Read Mizo_Old_version Jeremia 14 Bible Online

Jeremia 14 - Mizo_Old_version bible

Jeremia 14

¹Khawkhêng chungchânga Jeremia hnêna LALPA thu lo thleng chu:

²“Juda chuan a sûn a, a kulh kawngkate a ngui; Leiah an puan dur khumin an kûn e, Jerusalem ṭap thâwm a chho.

³A mi ṭhaten an chhiahhlawhte tui an chawitîr a, Tuikhuah an pan a, tui an hmu lo, An tuibêl ruakin an kîr a; An zâm a, an hrilhhai a, an lû an khuh.

⁴Lei lah a khî, ram puma ruah tui awm loh vângin. Leilettute chu an zâm a, an lû an khuh a.

⁵A ni, zukpui pawhin phulah no a hring a, A tlânsan e, hnim hring a awm loh vângin.

⁶Ramsabengtungte chu mual pâwng chârah an ding a, Lei thlâk hlawiin an thaw hlawp hlawp a: Peh tûr awm loh vângin an mit a thim rum rum.”

⁷Kan khawlohna chuan min hêk mah se, I hming vângin aw LALPA, rawn thawk ang che; Kan tlûknate a tam si a, I chungah ngei thil kan tisual a.

⁸Aw nang Israel-ho Nghahfâk, mangan laia Chhandamtu, Engati nge he ramah hian mikhual ang maia, Zan khat riaka zin ang leka i awm le?

⁹Engati nge mi chi-ai ang mai leh pasalṭha, chhandam thei si lo ang maia i awm le? Mahse, nang chu, aw LALPA, kan zîngah i la awm a, I hming kan pu a; min kalsan suh ang che!

¹⁰ LALPA chuan he mite chungchângah hian heti hian a ti: “Vah bo hi an duh ṭhîn a, an ke pên an sûmkâr lo; Tichuan, LALPAN anni chu a pawm lo va, An khawlohna chu a hre reng tawh ang a, An sualte avângin a hrem ang.”

¹¹ LALPA chuan ka hnênah, “He mite ṭhatna tûr hi dîlsak suh.

¹²Chaw nghei mah sela, an au chu ka ngaithla lo vang a, hâlral leh buhbâl thilhlan hlân mah sela, ka pawm lo vang; khandaih te, ṭâm te, hripui tein anmahni ka tiboral zâwk ang,” a ti a.

¹³Tin kei chuan, “E, Lalpa PATHIAN, ngai teh, an hnênah zâwlneiten, ‘Khandaih in tâwk lo vang a, ṭâm in tuar hek lo vang, he hmunah hian muan chiahna ka pe zâwk dâwn che u a ni,’ an ti ṭhîn asin,” ka ti a.

¹⁴Tin, LALPA chuan ka hnênah, “Zâwlneite chuan ka hmingin dâwt an hril ṭhîn a nih chu; anni chu ka tîr lo va, thu ka chah lo va, ka be bawk hek lo. An thil hmuh hleih lohte, ṭhumvâwr tlâktlailo te leh an rilru dawhâna te an hrilh che u a ni,” a ti a.

¹⁵Chu vâng chuan LALPA chuan heti hian a ti: “Ka tirh hleih lohva, ka hming chhâla, ‘He ramah hian ṭâm leh khandaih a thleng lo vang,’ tia hriltu zâwlneite chu khandaih leh ṭâmin an boral ang.

¹⁶Tin, an thuhril lo dawngsawngtu hnam pawh hi ṭâm leh khandaih avângin, Jerusalem kawtthlêrah chuan paih chhuah an ni ang a, anmahni leh an nupuite, an fanute, an fapate nên, phûmtu rêng an nei lo vang. An suahsualna chu an chungah ka leih dâwn si a.

¹⁷“Tin, an hnênah he thu hi i sawi tûr a ni: ‘A chhûn a zânin ka mittui luang rawh se, Hul rêng rêng suh se; Ka mi, ka fanu nula thianghlim chuan hliampui a tuar e, Kut thlâk na tak chu.

¹⁸Daia ka chhuah leh, eheu, khandaiha thahte! Khawpuia ka luh leh, eheu, ṭâmpui mitthi! Ram tinah zâwlneite leh puithiamte an vâkvai hlawm a, A ngaihna rêng rêng an hre lo,’ tiin.”

¹⁹Juda chu i paihthla dêr em ni? Zion chu i lungten ta elo? Kan tân tihdamna awm lo lêkin engtizia nge min tuartîr le? Muanna kan zawng a, ṭhatna eng mah a lo thleng lo; Tihdamna hun tûr pawh, ngai teh, thlaphânna mai.

²⁰Aw LALPA, kan suahsualzia kan pha lo ve, Kan pute khawlohna nên, i chungah kan tisual ta si a.

²¹I hming avângin min hmusit suh la, I lalṭhutthlêng ropui tihminghliau suh la; Kan hnêna i thuthlung hre reng la, bawh bo suh ang che.

²²Hnam dang pathiante zîngah ruah sûrtîr thei an awm em? A nih leh, vânin ruahpui a thlen thei em ni? Aw LALPA kan Pathian, chu mi chu nang i ni lâwm ni? Hêng thil zawng zawng hi i tih a ni si a, Kan nghahfâk ber nang i ni e.