Read Mizo_Old_version Jeremia 11 Bible Online

Jeremia 11 - Mizo_Old_version bible

Jeremia 11

¹Jeremia hnêna LALPA thu lo thleng chu:

²“He thuthlung thute hi ngaithla ula, Juda mite leh Jerusalem-a chêngte hnênah sawi rawh u.

³Tin, nang chuan an hnênah, LALPA, Israel Pathian chuan heti hian a ti: ‘He thuthlung thute ngaithla lotu chu ânchhe dawngin awm rawh se;

⁴chu chu in thlahtute, Aigupta ram, thîr rawh tuina ata ka hruai chhuah nia, “Ka ṭawngka chhuak awih ula, thu ka pêk zawng zawngte chu ti rawh u,” tia ka thupêk chu a ni; “Tichuan, ka mite in ni ang a, kei chu in Pathian ka ni ang,”

⁵in thlahtute hnêna khawizû leh hnutetuia luang ram, chhechhama pêk ka tiam kha ka hlen theih nân, vawiina a awm ang hian,’ ti rawh,” a ti a. Tin, kei chuan, “Amen, aw LALPA,” tiin ka chhâng a.

⁶Tin, LALPA chuan ka hnênah, “Juda khawpuiahte leh Jerusalem khawlaiahte hêng thu zawng zawng hi puang la, ‘He thuthlung thute hi ngaithla ula, zâwm rawh u.

⁷In thlahtute Aigupta ram ata ka hruai chhuah ni ata tûn thlengin, “Ka ṭawngka chhuak awih rawh u,” tiin ka hriattîr ṭhîn a.

⁸Mahse, an awih lo va, beng an dawh hek lo, mi tin mahni thinlung sual ang zêlin an awm ta zâwk a. Chuvângin, hêng thuthlung thu, ti tûra thu ka pêk, an tih loh zawng zawng hi an chungah ka rawn thlen ta a ni,’” a ti a.

⁹Tin, LALPA chuan ka hnênah, “Juda mite leh Jerusalem-a chêngte zîngah phiarrûkna a awm.

¹⁰An thlahtu, ka thu ngaithla duh lotute khawlohna lamah chuan an lêt leh a; pathian dangte rawng bâwl tûrin an kal a; Israel chhûngte leh Juda chhûngte chuan an thlahtute hnêna ka thuthlung siam chu an bawhchhe ta,” a ti a.

¹¹Chuvângin, LALPA chuan heti hian a ti: “Ngai teh u, an chungah thil ṭha lo, an pumpelh tawp loh tûr chu ka rawn thlen ang; mi au vang a; mahse, ka chhâng lo vang.

¹²Tin, Juda khawpuite leh Jerusalem-a chêngte chuan pathian, an hnêna rimtui an hâl ṭhinnate chu an au vang a; mahse, an buai hunah chuan chûng chuan an chhanhim tawp lo vang.

¹³Aw Juda, i pathiante chu i khawpui zât an ni si; thil zahthlâk tak, Baala hnêna rimtui hâlna tûr maichâm meuh pawh Jerusalem kawtthlêr zât ngawtin in lo din ta a.

¹⁴Chuvângin, hêng mite hi ṭawngṭaisak suh la, an tân dîlna emaw, aw emaw chhuah hek suh; an buai huna mi auh chu ka ngaithla dâwn si lo va.

¹⁵“Mi tam tak nên thil tenawm tak ti chungin, Ka duh tak chuan ka inah pual eng nge a neih? Thu intiam te leh sa serh chuan Chhiatna a pumpelhtîr thei dâwn che u em ni? In sualnaa awm reng chungin in hlim thei dâwn em ni?

¹⁶ LALPA chuan i hmingah, Olive thing hring, rah ṭha mawi pui, a ti chia, Ri huau huauvin a chungah mei a chhêm a, A zârte pawh a tliak zo ta.

¹⁷“Sipaihote LALPA, nangmah phuntu che chuan, Israel chhûngte leh Juda chhûngte sualna, Baala hnêna rimtui hlâna, mi tihthinrimna thil anmahni tâna an thawh chhuah chunga thil ṭha lo tûr thu chu i chungah a puang chhuak ta.”

¹⁸ LALPA chuan mi hriattîr a, ka hre ta: Tichuan, nang ngeiin an thiltihte mi kawhhmuh ta.

¹⁹Kei erawh chu berâmno nunnêm tak, Talh tûra hruai ang mai ka ni; “Thing chu a rah chawpin i tichhia ang u khai, Mi nung ram ata ani chu i tibo daih ang u, A hming rêng rêng hriat a nih tawh loh nân,” Tia ka chunga an thil phiar chu ka lo hre hauh lo.

²⁰Mahse, aw sipaihote LALPA, dik taka rêl ṭhîntu, Chhûngril lam leh thinlung fiah ṭhîntu, An chunga i phuba lâk chu mi hmuhtîr ang che, Ka chungchâng thu hi i hnênah ka kawltîr si a.

²¹“Chu vâng chuan sipaihote LALPA chuan Anathoth mi, i nunna zawngtu, ‘Kan kuta i thih loh nân LALPA hmingin thu sawi suh,’ titute chungchângah chuan heti hian a ti:

²²‘Ngai rawh u, anmahni ka hrem ang a, tlangvâlte chu khandaihin an thi ang a, an fanute, an fapate chu ṭâmin an thi ang;

²³thi bâng rêng an awm lo vang; Anathoth mite chungah chuan thil ṭha lo ka thlen dâwn si a, an hremna kum tûr ngei chu.’”