Read Mizo_Old_version Jeremia 18 Bible Online

Jeremia 18 - Mizo_Old_version bible

Jeremia 18

¹ LALPA lak ata Jeremia hnêna thu lo thleng chuan,

²“Tho la, bêlvawtu inah chuan zuk kal la, chutah chuan ka thute ka hriattîr ang che,” a ti a.

³Tichuan, bêlvawtu inah chuan ka zuk kal ta a, a bêl siamna khâwlah chuan a lo thawk a.

⁴Hluma bêl a siam lai chu a lo ṭhat loh chuan, bêlvawtu chuan ṭha a tih angin bêl dangah a din leh mai ṭhîn a.

⁵Tichuan, LALPA thu chu ka hnênah a lo thleng leh a:

⁶“Aw Israel chhûngte u, he bêlvawtu tih ang hian ka ti thei lo che u em ni?” tih hi LALPA thuchhuak a ni. Ngai teh u, bêlvawtu kuta hlum ang mai hian ka kutah in awm a ni, aw Israel chhûngte u.

⁷Eng tikah pawh hnam emaw, ram emaw chungchâng thu-ah, “Ka pawt chhuak ang a, ka ṭhiat ang a, ka tichhia ang,” tiin lo sawi pawh ni ila,

⁸chu hnam chuan a chung thu ka sawi avânga a thil ṭha lo a hawisan chuan, a chunga thil ṭha lo tih ka tum chu ka lamlêt ang.

⁹Tin, eng tikah pawh hnam emaw, ram emaw chungchâng thu-ah, “Ka siam ang a, ka din ang,” tiin lo sawi pawh ni ila,

¹⁰ka ṭawngka chhuak ngaithla lova ka mit hmuha thil tha lo a tih chuan, a tâna thil ṭha tih ka tum chu ka lamlêt bawk ang.

¹¹“Chuvângin, Juda mite leh Jerusalem-a chêngte hnênah chuan, ‘LALPAN heti hian a ti: Ngai teh u, in chungah thil ṭha lo ka suangtuah a, ka phiar mêk che u a ni, mi tinin an awm dân ṭha lo hawisan sela, in awm dân leh in thiltihte siam ṭha rawh u,’ ” va ti phawt rawh.

¹²“Nimahsela, anni zawngin, ‘A âwm lo ve! Mahni remruat ang angin kan awm ang a, mi tin mahni rilru ngawltâwt sual ang zêlin kan che ang,’ ” an ti ṭhîn a ni.

¹³Chuvângin, LALPA chuan heti hian a ti: “Hnam dangte zâwt teh mah u, hetiang rêng tu nge hre ngai? Nula Israel chuan thil ṭihbaiawm tak a tih tâk hi.

¹⁴Lebanon vûr chuan a tlâng chhîp a kiansan ngai em ni? Kâwlvalênchham tui dai a luang kang ngai em ni?

¹⁵Ka mite erawh chuan mi theihnghilh a, Engmahlo mai hnênah rimtui an hâl a; Chûng chuan an hmasâng kawngah a petektîr, Kawngpui ni lo ṭumkawng lam an zawh a,

¹⁶An tiṭiau zo ta e - a ram chu, Kumkhuaa chek khum tûrin. Veivâk apiangin mak tiin an lu an thing.

¹⁷Khawchhak thlipui angin hmêlma hmaah ka theh darh ang, An vânduai niah chuan ka hmêl ni lo, Ka tukkhum ka entîr ang.”

¹⁸Tin, anni chuan, “Hawh u, Jeremia hi i phiar ang u, puithiam lak ata dân a reh dâwn si lo va, mi fing lak ata thurâwn a reh hek lo vang a, zâwlnei lak ata thu a reh bawk hek lo vang. Hawh u, i sawichhe bawrh bawrh ang u khai, a thu rêng rêng i ngaihsak miah lo vang u,” an ti a.

¹⁹Mi ngaihsak la, aw LALPA, Mi dodâltute thu hi bengvâr ang che.

²⁰Sual hi thil ṭha rulhna em ni ngai? Anni zawngin ka nunna atân hum an hiat si. An laka i thinurna tikiang tûr leh An tâna thil ṭha sawi tûra I hmaa ka din ṭhin kha hre reng ang che.

²¹Tichuan, an fate chu ṭâmpui mitthi tawhtîr la, Khandaih chakna tawntîr rawh; An nupuite fa lu hlohvin hmeithai rawh se. An mipate hripuiin thi sela, An tlangvâlte pawh indonaah khandaihin.

²²Rûntute an hnên i thlentîr phutin, An in ata ṭap thâwm thang rawh se. Mi man tûrin hum an hiat si a, Ka ke awh nân thang an kam si a.

²³Mahse, nangin aw LALPA, Mi that tûra an mi phiarna zawng zawng i hria e. An khawlohna ngaidam suh la, I mit hmuhan an sualna thai bo hek suh ang che. I hmaah chuan tlu hlawm sela, I thinur niah chuan ti nek ang che.