Read Mizo_Old_version Jeremia 22 Bible Online

Jeremia 22 - Mizo_Old_version bible

Jeremia 22

¹ LALPA chuan heti hian a ti; “Juda lal inah zu kal la, he thu hi zu sawi rawh.

²‘Aw Juda lal, Davida ṭhutphah chunga ṭhu, nang leh i ṭhuihruaite leh i mi, hêng kawngkhâra lûtte nên hian, LALPA thu hi ngaithla rawh u, ti la:

³LALPA chuan heti hian a ti: “Dik tak leh fel takin rorêl ula, tiduhdahtu kut ata rawk tuara chu chhanchhuak ula; tin, mikhual te, pa nei lo te leh hmeithai chungah te dik lohna emaw, pâwngnêkna emaw chîng suh u; he hmunah hian mi thiam thisen pawh chhuah hek suh u.

⁴He thu hi zâwm ngei ni ula chuan, Davida ṭhutphah chunga lalte chu tawlailîrte leh sakawrte chunga chuangin, anmahni leh an ṭhuihruaite leh an mite chu he in kawngkhârahte hian an lût ngei ang.

⁵Amaherawhchu, hêng thute hi in ngaihthlâk loh chuan he in hi a ram ang, tiin, mahni inchhâlin chhia ka chham a ni,” ’ ” tih hi LALPA thuchhuak a ni.

⁶LALPA chuan Juda lal chhûngkaw chungchâng thu hetiangin a sawi a: “Nang chu ka tân Gilead ang, Lebanon tlâng chhîp ang i ni; Mahsela, thlalêr ka chantîr ang chia, Luahtu awm lo khawpui ang mai hian.

⁷Nangmah tiboral tûrte, hriamhrei nei ṭheuhvin, Ka buatsaih ang a; I sidar thing thlante an kit ang a, Meiah an tuah ang.

⁸“Tin, hnam dang tam takten he khawpui hi an pal tlang ang a, mi tinin mahni ṭhenawmte hnênah, ‘LALPA chuan he khawpui ropui tak hi eng vânga heti taka ti ta nge maw ni chu le?’ an ti ang.

⁹‘An Pathian, LALPA thuthlung chu an hawisana, pathian dangte an biaka, an rawng an bâwl vâng a ni,’ ” tiin an chhâng ang.

¹⁰Thi ta chu ṭah suh ula, sûn hek suh u; Kal bo taa erawh chu nasa takin ṭah rawh u, A lo kîr leh dâwn tawh si lo va, A pianna ram hi a hmuh leh dâwn tawh loh avângin.

¹¹Juda lal Saluma, Josia fapa, a pa Josia aia rorêltu, he hmun ata kal chhuak ta chungchâng thu chu LALPAN heti hian a sawi: “Hetah hian a lo kîr leh tawh lo vang.

¹²Sala an hruaina hmunah, chutah ngei chuan a thi ang a, he ram hi a hmu leh tawh lo vang.

¹³“Fel lohnaa in saa, Dik lohnaa a pindan chungnungte siamtu, A thlâwna mahni ṭhenawmte tha chhawra, Hlawh pe duh lotu chung chu a pik e;

¹⁴‘In ropui tak ka insak ang a, Pindan chungnung zau takte neiin, Tukverhte ka hawng ang a, Sidar thingin ka thuah chhuak ang a, Rawng sen ka hnawih ang,’ titu chung chu.

¹⁵Sidar thinga rual i khûm avângin, Lalah i inngai maw? I pa khân a eiin a in a, Dik takin ro a rêl a ni lo vem ni? Chu chu a tân a ṭha a ni.

¹⁶Mi rethei leh tlachhamte chu a rêlsak a, Chu chu a ṭha a ni. Hei hi mi hriat dân tûr chu a ni lo vem ni?” Tih hi LALPA thuchhuak a ni.

¹⁷“Nimahsela, i duhâmna atân te, Mi thiam thisen chhuah nân te, Hnehchhiah nân leh pâwngnêk nân chauh I mit leh i rilru i pu a ni.”

¹⁸Chu vâng chuan Juda-te lal Jehoiakima, Josia fapa chung thu chu LALPA chuan heti hian a sawi a: “ ‘Aw ka unaupa!’ tiin emaw, ‘Aw ka farnu!’ tiin emaw An ṭah hek lo vang a. ‘Aw lalpa!’ tiin emaw, ‘Aw ropui ber!’ tiin emaw An sûn hek lo vang.

¹⁹Jerusalem kulh pâwn lama theh chhuaha, paihin, Sabengtung phûma phûmin a awm ang.

²⁰Lebanon-ah chho la, au rawh, Basan-ah i aw chhuah la, Abarim aṭangin au rawh, I hmangaitu zawng zawng an boral ta si a.

²¹I hlawhtlinin i hnênah thu ka sawi a, Nang lah chuan, ‘Ka ngaithla lo vang,’ i ti a, Ka âwkâ i ngaihthlâk loh hi, I tleirâwl aṭangin hei hi i awm dân a ni.

²²Thlîin i berâmpute zawng zawng a châwm ang a, I hmangaitute salah an tâng a, Nang pawh i sualna zawng zawng avângin, Mualpho tak leh mangang takin i la awm ngei ang.

²³Aw Lebanon tlânga chêng, Sidar thing zînga bu khuartu, Natna i chunga a lo thlena i han khawngaihthlâk tûrzia mai chu! Hmeichhe nau vei na ang mai hian.

²⁴“A nuna ka nun chhûng chu,” tih hi LALPA thuchhuak a ni, “Juda lal Konia, Jehoiakima fapa chu ka kut ding lama nemna zungbun ni mah la, chuta ta chu ka phawi ngei ang che.

²⁵Tin, thah tûra zawngtu che kutah, Babulon lal Nebukadnezzara kutah leh Kaldai-ho kutah ngei chuan ka pe ang che.

²⁶I pianna ni lo ram dangah nang leh i nu a hringtu che hi ka paih chhuak ang che u a, chutah chuan in thi ang.

²⁷A rilrua kîr leh an châk êm êmna ramah chuan an kîr leh tawh hek lo vang.

²⁸“He Konia hi bêl keh sawm, hmuhsitawm a ni lâwm ni? Bêl a chhûnga duh zâwng awm lohna chu a ni lâwm ni? Engah nge amah leh a thlahte chu theh chhuaha, Ram an hriat ngai lohvah chuan paih chhuaha an awm?

²⁹Aw, leilung, leilung, leilung, LALPA thu hi ngaithla rawh!

³⁰ LALPA chuan heti hian a ti: ‘He mi hi fa nei lo, A dam chhûnga hlawhtling lo tûr mi a ni, A thlahte tu mah hlawhtlinga, Davida ṭhutphah chunga ṭhu tûr leh Judai rama rorêl leh tûr an awm dâwn si lo,’ ” Tiin ziak rawh u.