Read Mizo_Old_version Jeremia 19 Bible Online

Jeremia 19 - Mizo_Old_version bible

Jeremia 19

¹ LALPA chuan heti hian a ti: “Kal la, bêlvawtu hlum bêl va lei rawh; tin, mipuiho upate leh puithiam zînga upate hruai la;

²Harsith kawngkhâr luhna bula Ben-hinom ruamah chuan kal la, chutah chuan i hnêna thu ka hrilh tûr che hi puang ang che.

³Heti hian ti ang che: ‘Juda lalte leh Jerusalem-a chêngte u, LALPA thu hi hre rawh u. Israel-te Pathian, sipaihote LALPA chuan heti hian a ti: “Ngai teh u, he hmunah hian a hria apiang beng tikhawrh hial khawpa thil ṭha lo ka rawn thlen dâwn.

⁴Mite chuan mi kalsan a, he hmun hi an tibawlhhlawh a, anmahni leh an pate leh Juda lalte pawhin an la hriat ngai hleih loh, pathian dangte hnênah rimtui an hâl avâng leh, he hmun hi mi thiam thisena an tihkhah avâng leh,

⁵Baala hnêna hâlral thilhlan atâna an fate an hâlna tûr, Baala hmun sângte an din avângin; chu chu ka thupêk a ni lo va, ka sawi hek lo va, ka rilruah pawh a awm ngai lo.

⁶Chuvângin, ngai teh, nite chu a lo thleng dâwn,” ’ ” LALPA thuchhuak chuan a ti, “ ‘ “Chûng niahte chuan he hmun hi Topheth vuah a ni tawh lo vang a, Ben-hinom ruam vuah a ni tawh hek lo vang; Insâmna Ruam tih a ni tawh zâwk ang.

⁷Tin, hemi hmunah hian Juda leh Jerusalem thiltumte chu ka tilothlâwn ang a; tin, anni chu khandaihin an hmêlmate hmaah leh an nunna lâk tumtute kutah ka titlu ang; an ruangte chu chunglêng savate leh leia ramsate chaw atân ka pe ang.

⁸Tin, he khawpui hi mak tihah leh chek khuman ka siam ang a, a kal apiangin a chhiat tawhte avâng chuan mak an ti ang a, an chek khum bawk ang.

⁹An fanute leh an fapate sa ka eitîr ang a; tin, an hmêlmate leh an nunna lâk tumtuten an huala an tihmangan hunah chuan tu pawhin an ṭhenawmte sa an ei ang.” ’

¹⁰“Tin, i kalpuite mit hmuhah bêl chu i tikeh ang a,

¹¹an hnênah heti hian ti ang che, ‘Sipaihote LALPA chuan heti hian a ti: “Hetiang bawk hian he mite leh he khua hi ka tikeh ang; bêlvawtu bêl miin a tihkeha, siam ṭhat leh rual a ni lo ang hian; tin, Topheth-ah an phûm ang, phûmna tûr hmun dang a awm loh avângin.

¹²Chuti tak chuan he hmun hi ka ti ang,” tih hi LALPA thuchhuak a ni: “Tin, chutiang bawkin he khua hi Topheth anga siam hialin a chhûnga chêngte chungah pawh ka ti ang:

¹³Jerusalem inte leh Juda lalho inte, in tin mai a chunga vân lam thilte hnêna rimtui hâl tawhna zawng zawng leh, pathian dangte hnêna in tûr thilhlan leih chhuah tawhna zawng zawngte chu, Topheth hmun ang maia tihbawlhhlawh a ni ang.” ’ ”

¹⁴Tin, Jeremia chu, LALPAN thu sawi tûra a tirhna hmun Topheth aṭang chuan a lo kal a; tin, LALPA in hung chhûngah chuan a ding a, mipui zawng zawng hnênah chuan heti hian a ti a:

¹⁵“Israel-te Pathian, sipaihote LALPA chuan heti hian a ti: ‘Ngai teh u, thil ṭha lo ka sawi zawng zawng kha he khawpui leh a khaw dang zawng zawngah hian ka rawn thlen dâwn a ni, ka thu ngaithla lo tûra an thinlung an tihkhauh avângin?’ ”