Read Mizo_Old_version Jeremia 23 Bible Online

Jeremia 23 - Mizo_Old_version bible

Jeremia 23

¹“Ka ran tlatna hmuna berâm tiborala tidarhtuho berâmpute chu an chung a pik e,” tih hi LALPA thuchhuak a ni.

²Chuvângin, LALPA, Israel-te Pathian chuan ka mite vêngtu berâmpuho chungchâng thu-ah chuan heti hian a ti: “Ka ran rualte chu in tidarh a, in ûm bo va, in kan lo va. Ngai rawh u, in thil tihsual avâng hian ka rawn kan dâwn che u a ni,” tih hi LALPA thuchhuak a ni.

³“Tin, ka ran rual la awm chhunte chu, ka ûm darhna ram zawng zawng ata ka hruai khâwm leh ang a, an huang chhûngah ka khalh khâwm ang a, rah duh tak an ni ang a, an pung ang.

⁴Anmahni ngaihsak tûr an tân berâmpu ka dah ang a, an hlau tawh lo vang a, an mangang tawh hek lo vang a, a tua mah bo an awm tawh bawk hek lo vang,” tih hi LALPA thuchhuak a ni.

⁵“Ngai teh u, Davida tân zâr fel ka chhuahsak hun tûr chu a lo thleng dâwn,” tih hi LALPA thuchhuak a ni; “Ani chu lalah a ṭhu ang a, fing takin a ti ang a, ram pumah dikna leh felna a hlen ang.

⁶A hun chhûngin Juda chu chhandam a ni ang a, Israel chu him takin a awm ang. Tin, hei hi a hming an la vuah tûr chu a ni, ‘LALPA chu kan felna a ni,’ tih hi.

⁷“Tichuan, ngai teh u, a hun a thleng dâwn,” LALPA thuchhuak chuan a ti. “ ‘Israel mite Aigupta ram ata hruai chhuaktu LALPA chu a nuna a nun chhûng chu,’ ti tawh lovin,

⁸‘Hmâr lam ram leh a ûm darhna ram zawng zawng ata Israel chhûngte thlahho hruai chhuaka, hruai kîr lehtu LALPA chu a nuna a nun chhûng chu,’ an ti tawh zâwk ang. Tin, anmahni ram ngeiah an chêng ang.”

⁹Zâwlneite chungchâng thu chu, Lungrilah ka lung a va chhe êm! Ka ruh zawng zawngte chu a khûr a, Zu rui ang mai ka ni, Zuin a fan hneh mi ang mai hian, LALPA vâng leh a thu thianghlim vângin.

¹⁰Ram chu uirehovin a khat a, Anchhia avângin ram chuan a sûn a, Thlalêr hnim hring hmunte chu a ro zo ta. An kawng chu a sual a, An chakna chu a dik lo.

¹¹“Zâwlneite leh puithiamte chuan Pathian an pawisa lo va; Ka in chhûng ngeiah pawh an sualna ka hmu,” LALPA thuchhuak chuan a ti.

¹²“Chuvângin, an tân an kalna kawng chu, Zân thim kawng nâl ang hi a ni ang a, Tah chuan ûmin an awm ang a, an tawlhthlu ang, An chungah thil ṭha lo ka rawn thlen dâwn si a, Anmahni hremna hun chu,” LALPA thuchhuak chuan a ti.

¹³“Samari zâwlneite chungah tenawm ka hmu, Baala chhâlin thu an sawi a, Israel-te an hruai bo va.

¹⁴Jerusalem zâwlneiho chungah pawh Thil râpthlâk tak ka hmu, An uire a, dâwtin an khawsa a, Thil sual titute kut chu an tichak a, Tu mahin an sual sim an tum loh phah a; Ka tân chuan Sodom khuaa mite ang an lo ni vek a, A khaw chhûnga mite zawng zawng pawh Gomorra khuaa mite ang mai.”

¹⁵Chuvângin, zâwlneiho chungchâng thu-ah chuan Sipaihote LALPA chuan heti hian a ti: “Ngai rawh u, saiin ka châwm ang a, Thil khâ ka intîr ang a; Jerusalem-a zâwlneite hnên aṭang chuan Ram pumah Pathian pawisak lohna a chhuak si a.”

¹⁶Sipaihote LALPA chuan heti hian a ti: “Zâwlnei in hnêna thu sawitute thu chu ngaithla suh u; engmahlo an zirtîr che u a, LALPA kâ ata ni lo anmahni rilru suangtuahte an sawi ṭhîn.

¹⁷LALPA thu hmusittute hnênah chuan, ‘I tân a ṭha ang,’ an ti châmchî a; tin, mahni duh zâwng ti lui tlattute hnênah chuan, ‘Thil ṭha lo eng mah i chungah a lo thleng lo vang,’ an ti a.

¹⁸“LALPA remruatnaah tu nge tel ngaia, A thu dawnga hre tûr tu nge awm? A nih leh a thu chu tu nge ngaihvena ngaithla awm?

