Read Mizo_Old_version Jeremia 17 Bible Online

Jeremia 17 - Mizo_Old_version bible

Jeremia 17

¹“Juda sualna chu thîr kawlawm leh lunghlu hriam hmâwr zumin ziak a ni; an thinlung phêkah kerin a awm a, an maichâm kîah te pawh;

²thing hring bul leh mual pâwngahte chuan, an faten an maichâmte leh an Aseri-te chu an hre reng si a.

³Aw nang ka tlâng, rama mi, ram dung tluana i sualna avâng hian i sum leh i ro zawng zawngte, i bâwlhmunte nên râllâkah ka pe ang.

⁴I chanpual ka pêk che kha i chân ang a, i ram hriat ngai lohvah chuan i hmêlmate rawng ka bâwltîr ang che, ka thinurna mei, kumkhuaa kâng tûr chu in chhêm alh ta si a.”

⁵ LALPA chuan heti hian a ti: “Mihring rinchhana, mihring bân chakna ringa, LALPA hawisanna thinlung neitu chu Anchhe dawngin awm rawh se.

⁶Thlalêra hnimbuk ro ri re ang an ni a, Thil ṭha chhuak tûr rêng a hmu lo vang. Thlalêr ram ro, chi leilung, tu ma luah lohvah chuan a chêng zâwk ang.

⁷ LALPA ringtu, a rinchhan LALPA ni erawh chu a eng a thâwl e.

⁸Tui kianga thing phun, lui kama zung kai, Khaw lum lo thleng pawh hlau lo, A hnahte hring reng si, Khawkhen kum pawisa lo, Rah chhuah ṭhulh chuang si lo ang hi a ni ang.

⁹Thinlung hi thil zawng zawng aiin Bum hmang ber, chhe lailet dêr a ni a; Tuin nge hre thiam thei ang?

¹⁰Kei LALPA hi mi tin an awm dân ang zêl leh An thiltih rah ang zêla pe tûra Rilru en chhuaktu, thinlung fiahtu ka ni.

¹¹Mi, kut tling lova lo hausa chu Varung, mahni tui ni lote awp keu ang a ni a, A la dam laiin amah an hransan ang a, A tâwpah chuan mi â a lo ni mai ang.”

¹²Kan hmun thianghlim awmna chu Lalṭhutphah ropui tak, a tîr ata chawisâna awm chu a ni.

¹³Aw LALPA, Israel Nghahfâk, Nangmah kalsantu zawng zawng chu an mualpho vang. “Kei mi hawisantute chu lei vaivuta ziak ang lek an ni ang; LALPA, nunna tuikhur chu, an kalsan ta si a.”

¹⁴Aw LALPA, mi tidam la; tichuan, ka dam ang a; Mi chhanhim la; tichuan, ka him ang, Ka fak fo ṭhin chu i ni si a.

¹⁵Ngai teh, ka hnênah, “LALPA thu chu khawiah nge? Lo thleng ang hmiang!” an ti ṭhîn a.

¹⁶Thil ṭha lo thlen tûrin ka nawr lo chia, Chhiatna ni lah ka duh hek lo tih i hria; Ka kâa thu chhuak chu i hre vek si a.

¹⁷Ka tân ṭihbaiawm ni suh ang che; Mangan nia ka inhumhimna i ni.

¹⁸Mi tiduhdahtute chu mualpho sela, Kei erawh chu mualpho lo ila; Anni chu zâm sela, kei erawh chu zâm lo ila; Mangan ni an chungah thlen la, Nasa takin tiboral ang che!

¹⁹ LALPA chuan ka hnênah heti hian a ti: “Kulh kawngka lûn ber, Juda lalte luh leh chhuahna leh, Jerusalem kulh kawngka zawng zawngahte chuan va ding la;

²⁰tin, an hnênah, ‘Nangni Juda lalte, Juda zawng zawngte, Jerusalem-a chêng zawng zawng hêng kawngkâa lût ṭhînte u, LALPA thu hi ngaithla rawh u.

²¹LALPA chuan heti hian a ti e: In nun hi fîmkhurpui hle teh u, Chawlhniin phurh nei suh ula, Jerusalem kulh kawngkâah luhpui hek suh u.

²²Tin, Chawlhniah in in ata eng mah in phur chhuak tûr a ni lo va, hna rêng rêng in thawk tûr a ni hek lo; in pute hnêna ka thupêk angin Chawlhni chu in serh thianghlim zâwk tûr a ni.

²³Anni zawngin an ngaithla lo va, beng an dawh lo va; thununna chu an hriata an dawn loh nân an intiluhlul ta zâwk a ni.

²⁴“ ‘Tin, LALPA thuchhuak chuan heti hian a ti: Pawisa taka mi ngaihthlâka, Chawlhnia he khawpui kawngkâa thil in phurh luh lohva, hna rêng thawk lova Chawlhni in serh thianghlim zâwk chuan,

²⁵he khawpui kulh kawngkâah hian lalte leh hotute, Davida ṭhutthlênga ṭhu tûrte chu tawlailîrte leh sakawrahte chuangin an lo lût ang a, anmahni leh an mi liante, Juda mite leh Jerusalem-a chêngte nên; tichuan, he khawpuiah hian mi an chêng hlen tawh ang.

²⁶“ ‘Juda khawpui leh Jerusalem chhehvêl aṭang te, Benjamin ram aṭang te, Sefela ram aṭang te, tlâng ram aṭang leh Chhim ram aṭang tein an lo kal ang a, hâlral thilhlan leh inthawinate, buhbâl thilhlan leh rimtuite, lâwmna inthawinate LALPA inah chuan an rawn la ang.

²⁷Mahse, Chawlhni serh thianghlim tûr leh, Chawlhnia phurh neih loh leh Jerusalem kulh kawngkâa luhpui loh tûr thua min ngaihthlâk loh chuan, a kulh kawngkâahte chuan mei ka chhuah ang a, Jerusalem lal inte chu a kâng zo vang a, a mit lo vang.’ ”