Read Mizo_Old_version Jeremia 24 Bible Online

Jeremia 24 - Mizo_Old_version bible

Jeremia 24

¹Tin, LALPA chuan mi entîr a, ngai teh, theipui bâwm hnih LALPA biak in hmaah a lo inhûng a, Babulon lal Nebukadnezzaran Juda-te lal Jekonia, Jehoiakima fapa leh Juda hotute, mi themthiamte leh thîrdêngte nêna Jerusalem aṭanga Babulon sala a hruai hnu khân.

²Bâwm khatah chuan theipui ṭha tak, theipui hmin hmasa ang mai a awm a; bâwm dangah erawh chuan theipui chhe tak, ei tlâk loh khawpa chhia a awm a.

³Tin, LALPA chuan ka hnênah, “Eng nge i hmuh, Jeremia?” a ti a. Kei chuan, “Theipui, theipui ṭha, ṭha tak mai leh a chhia, ei tlâk loh khawpa chhia,” ka ti a.

⁴Tin, LALPA thu chu ka hnênah a lo thleng a:

⁵“LALPA, Israel-te Pathian chuan heti hian a ti: ‘Juda sal tângte, Kaldai-ho rama an ṭhatna tûra ka tirh chhuahte chu, hêng theipui ṭha ang hian ka en dâwn a ni.

⁶An ṭhat nân an chungah ka mit ka fûktîr ang a, he ramah hian ka hruai kîr leh ang; anmahni ka din ang a, ka ṭhiat lo vang; ka phun ang a, ka pawt lo vang.

⁷Tin, LALPA ka ni tih min hriat nân thinlung ka pe ang; ka mite an ni ang a, an Pathian ka ni ang; an thinlung zawng zawng nên ka hnênah an lo kîr dâwn si a.

⁸“ ‘Theipui chhia, ei tlâk loh khawpa chhia ang hian Juda-te lal Zedekia leh a hotute leh Jerusalem-a châmbâng, he rama la awmte leh Aigupta rama chêngte chu ka hawisan ngei ngei ang.

⁹Hrehawm taka lei chung ram zawng zawng zînga vawrh lân vawrh lân tûrin, ka hnawh bona zawng zawnga sawichhiat leh tehkhin leh hauh leh ânchhe lawh ni tûrin ka hluihlâwn ang.

¹⁰Anmahni leh an pate hnêna ka pêk ram ata hi lem zawh an nih thlengin an zîngah khandaih te, ṭâm te, hri te ka tîr ang,’ ” tiin.