¹⁹Ngai teh u, LALPA thlipui chu, Thinurna chu a chhuak ta, A ni, ṭhâwngaleivir thlipui chu; Mi sualte lu chu a nuai ang.

²⁰ LALPA thinrimna chu a kîr mai lo vang, A rilrua a tum tlat tawhte chu A hlena, a tih zawh zet hma chuan; Ni hnuhnûngahte chuan in la hre fiah ang.

²¹Zâwlneite chu ka tirh lohvin an tlân a, An hnêna thu ka sawi loh pawhin thu an sawi a.

²²Ka remruatnaah chuan awm ve ni sela, Ka thu hi ka mite hnênah an puang tûr a, An thiltih dik loh ata an hawi kîrtîr tûr.

²³“Hla taka awm Pathian ni lovin, hnai tea awm Pathian em ni ka nih?” tih hi LALPA thuchhuak a ni.

²⁴“Hmun biruah ka hmuh theih loh tûra biru thei an awm dâwn em ni?” tih hi LALPA thuchhuak a ni. “Lei leh vânah hian ka khat a ni lâwm ni?” tih hi LALPA thuchhuak a ni.

²⁵“ ‘Mumangah ka mang e, mumangah ka mang e,’ tia ka hminga dâwt sawitu zâwlneiho thusawi chu ka hria a ni.

²⁶Zâwlnei dâwt sawi ṭhîn, mahni thinlung inbum chawpa thusawi ṭhînte thinlungah chuan hei hi eng chen nge a awm dâwn?

²⁷Anni chuan an vêngte hnênah an mumang hrilhin ka mite ka hming theihnghilhtîr an tum a, an paten Baala avânga ka hming an theihnghilh ta ang khân,

²⁸zâwlnei mumang nei chuan a mang chu sawi rawh se, ka thu neitu chuan ka thu chu dik takin sawi rawh se. Buhpâwl leh buhfang chuan eng nge inanna an neih?” tih hi LALPA thuchhuak a ni.

²⁹“Ka thu chu mei ang, tuboh, lung chhut sawmna ang a ni lo vem ni?” tih hi LALPA thuchhuak a ni.

³⁰“Chuvângin, ngai rawh u, zâwlneiho, ka thu inrûksak tawn ṭhînte chu ka do a ni,” tih hi LALPA thuchhuak a ni.

³¹“Ngai teh u, zâwlnei mahni dang tinâla, ‘LALPAN a ti,’ ti ṭhînte chu ka do a ni,” tih hi LALPA thuchhuak a ni.

³²“Ngai teh u, mumang dâwt mai mai sawia, hrila, an dâwt thute leh an uanthuanna thu lawilote avânga ka mite hruai botu zâwlneite chu ka do a ni,” LALPA thuchhuak chuan a ti. “Ka tîr si lo va, thu ka pe hek lo va, he mipuite hi an tihnemhnâng hek lo vang,” tih hi LALPA thuchhuak a ni.

³³“Hêng mipuite zînga mi tuin emaw, zâwlnei tuin emaw, puithiam tuin emaw, ‘LALPA phurrit chu eng nge ni?’ tia an zawh che chuan heti hian i chhâng dâwn nia, ‘Nangmahni hi phurrit chu in ni, ka paih bo dâwn che u,’ tih hi LALPA thuchhuak a ni.

³⁴Zâwlnei emaw, puithiam emaw, mi tuin emaw ‘LALPA phurrit’ ti an awm chuan, chu mi leh a chhûngte chu ka hrem ang.

³⁵Tichuan, mi tu pawhin a ṭhenawmpa hnênah leh tu pawhin a unaupa hnênah, ‘LALPA chuan engtin nge a chhân? LALPA chuan eng nge a sawi?’ tiin in inzâwt ang.

³⁶LALPA phurrit chu in lam tawh lo vang a, mi tu pawh ama thusawi chu a tân phurrit a ni dâwn si a. Pathian nung, sipaihote LALPA, kan Pathian thu chu in kailek zo ta si a.

³⁷Zâwlnei hnênah chuan, ‘LALPA chuan engtin nge a chhân che? LALPA chuan eng nge a sawi?’ ti ang che.

³⁸Tin, ‘LALPA phurrit chu’ in tih vaih chuan, LALPA chuan heti hian a ti: ‘ “LALPA phurrit chu!” in ti tûr a ni lo,’ tia ka tirh chea, ‘LALPA phurrit chu!’ tia thu in sawi avângin;

³⁹tichuan, ngai rawh u, ka pawt dâwk ngei ang che u, ka kiang hnai ata ka paih bo vang che u, nangni leh he khawpui, in hnênah leh in pate hnêna ka lo pêk tawh nên hian.

⁴⁰Tin, kumkhaw dem chhiatna leh mualpho rengna, theihnghilh rual loh chu, in chungah ka rawn thlen ang.”