Read Mizo_Old_version Jeremia 15 Bible Online

Jeremia 15 - Mizo_Old_version bible

Jeremia 15

¹Tin, LALPA chuan ka hnênah heti hian a ti a: “Mosia leh Samuela chu ka hmaah lo ding mah se, ka thinlungin he mite lam hi a hawi chuang lo vang. Ka hmuh phâk lohvah hnawt chhuak la, kal bo rawh se!

²Tin, ‘Khawiah nge kan kal ang?’ tia an zawh che chuan an hnênah heti hian i ti tûr a ni: ‘Heti hian LALPA chuan a ti: “Thihna pual chu thihnaah; khandaih pual chu khandaihah; ṭâmpui pual chu ṭampuiah; sal tânna pual chu sal tânnaah.” ’

³“Thil chi li ka ruatsak ang,” tih hi LALPA thuchhuak a ni, “Tihlum tûrin khandaih, pet sawm tûrin ui, ei zo leh tiral tûrin chunglêng sava leh ramsa kawlhte.

⁴Juda lal, Hezekia fapa Manasean Jerusalem-a a thiltih avângin, lei lalram zawng zawngte zînga vawrh lân vawrh lânah ka siam ang.

⁵“Tuin nge khawngaih ang che, aw Jerusalem? Tuin nge lungngaihpui ang che? I awm dân zâwt tûrin tu nge lo pêng ang le?

⁶Nangin mi paihthla a, i hnungtawlh zêl a ni,” Tih hi LALPA thuchhuak a ni. “Chutichuan, dimdawi che hi ka ning a, I chungah ka kut ka lek a, ka tiboral che a ni.

⁷Ram puma kulh kawngkâahte chuan ṭawm thennain anmahni ka thian a. Fa lu hlohvin ka siam a, ka mite ka tiboral a; An awm dân an lamlêt loh avângin.

⁸Tuipui kama ṭiauvaivut aia tamin an hmeithaite ka tipung a, Chhûn laiah râlkai tawhte chungah tichhetu ka thlen a, Manganna leh thil râpthlâk ka tlâktîr thut a.

⁹Lu sarih hringtu chu a chau va, a zal dêr a; Chhûn a nih laiin a ni a liam ta a, A mualphovin a hming a chhia a. Tin, a la awmte chu an hmêlmate kutah Khandaiha thah tûrin ka pe ang,” tih hi LALPA thuchhuak a ni.

¹⁰Ka nu, ram pum puia nghirnghotu leh hnialkalhtua mi lo hring hi ka chung a va pik êm! Ka pûktîr lo va, ka pûksak hek lo; mahse, an zain ânchhia mi lawh tho si.

¹¹LALPA chuan, “Tihtakmeuhvah chuan thil ṭha atân ka tinghet ang che; tihtakmeuhvah chuan chhiatna ni leh hrehawm niah hmêlma chu i hnênah kut ka dawhtîr ang,” a ti a.

¹²“Miin thîr, hmâr lama thîr leh ngên chu a titliak thei dâwn em ni?

¹³I sualna zawng zawng avâng hian i sum leh pai leh i ro thilte chu, man lovin râllâk atân ka pe ang, i ram tluanin.

¹⁴Ram i hriat ngai lohvah chuan i hmêlmate rawng ka bâwltîr ang che. Ka thinrim avângin mei i chunga mût tûr chu a alh chhuak ta si a,” a ti a.

¹⁵Nangin i hria e, aw LALPA; Mi hre reng la, mi kan ang che, Mi tiduhdahtute chungah phuba mi lâksak ang che. I dimdawina hi keiin boral phah lo ila; Nangmah avânga hmingchhiat hlawh ka ni tih hria ang che.

¹⁶I thute chu tihlan a ni a, ka ei a, I thute chu ka tân lâwmna leh ka thinlung hlimna a ni; Aw LALPA, sipaihote Pathian, i hming kan pu ta si a.

¹⁷Nuamsip bâwltuteho zîngah ka tel lo va, ka hlimpui hek lo; Nangma kut vângin a fâlin ka ṭhu a, Lungnih lohnain mi tikhat si a.

¹⁸Engati nge ka nâ a reh theih lohva, Ka hliam a dam theih loh, tihdam duh lo ang mai hian? Ka lakah kawrte bum hmang tui kang ṭhîn ang hi a ni dâwn em ni?

¹⁹Chutichuan, LALPA chuan heti hian a ti: “I inlamlêt chuan ngai ka awhtîr ang chia, Ka hmaah i ding leh ang; Thil tlâktlailo ata thil hlu hlîr i sawi chhuah chuan, Keima kam châng i ni ang. Anni chuan i lam lo hawi sela, Nang erawh chuan an lam i hawi tûr a ni lo.

²⁰He mite lakah hi chuan ngên kulh bangah ka siam ang chia; An bei ang chia; mahse, an hneh lo vang che, Chhandam tûr leh chhanchhuak tûr chein I hnênah ka awm si a,” tih hi LALPA thuchhuak a ni.

²¹“Mi suaksualte kut ata ka chhanchhuak ang chia, Mi nunrâwngte hûm beh ata ka tichhuak ang che.”