Read Mizo_Old_version Jeremia 2 Bible Online

Jeremia 2 - Mizo_Old_version bible

Jeremia 2

¹Tin, LALPA thu chu ka hnênah a lo thleng a, heti hian a ti:

²“Kal la, Jerusalem beng hriatah au rawh, LALPA chuan heti hian a ti: ‘I tleirâwl laia i ngilneihzia te, Inhual laia mi hmangaihziate kha ka hre reng e; Tuk loh ram, thlalêra mi zuizia kha.

³Israel chu LALPA tâna serh hran, a rah pung hmasa a ni, Amah ei raltu apiangin thiam loh an chang ang a, An chungah chhiatna a lo thleng ang,’ ” Tih hi LALPA thuchhuak a ni.

⁴Aw Jakoba chhûngte leh Israel chhûng zawng zawngte u, LALPA thu hi ngaithla rawh u.

⁵ LALPA chuan heti hian a ti: “In thlahtuten keimahah fel lohna eng nge an hmuh, Ka laka hla takah an lên bova, Engmahlo mai an ûma, an lo uanthuan tâk ni?

⁶‘LALPA - Aigupta ram ata min hruai chhuaka, Thlalêr, ram ro, khuarkhurum hmun, Thihna hlim leh ram ro hmun, Tu ma kal tlang ngai lohna, Tu ma awm lohna hmuna Min hruai tlangtu kha khawiah nge?’ an ti hek lo.

⁷Ram ṭha takah, a rah leh ṭhatna ei tûrin, Ka hruai lût che u a; Mahse, in han luh chuan Ka ram in tibawlhhlawh a, Ka rochan chu thil tenawmah in siam.

⁸Puithiamte pawhin, ‘LALPA chu khawiah nge?’ an ti lo va, Dân hmangtuten mi hre hek lo; Rorêltute ka lakah an hel a; Zâwlneiten Baala hmingin thu an sawi a, Thil sâwt lo tûrte an ûm a.

⁹Tichuan, ka khing ang che u a, In fate fa lehte pawh ka la khing fo vang,” Tih hi LALPA thuchhuak a ni.

¹⁰“Kittim thliarkârah va kal ula, en rawh u, Kedar-ah mî tîr ula, ngun takin ngaihtuah rawh u, Hetiang thil a awm ngai emaw hriat nân.

¹¹Hnam dangte chuan an pathian an thlâk ngai em ni, Pathian tak ni hlei lo pawh? Ka mite erawh chuan an ropuina chu, Thil sâwt lo takin an thlâk ta zâwk a.

¹²Aw vânte u, mak ti ula, Râp che u sela, ṭiau vek rawh u,” Tih hi LALPA thuchhuak a ni.

¹³“Ka miten thil pahnih an tisual si: Kei, nunna tuikhur hi mi kalsan a, Tuikhuah an ker a, tuikhuah khi, tui tling thei lo tûr chu.

¹⁴Israel chu chhiahhlawh em ni? Vânlunga piang em ni? Engati nge hnehchhiaha a awm tâk ni?

¹⁵Sakeibaknei vânglaite chuan rûm khumin, A chungah aw an chhuah a; A ram chu an tichhe zo ta; A khawpuite pawh luahtu nei lovin a kâng fai ta.

¹⁶Noph mi leh Tahpanes mite pawhin, I chhîp an tikawlh zo ta.

¹⁷ LALPA i Pathian chuan kawnga a hruai lai chea I tlân bosan avângin, Chu chu i chunga i thlentîr a ni lâwm ni?

¹⁸Nile tuite in tûra Aigupta kawng i zawh hi, Eng nge i tân hlâwk dâwn ni? Luipui tui in tûra Assuria kawng i zawh pawh hi, Eng nge i tân hlâwk dâwn ni?

¹⁹I suahsualna chuan a tuartîr ang chia, I hnungtawlh ṭhinna chuan a zilhhau vang che; Mi ṭihna nei lova LALPA i Pathian i kalsan hi, Thil sual tak leh kha tak a ni tih hi Lo hre chhuak la, hmu fiah tawh rawh,” tih hi Lalpa, sipaihote LALPA thuchhuak a ni.

