Read Mizo_Old_version Jeremia 12 Bible Online

Jeremia 12 - Mizo_Old_version bible

Jeremia 12

¹Aw LALPA, i hnênah ka phunnawi pawhin, Nang zawng i dik ṭhîn; Mahse, ka vuina thu chu ka sawi tho dâwn. Engati nge mi suaksualte kawng chu a hmuingîl ṭhin ni? Engati nge bum hmang tawh phawtte chu nuamsa taka an awm ṭhin le?

²Anni chu i phun a, a ni, zung an kai ta a; An ṭhang a, a ni, rah an chhuah ta. An hmuiah chuan i hnai a, An chhûngrilah zawng i hla si.

³Aw LALPA, kei erawh chu mi hria a; Mi hmu a, i lamah ka thinlung i fiah ṭhîn. Anni chu berâm talh tûr ang maiin hnûk chhuak la, An talhna ni tûr chu ruat ang che.

⁴Ram chuan eng chen nge a sûn anga, Ram pum pui thlaite chu an vuai ang? A chêngate suahsualna avângin Ramsate chu an ral zo va, savate pawh; “Kan hun hnuhnûng chu a hmu lo vang,” an tih avângin.

⁵“Kea kal mite chu i tlânsiakpuia, an tihchauh tawh che chuan, Engtin nge sakawrte i tlânsiakpui theih ang? Muanna ramah him takin awm mah la, Jordan ramngawah chuan engtin nge i tih ang?

⁶I unaute, i pa chhûngkua ngeite chuan, Anni ngei chuan an bum tawh si chia; Anni chuan ûm chein ring takin an au chia, Thu ṭha tak sawi mah se, awih rêng rêng suh.

⁷Ka in leh lo kalsanin ka ro luah tûr ka paih bo ta; Ka nunnain a ngaih taki chu, A hmêlmate hnênah ka pe ta.

⁸Ka ro luah tûr chu ramhnuaia sakeibaknei ang a lo ni ta; Ka lakah a râwl a chhuah a; Chuvângin, ka hua a ni.

⁹Ka ro luah tûr chu ka tân sa hel ei sava ṭial a ni em ni? Sa hel ei vaten a vêlin an bei em ni? Ramsa zawng va khâwm ula, Ei tûrin rawn hruai rawh u.

¹⁰Berâmpu tam takte chuan ka grêp huan an tichhia a, Ka chan chu an rap bet a, Ka chanvo nuam tak mai chu Thlalêr ram ṭiau an chantîr ta.

¹¹Ram ṭiauvah an siam ta a, A ṭiau va, ka hnênah a vui a ni, A ram pum pui a ṭiau va; Mahse, tu mân an ngaihsak lo.

¹²Thlalêra tlâng kawlh zawng zawngahte, Tichhetute an lo thleng ta a; Ram tâwp lehlam aṭanga lehlam thlengin LALPA khandaih chuan a ei zo ta si a; Muanna nei rêng an awm ta lo.

¹³Buh chi an tuh a, hlîng an seng a; An intihah hnêp a, hlâwkna awm si lovin. LALPA thinur nasa tak avângin In rah chhuahte chu in zahpui ang.”

¹⁴“Ka mi Israel-te hnêna ro luah tûra ka pêk khawih chhetu, ka ṭhenawm sualte zawng zawng chungchângah chuan LALPA chuan hetiangin a ti: ngai rawh u, an ram ata ka pawt chhuak ang a, an zîng ata Juda chhûngte ka pawt chhuak ang.

¹⁵Tin, heti hi a ni ang a, ka pawh chhuah hnuah anmahni ka khawngaih leh ang a, mi tin anmahni ro luah tûr leh mi tin anmahni ram ngeia awm tûrin ka rawn hruai haw leh ang.

¹⁶Tin, heti hi a ni ang a, Baala hnêna ka mite chhechham an zirtîr ang bawka, ka hminga, ‘LALPA a nuna a nun chhûng chu,’ tia chhe chham an zira, ka mite awm dân ngun taka an zir chuan ka mite zîngah ka din ang.

¹⁷Mahse, an ngaihthlâk loh chuan chumi hnam chu a pawhin ka pawt chhuak ang a, ka tichhe zo vang,” tih hi LALPA thuchhuak a ni.