAN tih tûra thu a pêk chu,” a ti a.

⁶Tin, Mosian Arona leh a fapate chu a rawn hruai a, a bual a.

⁷Tichuan, kawr chu a hâktîr a, kâwng hrênna chuan a hrêng a, kawrfual chu a hâktîr a, puithiam kawr chu a bel a; puithiam kawr hrênna thiam taka tah chuan a hrêng a, chu chuan a hrêng bet a.

⁸Tin, âwmbel chu a bel a; tin, âwmbelah chuan Urim leh Thumim a dah a.

⁹Diar chu a khimtîr a; tin, diar pang hma lamah chuan rangkachak phêk, tihhran chhinchhiahna thianghlim chu a bel a, LALPAN Mosia thu a pêk ang khân.

¹⁰Tin, Mosia chuan hriak thih mi chu a la a, biakbûk leh a chhûnga thil awm zawng zawngte chu a thih a, a tithianghlim hlawm a.

¹¹Chu bawk chuan maichâm chu vawi sarih a theh a, maichâm leh a bungbêl zawng zawng te, maihûn leh a hûnchhante chu tihthianghlim tûrin a thih a.

¹²Tin, a tihthianghlimna tûrin hriak thih mi chu Arona lûah a leih a, a thih a.

¹³Tin, Mosian Arona fapate chu a rawn hruai a, kawr a haktîr a, kâwng hrênnain a hrêng a, diar a khimtîr a, LALPAN Mosia thu a pêk ang khân.

¹⁴Tin, sual thawina bâwngpa chu a rawn kai a, Arona leh a fapate chuan sual thawina bâwngpa lu chungah chuan an kut an nghat a.

¹⁵Tin, Mosia chuan a talh a; thisen chu a la a, chu chu inremna maichâm tâna siam nân a kutzungṭangin maichâm kîahte chuan a vêlin a tât a, maichâm chu a thian a, maichâm bulah thisen chu a leih a, a tithianghlim a.

¹⁶Tin, a rîlbawh zawng zawng te, a thin tuamtu râng te, a kal pahnih leh a thaute a la a, maichâmah Mosian a hâl a.

¹⁷Bâwngpa erawh chu a vun nên, a sa nên, a êk nên, daipâwnah a hâl a, LALPAN Mosia thu a pêk ang khân.

¹⁸Tin, hâlral thilhlan berâmpa chu a han hlân a, Arona leh a fapate chuan berâmpa lu chungah chuan an kut an nghat a.

¹⁹Tin, Mosia chuan a talh a; tin, maichâm chu thisen chuan a theh vêl a.

²⁰Tin, berâmpa chu a chan a, a lu leh sa hrangte leh a thaute chu a hâl a.

²¹Tin, a kawchhûng leh a kete chu a sil a; berâmpa chu maichâmah a vaiin a hâl vek a; LALPA tâna meia thilhlan a ni a, LALPAN Mosia thu a pêk ang khân.

²²Tin, berâmpa dang, tihhranna berâmpa chu a han hlân leh a; Arona leh a fapate chuan berâmpa lu chungah chuan an kut an nghat a.

²³Tin, Mosia chuan a talh a, thisen chu a la a, Arona beng ding lam hmâwrah te, a kut ding lam zungpuiah te, a ke ding lam zungpuiah te a hnawih a.

²⁴Tin, Mosia chuan Arona fapate chu a hruai a, an beng ding lam hmâwrah te, an kut ding lam zungpuiah te, an ke ding lam zungpuiah te a hnawih a; tin, maichâm chu thisen chuan a theh vêl a.

²⁵Tin, a thau te, a mei thau tak te leh a rîlbawh zawng zawng te, a thin tuamtu râng te, a kal pahnih leh a thaute leh a bawp ding lam a la a;

²⁶LALPA hmaa chhang dawidim telh loh bâwm ata chu chhang dawidim telh loh pakhat leh, hriaka hmeh chhangpêr pakhat leh chhangpêr pan pakhat a la a, sa thau chungah leh a bawp ding lam chungah chuan a dah a;

²⁷tin, a vai chuan Arona kutphah chungah leh a fapate kutphah chungah chuan a dah a, LALPA hmaa thên thilhlanah a thên a.

²⁸Tin, Mosian an kut ata chu a la a, halrâl thilhlan chungah maichâmah a hâl a; chu chu rimtui atâna tihhranna a ni; LALPA tâna meia thilhlan a ni.

²⁹Tin, Mosian a ir chu a la a, LALPA hmaa thên thilhlanah a thên a; chu chu tihhranna berâmpaa Mosia chanvo a ni, LALPAN Mosia thu a pêk ang khân.

³⁰Tin, Mosian hriak thih mi ata leh maichâma thisena mi a la a, chu chuan Arona leh a silhfên a theh a, a fapate leh a fapate silhfênte pawh; Arona leh a silhfên chu a tithianghlim a, a fapate leh a fapate silhfênte pawh.

³¹Tin, Mosian Arona leh a fapate hnênah chuan, “Inbiakna puan in kawngka bulah sa chu chhûm ula, ‘Arona leh a fapaten an ei tûr a ni,’ tia thu ka pêk ang khân, chutah chuan tihhranna bâwma chhang nên ei rawh u.

³²Tin, sa leh chhang ei bângte chu in hâl tûr a ni.

³³In intihhranna ni a kim hma loh chuan inbiakna puan in kawngka chu chhuahsan lovin ni sarih in awm tûr a ni; ni sarih a tihrang dâwn si che u a.

³⁴Tûna tih ang hian inremna siamsak tûr che uin LALPAN tih tûr thu a pe a ni.

³⁵Inbiakna puan in kawngka bulah chuan ni sarih, chhûn leh zân in awm reng ang a, in thih loh nân LALPA thupêk chu in zâwm tûr a ni; chutianga thupêk chu ka ni,” a ti a.

³⁶Tichuan, LALPAN Mosia hmanga tih tûra thu a pêk zawng zawng chu Arona leh a fapate chuan an ti a.