²⁰“Hmân ata tawh i nghâwngkawl titliakin, I hruite pawh i tichat tawh si a, ‘I rawng ka bâwl tawh lo vang,’ i ti a, Tlâng sâng tinahte, thingbuk hnuai apiangahte, Kûnin i hur thil i ti a.

²¹Chi dik tak hmangin grêp ṭha tak ka phun che a, Engtiziaa inleta, ka tân grêp suaka lo chang ta nge i nih?

²²Chingalin insilin sahbawn tam tak hmang mah la, I khawlohna chu ka mit hmuhah a lang tho a ni,” Tih hi Lalpa PATHIAN thuchhuak a ni.

²³“ ‘Ka intibawlhhlawh hlei nêm, Baala-te pawh ka zui hek lo,’ Engtin nge i tih theih le? Kawr ruama i awm dânte en la, I thiltih tâkte chu hre rawh; Sanghâwngseilâ hur lai ang riai i nih kha.

²⁴Ramsabengtung thlalêra awm ṭhîn, a hur laia hnâr lên ruai ang; A châkna chu tuin nge dâl zo vang? A zawngtu chu intihah duh suh se, A hunah chuan an hmu mai ang.

²⁵I kêah pheikhawk bun lovin awm suh la, I dang pawh ro suh se; Nang erawh chuan, ‘Beisei a bo zo ta, Awze mite ka ngai a, anmahni ka ûm ang,’ i ti a.

²⁶“Rûkru an phâwka a zak angin, Israel chhûngte chu an zak ta. Anmahnite, an lalte, an hotute, An puithiamte, an zâwlneite pawh.

²⁷Thing bul hnênah, ‘Ka pa i ni,’ tia, Lung bul hnêna, ‘Mi hringtu i ni,’ titute chu. Hmachhawn lovin an tukkhum chhah mi chhawn ta zâwk a. An mangan hunah erawh chuan, ‘Tho la, min chhandam ta che,’ an ti ang.

²⁸I pathian, i siamte kha khawiah nge an awm tâk ni? Anni chu tho zâwk sela, i mangan laiin an chhandam thei mahna che; Aw Juda, i pathiante chu i khawpuite zât lai an ni alâwm.

²⁹Engah nge ka chungah in vui fo le? In zain ka chungah thil in tisual si,” Tih hi LALPA thuchhuak a ni.

³⁰“In fate ka vua, a sâwt lo, An ṭhat phah chuang hek lo. Sakeibaknei koham ang maiin, Nangmahni khandaih chuan in zâwlneite a ei ral a.

³¹“Aw ṭhangtharte u, LALPA thu hi hre rawh u! “Israel tân thlaler ram ang ka ni em ni? Thim chhah mup ram ka ni em ni? Ka mite chuan engah nge, ‘Kan chhuak fel ta, I hnênah kan lêt leh lo vang,’ an tih ni?

³²Nula chuan a incheimawinate a theihnghilh theiin, Mo thar chuan a inthuamna a theihnghilh thei em ni? Ka mite erawh chuan ni chhiar sên loh chhûng Min theihnghilh ta.

³³Ngaizâwngtu hmuh theihna tûrin i awm dân i va uluk ve! Hmeichhe sual hnênahte pawh i awm dân i zirtîr tâk hi.

³⁴I pawnfênahte pawh mi rethei pawi khawih lote Nunna thisen a kai a. Mi in an rawk lai kut man pawh ni si lo.

³⁵Chu achhapah nangmah chuan, ‘Thiam ka chang e, ka lakah a thinurna a dai,’ I la ti leh ta lai a, Ngai rawh, ‘Ka sual lo ve,’ i tih avângin, I chung thu ka rêl ang.

³⁶I awm dân thlâk zung zungin, Engah nge i vah vêl ṭhin? Assuria i zahpui ang bawk khân, Aigupta pawh i la zahpui ang.

³⁷I kutte khumin an hnên ata i la chhuak leh ang, LALPAN i rinnate chu a paihthla si a, Anmahniah chuan i hmuingîl lo vang.