Read Mizo_Old_version Jeremia 16 Bible Online

Jeremia 16 - Mizo_Old_version bible

Jeremia 16

¹ LALPA thu chu ka hnênah a lo thleng a:

²“Nupui i nei tûr a ni lo va, he hmunah hian fanu fapate pawh i nei tûr a ni hek lo,” tiin.

³Fanu, fapa he hmuna piangte leh he rama nu leh pa anmahni hringtute chungchângah chuan LALPAN heti hian a ti a ni:

⁴“Hripuiin an thi ang a, tu ma phûm loh leh tu ma sûn lohvin an awm ang; lei chung êkdûr ang mai an ni ang. Khandaih te, ṭâm tein an boral ang a, an ruangte chu chunglêng savate leh ramsate chaw a ni ang.”

⁵ LALPA chuan heti hian a ti a ni: “Khawhar inah lût suh la, sûn tûrin kal suh la, anmahni ṭah suh; he mite lak ata hi ka thlamuanna ka hlîp tawh si a, ngilneihna leh lainatnate nên,” tih hi LALPA thuchhuak a ni.

⁶“He ramah hian mi lian leh mi tête an thi ang a; phûm an ni lo vang a, tu mân an sûn lo vang a, an inzaiin an inziah kâwn phah lo vang.

⁷Lusûnte chu an mitthi ngai thlamuan tûrin tu mân ei tûr an hlui lo vang a, an nu emaw, an pa emaw avâng pawhin hnemna no in tûr tu mân an hûn lo vang.

⁸Tin, ei leh ina an zînga ṭhu tûrin ruaiṭhehna inah i lût tûr a ni lo.”

⁹Sipaihote LALPA, Israel Pathian chuan heti hian a ti si a: “Ngai teh u, in mit hmuhah, in dam chhûng hian mo aw te, moneitu aw te, hlim thâwm te, lâwm ri te he hmunah hian ka tireh ang.

¹⁰“Hêng thu zawng zawng hi he mite hnêna i hrilh hunah annin, ‘Eng vângin nge LALPAN kan chungah heti taka thil ṭha lo a rawn sawi chhuah ni? Eng nge kan khawlohna? LALPA kan Pathian chunga kan thil tihsual chu eng nge ni?’ an tih che chuan,

¹¹heti hian i ti dâwn nia: ‘In puten min kalsan vâng a ni, pathian dangte an zui a, an rawng an bâwl a, an bia a, min kalsan a, ka dân an zâwm lo va;

¹²tin, nangnin in pute aia hleihluakin in ti a, ngai rawh u, mi tinin mahni rilru ngawltâwt chhuahin sual in zui a, kei min ngaithla lo va;

¹³chuvângin, he ram ata hi nangni leh in pute pawhin in hriat ngai loh ramah chuan ka hnawt chhuak ang che u; tah chuan a chhûn a zânin pathian dangte rawng in bâwl ang, ka khawngaih dâwn si lo che u a,’ tih hi LALPA thuchhuak a ni.

¹⁴“Tichuan, ngai teh u, nite a lo thleng dâwn e,” LALPA thuchhuak chuan a ti; “ ‘Israel fate Aigupta ram ata hruai chhuaktu a nuna a nun chhûng chu,’ ti tawh lovin,

¹⁵‘Hmâr lam ram leh a ûm darhna ram zawng zawng ata Israel fate hruai chhuaktu, LALPA a nuna a nun chhûng chu’ an ti tawh zâwk ang. An pute hnêna ka pêk, anmahni ram ngeiah chuan ka hruai kîr leh dâwn si a.

¹⁶“Ngai teh u, sangha man mi tam tak ka chah ang a, anmahni an man ang a; chumi hnuah chuan ram vâk mi tam tak ka chah chhuak ang a, an pêl chhuak ang a, tlâng lian leh te leh lungpui keh kâra mite pawh.

¹⁷An awm dân zawng zawngahte chuan ka mit a fu reng si a; ka lakah thupin an awm lo va, an khawlohna te pawh ka mit lakah thuhrûk a ni hek lo.

¹⁸Tichuan, an thil tenawm ruangtein ka ram an tihbawlhhlawh leh, an tenawmnaa ka rochun ram an tihkhah avângin, an khawlohna leh an sualna chu a lêt hnihin ka thungrûl ang,” tih hi LALPA thuchhuak a ni.

¹⁹Aw LALPA, ka chakna leh ka kulhpui, Mangan nia ka inhumhimna, Kâwlkil aṭangin hnamte an lo kal ang a, “Kan pute chuan dâwt te, thil tlâktlailo te, Hlâwkna nei hlei lote chauh lo chu eng mah an rochung lo ve.

²⁰Miin pathiante a insiamsak thei em ni? Chûng chu pathian an ni hlei nêm,” an ti ang.

²¹“Chuvângin, ngai teh u, tûn ṭum hian anni chu ka hriattîr teh phawt ang; ka kut leh ka thiltihtheihna ka hriattîr ang a, ka hming hi LALPA a ni tih an hria ang.