Read Mizo_Old_version Jeremia 21 Bible Online

Jeremia 21 - Mizo_Old_version bible

Jeremia 21

¹Lal Zedekian Malkia fapa Pasura leh Maaseia fapa puithiam Zephania-te chu Jeremia hnênah a tîr a,

²“Babulon lal, Nebukadnezzara chuan min do ta si a, LALPA chuan a thiltih ropui tak a tih ṭhin ang khân min pui duh mialin, a kîrtîr leh mai law maw tih LALPA min lo zawh sak teh se,” tia sawi tûrin. Chuta Jeremia hnêna LALPA thu lo thleng chu hei hi a ni.

³Tin, Jeremia chuan an hnênah, “Zedekia hnênah chuan hetiangin va sawi rawh u:

⁴‘Israel-te Pathian, LALPA chuan heti hian a ti: “Ngai rawh, Babulon lal leh Kaldai mi, kulh pâwna hualtu che i dona râlthuam hriamhrei chu ka dang bet ang a; tin, he khawpui chhûngah hian anni chu ka hruai khâwm ang.

⁵Keimah ngei pawhin thinrim leh lungni lo tak leh thinur takin, bân pharin bân tha chak hmangin ka do vang che.

⁶Hemi khuaa chêng mihringte leh rante hi ka tihlum ang a, hripuiin an thi ang.

⁷Chumi hnuah chuan,” LALPA thuchhuak chuan a ti, “Juda lal Zedekia leh a ṭhuihruaite leh mi dang, he khuaa hri leh khandaih leh ṭâma thi lote chu, Babulon lal Nebukadnezzara kutah leh an hmêlmate kutah leh anmahni thah tumtute kutah chuan ka pe ang. Khandaih hriamin a that ang a, a khawngaih hauh lo vang a, a zuah hek lo vang, a lainat bawk hek lo vang.” ’

⁸Tin, hêng mipuite hnênah hian heti hian va sawi rawh, ‘LALPA chuan heti hian a ti: “Ngai rawh u, thihna kawng leh nunna kawng ka dahsak che u hi.

⁹He khawpui chhûnga awm chu khandaihin emaw, ṭâmin emaw, hrîin emaw an thi ang; Kaldai a hualtu che u hnêna chhuaka inpete erawh chu an nung ang, an nunna chu indo lâwmman atân a ni ang.

¹⁰He khawpui ṭhatna tûr ni lo, a chhiatna tûr ka tum tlat tawh a ni; Babulon lal kutah pêk a ni ang a, ani chuan meiin a hâl ang,” tih hi LALPA thuchhuak a ni.’

¹¹“Juda lal chhûngte chungchâng thu-ah chuan, ‘LALPA thu hi ngaithla rawh u,

¹²aw Davida chhûngte u! LALPA chuan heti hian a ti: Zîngah chuan dik takin ro rêl ula, Tiduhdahtu kut ata rawk tuara chu chhanchhuak ula; Chuti lo chu, ka thinurna mei angin a chhuak ang a, Tu ma ṭhelh rual lohvin a kâng ang e, In thil sual tih avâng hian.

¹³Ngai teh u, ruam zâwla chêngte u, Nangni ruam zâwl lungpuia chênga, “Tute nge kan awmnaah lo lût ang?” titute u, Ka khing dâwn che u a ni, LALPA thuchhuak chuan a ti.

¹⁴In thiltih rah ang zêlin ka hrem ang che u a, A ramngawah chuan mei ka chhuah ang a, A vêl zawng zawng chu a kâng ral ang,’ ” LALPA thuchhuak chuan a ti.