Read Mizo_Old_version Jeremia 13 Bible Online

Jeremia 13 - Mizo_Old_version bible

Jeremia 13

¹ LALPA chuan ka hnênah heti hian a ti a: “Hrênpuan zai sîn lei la, tihuh lovin hrêng rawh,” tiin.

²Tichuan, LALPA thu ang zêlin hrên chu ka lei a, ka hrêng ta a.

³Tin, LALPA thu chu ka hnênah a lo thleng leh a,

⁴“Hrênpuan i lei, i hrên kha la la, tho la, Euphrates lui pan la, chuta lung keh kârah chuan thukru rawh,” tiin.

⁵Tichuan, LALPA thu mi pêk angin ka kal a, Euphrates lui bulah chuan ka thukru ta a.

⁶Tin, ni tam tak hnuah chuan LALPAN ka hnênah, “Tho la, Euphrates lui pan la, hrênpuan ka thuhrûktîr che kha la chhuak rawh,” a ti a.

⁷Tichuan, Euphrates lui lamah chuan ka kal ta a, ka han hai a, hrênpuan chu ka thuhrûkna ata ka han phawrh chhuak a. Ngai teh, hrênpuan chu a lo mawih vek a; eng atân mah a tlâktlai ta lo.

⁸Tin, LALPA thu chu ka hnênah a lo thleng a:

⁹“LALPA chuan heti hian a ti: ‘Hetiang bawk hian Juda chapopui leh Jerusalem chhuantawlawl chu ka tichhe dâwn a ni.

¹⁰He hnam sual, ka thute ngaithla duh lova, anmahni rilru ngawltâwt zai zuia, pathian dangte rawng bâwl leh be tûra ûm zâwktute hi he hrênpuan, eng atân maha tlâktlailo ang hi an ni ang.

¹¹Hrênpuan chu mi kâwnga a bet reng ang hian, Israel chhûngkaw pum pui leh Juda chhûngkaw pum pui hi, ka mite leh ka hmingthanna leh ka mawina leh ka ropuina an lo nih theih nân, ka hnêna bet reng tûra ka siam an ni si a; mahse, an bengkhawn lo.’

¹²“Tin, he thu hi an hnênah i sawi tûr a ni: ‘LALPA, Israel Pathian chuan heti hian a ti: Peng tinrêng mai uainin a khat ang,’ tiin. Tin, annin i hnênah, ‘Peng tinrêng mai uainin a khat ang tih chu kan hre lo vem ni?’ an ti ang a.

¹³Tin, nangin an hnênah, ‘LALPA chuan heti hian a ti: Ngai rawh u, he rama chêng zawng zawng, Davida ṭhutthlênga thu lalte, puithiamte, zâwlneite leh Jerusalem-a chêng zawng zawngte chu zu ruihnain ka tikhat ang!

¹⁴Anmahni chu ka insuttîr ang a, pate an fate nên,’ tih hi LALPA thuchhuak a ni: ‘Anmahni ka tihboral lohna khawp zawngin anni chu ka khawngaihin ka zuahin ka lainat lo vang.’ ”

¹⁵Ngaithla ula, beng dawh rawh u; Chapo suh u, LALPA chuan thu a thlah tawh a ni.

¹⁶ LALPA in Pathian chu chawimawi ula, Thimna a thlentîr hma leh, Thimin tlângte a tuama in kete a phêt hma hian. Eng in beisei lai takin thimah a chantîr a, Thim chhah takah a siam dâwn a ni.

¹⁷Mahse, in ngaihthlâk loh chuan In chapona avângin fianrialah ka ṭap ka ṭap ang; Ka mittui pawh nasa takin a luang reng ang, LALPA berâm rual chu sala kaih an nih avângin.

¹⁸Lal leh a nu hnênah te chuan, “Ṭhu hniam rawh u, in lukhumte a tla ta si, In lallukhum ropui ngei chu,” ti rawh.

¹⁹Chhim khawpuite chu a ping zo ve, tu ma hawn rual lohvin; Juda zawng zawng salah an tâng, A pum puiin an tâng zo ve.

²⁰In mit lên ula, en rawh u, hmâr lam ata lo thawkte saw. Berâm rual i neih kha khaw nge, I berâm rual duhawm tak kha?

²¹Nangman ṭhiana i siamte kha i chunga an dah hun chuan Engtin nge i tih ang? Hmeichhe nau vei ang mai hian Nâ i ti hle dâwn lâwm ni?

²²“Eng vângin nge hêng hi ka chungah a lo thlen?” I ti rilru a nih chuan, i khawlohna avâng asin ni, I fênfual hlîm a niha i saruak a lan ni.

²³Ethiopia mi hângin a vun a tidanglamin, keitêin a zia a thup thei em ni? Chuti a nih chuan nangni thil sual tih chîng ṭhînte pawhin Thil ṭha in ti thei ang chu!

²⁴“Thlalêr thlîin buhsî a lên ang maiin Anmahni ka tidarh ang.

²⁵Hei hi i chanvo, i puala ka ruatsak che chu a ni, Mi theihnghilha, dâwt i rinchhan avângin,” Tih hi LALPA thuchhuak a ni.

²⁶“Tichuan, keimah ngeiin i fenfual chu I hmai khuh hialin ka hlîmsak ang chia, I zahmawh a lang ang.

²⁷Tâmlaka tlângah te i uirena te, i hur au thâwm te, i inphalrai nasatzia te, Chûng i thiltih tenawmte chu ka hmu ta. Aw Jerusalem, i chung a pik e! Tihthianghlim i nih hma chu eng chen nge ni dâwn?”