Read Mizo_Old_version Jeremia 10 Bible Online

Jeremia 10 - Mizo_Old_version bible

Jeremia 10

¹Aw, Israel chhûngte u, in hnêna LALPA thusawi hi ngaithla rawh u,

² LALPA chuan heti hian a ti: “Hnamte awm dân zir suh la, Vâna chhinchhiahnate vângin zâm hek suh u;

³Mite dânte chu engmahlo mai a ni si a; Ramhnuaiah thing an kit a, Hreipuia mi themthiam kutin an chei a.

⁴Tangkarua leh rangkachakin an chei a, A chêt loh nân thîr kilhna leh tubohvin an kilh a.

⁵Leipuia sava hlauh tûr milim mai an ni a, An ṭawng thei lo; Mahniin an kal theih loh avângin, Put sawn an ngai ṭhîn; Anni chu hlau suh u, Thil chhia an ti thei lo va, Thil ṭha an ti thei hek lo.”

⁶Aw LALPA, nang ang tu mah an awm lo ve, I ropui a, i hming chaknain a thang lian e.

⁷Aw hnamte lal, tuin nge ṭih lo vang che? Chu chu i phu rêng si a. Hnamte mi fing zawng zawng zingah te, An ram rêng rêng zîngah pawh, Nang ang rêng an awm lo ve.

⁸Anni zawng mi mâwl leh mi â an ni a; Milim zirtîrna chu thing mai a ni.

⁹Tarsis ata tangkaraw chher an rawn la a, Uphaz ata rangkachak pawh, Mi themthiam siam, rangkachak chhertu kutchhuak; An silhfênan dumpâwl leh senduk, Mi themthiam kutchhuak vek an ni e.

¹⁰ LALPA erawh chu Pathian tak a ni; Pathian nung leh chatuana Lal a ni e. A thinurin lei a nghîng a, Hnamten a thinrimna an tuar lo.

¹¹An hnênah hetiang hian in ti tûr a ni: “Pathiante, lei leh vân siamtu ni hlei lote chu lei ata an boral ang a, vân hnuai aṭangin an bo vek ang.”

¹²A thiltihtheihnain lei a siam a, A finnain khawvêl a din a, A remhriatnain vân a tipharh a.

¹³A aw a chhuah chuan vânah tui a ri hum hum a: “Kâwlkil ata chhûm a chhohtîr a, Ruah sûr nân kâwl a phêttîr a, A ro bâwm ata thli a tlehtîr a.”

¹⁴Mi tin an mâwl a, hriatna an nei lo; Rangkachak chhertu pawhin a lem chher chu a zahpui a; A milim chhûn chu dâwt mai a ni si, Anmahniah thaw pawh a awm lo.

¹⁵Engmahlo mai an ni, bumna hna mai, An hremna hunah an bo mai ang.

¹⁶Jakoba chanvo zawng hetiang a ni lo, Thil zawng zawng bul a ni si; Israel hi a ro luah hnam a ni a, A hming chu sipaihote LALPA a ni.

¹⁷Aw nang, huala awm mêk chuan, I puanthuah lei ata la khâwm rawh.

¹⁸ LALPA chuan heti hian a ti a ni: “Ngai rawh u, tûnah rama chêngte ka thing chhuak ang, An hriat thamin ka tihrehawm ang.”

¹⁹Ka nâ avângin ka chung a pik e, Ka hliam hi a nâ a ni. Mahse, “Hei zet hi hrehawmna chu a ni, Ka tuar mai tûr a ni,” ka ti.

²⁰Ka puan in a chhe ta, ka hrui zawng zawng a chat vek a; Ka hnên ata ka fate an chhuak a, an awm ta lo. Ka puan in zâr tûr an awm tawh lo, Ka puanzâr tungding tûrte.

²¹Berâm vêngtute chu an mâwl a, LALPA râwn nachâng an hre lo; Chu vâng chuan an hmuingîl lo va, An berâm rualte an darh zo.

²²Ngai rawh u, thâwm chu a lo thleng, Hmâr lam ata buaina nasa tak mai, Juda khawpuite tiṭiauva, Sihal chênna hmuna chantîr tûrin.

²³Aw LALPA, mihring awm dân chu, Mahni thu mai a ni lo tih ka hre ta; Tungchhova kal mihringah hian, A pheikhai hruai tûr a awm lo.

²⁴Aw LALPA, mi thunun la, a tâwk chauhvin, Thinur lovin; chuti lo chu, mi tibo dah ang e.

²⁵Awze mi, nang hre ngai lote chungah leh, I hming lam ngai lote chungah I thinurna hrithla ang che; Jakoba chu an ei zo va, A ni, an ei zo va, an ei ral a, A chênna ram pawh an tiram a.