Read Mizo_Old_version Jeremia 1 Bible Online

Jeremia 1 - Mizo_Old_version bible

Jeremia 1

¹Benjamin rama Anathoth khuaa puithiamte zînga mi Hilkia fapa Jeremia thute;

²Juda lal, Amona fapa Josia hun lai, a lal kum sâwm leh kum thumnaah chuan a hnênah LALPA thu a lo thleng a.

³Juda lal Josia fapa Jehoiakima lal lai pawhin a lo thleng a; Juda lal Josia fapa Zedekia kum sâwm leh kum khatna tâwp, Jerusalem sala hruai thla ngana thleng khân.

⁴Tin, LALPA thu chu ka hnênah a lo thleng a:

⁵“Pum chhûnga ka siam hma chein ka hria che a, Chhûl ata i chhuah hma pawhin ka serh hrang che a, hnamte hnêna zâwlneiah ka ruat tawh a che,” tiin.

⁶Tin, kei chuan, “E, Lalpa PATHIAN, ngai teh, thu ka sawi thiam lo, ka naupang si,” ka ti a.

⁷LALPA erawh chuan ka hnênah heti hian a ti a: “ ‘Ka naupang,’ ti suh, Ka tirhna che apiang hnênah i kal ang a, Thu ka pêk che apiang i sawi tûr a ni.

⁸Anmahni avângin hlau suh la, Chhanchhuak tûr chein i hnênah ka awm e,” Tih hi LALPA thuchhuak a ni.

⁹Tichuan, LALPA chuan a han ban a, ka kâ a khawih a; tin, LALPA chuan ka hnênah: “Ngai rawh, i kâah ka thute ka dah ta.

¹⁰En teh, hnamte leh lalram chungah te, Pawt chhuak tûr te, ṭhiat tûr te, tichhe tûr te, Paih thla tûr te, siam ṭha tûr leh din tûrin Hemi niah hian ka dah che a ni,” a ti a.

¹¹Chu lo pawh LALPA thu ka hnênah a lo thleng a, “Jeremia, eng nge i hmuh?” a ti a. Tin, kei chuan, “Vaiumkhal thing ṭang ka hmu,” ka ti a.

¹²Tin, LALPA chuan ka hnênah, “I hmu fuh hle mai; ka thu hlen tûrin ka inrâlring reng a ni,” a ti a.

¹³Tin, LALPA thu chu a vawi hnihnaah ka hnênah a lo thleng leh a, “Eng nge i hmuh?” tiin. Tin, kei chuan, “Bêl so bawrh bawrh, a rawng hmâr lam hawi ka hmu,” ka ti a.

¹⁴Tichuan, LALPA chuan ka hnênah heti hian a ti a: “Rama chêng zawng zawngte chungah hmâr lam ata thil ṭha lo a lo chhuak ang.

¹⁵Ngai teh, hmâr lam lalram hnam zawng zawng ka ko dâwn si a,” tih hi LALPA thuchhuak a ni; “An lo kal ang a, Jerusalem kawngka luhnaah te, a vêl kulh bang zawng zawng bulah te leh, Juda khawpui zawng zawngah te an lalṭhutthlêng an hûng ṭheuh vang.

¹⁶Mi kalsan a, pathian dangte hnênah rimtui an hâl a, anmahni kutchhuak ngei an bia a; hêng an suahsualna zawng zawng chungchânga ka thurêlte chu ka puang ang.

¹⁷Chuvângin, puan veng la, tho la, thu ka pêk zawng zawng che chu an hnênah va sawi rawh. An hmaah zâm suh ang che; chuti lo chuan, an hmaah ka tizâm ang che.

¹⁸Ngai rawh, hemi niah hian a ram pum puite, Juda lalte, a hotute, a puithiamte leh chumi rama mi lakah chuan, khawpui kulh nei leh thîr ban leh ngên bangah ka siam che hi.

¹⁹An bei ang chia; mahse, an hneh lo vang che. Chhanchhuak tûr chein i hnênah ka awm si a,” tih hi LALPA thuchhuak a ni.