Read Mizo_Old_version Jeremia 20 Bible Online

Jeremia 20 - Mizo_Old_version bible

Jeremia 20

¹Tin, Imera fapa, LALPA ina hotupa ber, puithiam Pasura chuan Jeremian chûng thute chu a sawi tih a lo hria a.

²Tichuan, Pasura chuan zâwlnei Jeremia chu a vua a, LALPA ina Benjamina Kawngkhâr chhaktaa kawlah chuan a tântîr a.

³A tûkah chuan Pasuran Jeremia chu a phelhin, Jeremia chuan a hnênah, “LALPA chuan i hmingah Pasura a vuah lo ve, Magor-Misabiba a vuah zâwk a che.

⁴LALPA chuan heti hian a ti si a: ‘Ngai rawh, nangma tân leh i ṭhiante zawng zawng tân ṭihkhaiah ka siam ang che; anni chu an hmêlmate khandaihin an tlu ang a, nang lah chuan i mitin i en ngawt ang. Juda-ho zawng zawng chu Babulon lal kutah ka pe vek ang a, ani chuan Babulon-ah salah a hruai ang a, khandaihin a that ang.

⁵Chu achhapah, khawpui hausakna zawng zawng te, a thawh chhuah zawng zawng te, a thil roh zawng zawng te leh Juda lalte ro zawng zawng chu an hmêlmate kutah ka pe ang a, anni chuan an rawk ang a, an man ang a, Babulon-ah an hruai ang.

⁶Tin, nang Pasur, i in chhûnga awm zawng zawngte nên salah in tâng ang a; Babulon-ah chuan i kal ve ang a, chutah chuan i thi ang a, chutah chuan phûmin i awm ang a, nang leh i ṭhian, dâwt thu i lo hrilh ṭhinte zawng zawng nên hian,’” a ti a.

⁷Aw LALPA, nangin mi lo bum a, bumin ka awm ta a nih hi; Nang chu kei aiin i chak a, mi hneh a. Nilêngin nuihzabûr ka ni ta, mi tu pawhin mi nuihzat hi.

⁸Thu ka sawi apiangin ka au chhuak a, “Inpâwngnêkna leh inramna!” tiin ka au va; LALPA thu chu ka tân chuan, nilênga dem leh hmuhsit hlawhna chauh a ni.

⁹“Ani chu ka lam lo vang a, A hmingin thu ka sawi tawh hek lo vang,” ti mah ila, Ka ruh chhûnga mei kâng inkhung ta ang mai hian Ka thinlung chhûngah chuan a awm si ṭhîn; Ka pai hle hle zo lo va, ka chelh ngang lo a ni.

¹⁰Mi tam takte phun ru ka hria: “Kil tinah hlauhawm a awm! Hêk ula, i hêk tlâng ang u,” tiin. Ka ṭhenrual, ka tlûk châng rengtute chuan, “Bumin a awm ang a, kan hneh ang; A chungah kan phuba kan la ang,” an ti a.

¹¹Mahse, LALPA chu mi huaisen hlauhawm tak angin ka hnênah a awm a. Mi tiduhdahtute chu an tlu ang a, mi hneh lo vang. Mualpho takin an awm ang a, an hlawhtlin dâwn loh avângin. An kumkhaw hmingchhiatna chu theihnghilhin a awm lo vang.

¹²Aw, sipaihote LALPA, mi felte fiahtu, Thinlung leh rilru hmu tlang ṭhîntu, An chunga i phuba lâk chu mi hmuhtîr teh; Ka chungchâng thu hi ka kawltîr ta si che a.

¹³ LALPA hnênah chuan hla sa ula, LALPA chu fak rawh u; Thil sual titute kut ata ṭanpui ngaite nunna chu a hum si a.

¹⁴Ka pian chhuah ni chu ânchhe dawngin awm rawh se! Ka nuin mi hrin ni chu malsâwmin awm suh se!

¹⁵Ka pa hnêna, “Fapa i nei ta e!” Tih thu rawn thlena, Rawn tilâwmtu chu Anchhe dawngin awm rawh se.

¹⁶Chu mi chu, LALPAN khawngaih hlek lova A tihram khuate angin awm rawh se. Zîng lamah chuan au thâwm hria sela, Chhûn a lo nih chuan râlkhêl thâwm;

¹⁷Chhûl chhûnga mi tihhlum loh avâng khân; Chuti ni se, ka nu chu ka thlân a ni mai tûr a, A chhûl chuan mi pai kumkhua mai tûr.

¹⁸Engah kher nge chhûl ata ka lo chhuah le, Thawk rim leh lungngaia awm tûra, Mualpho rêng rênga ka dam chhûng nite hmang tûr hian?