Read Mizo_Old_version Jeremia 25 Bible Online

Jeremia 25 - Mizo_Old_version bible

Jeremia 25

¹Juda-te lal Jehoiakima, Josia fapa kum linaa Juda mite zawng zawng chungchânga Jeremia hnêna thu lo thleng chu: chumi hun chu Babulon lal Nebukadnezzara kum khatna a ni a,

²chu thu chu zâwlnei Jeremian Juda mi zawng zawng leh, Jerusalem-a awm zawngte hnêna a sawi chu a ni.

³“Kum sawmhnih leh kum thum chhûng ngawt, Juda-te lal Josia, Amona fapa kum sâwm leh kum thumna aṭanga tûn thlengin, LALPA thu chu a lo thleng ṭhîn a; zîng tak taka thovin in hnênah ka sawi ka sawi a; mahse, in ngaithla lo va.

⁴Tin, LALPAN in hnênah a rawngbâwltu zâwlneite zawng zawng a tîr a, zîng tak taka thovin a tîr a; mahse, in ngaithla lo va, hre tûrin in beng in dawh hek lo;

⁵chûng zâwlneite chuan, ‘Mi tin mahni sual kawng ata lo kîr ula, LALPAN in hnênah leh in pate hnêna hmânlai aṭanga kumkhua atâna a pêk che u ramah hian chêng rawh u.

⁶Pathian dangte hnêna an rawngbâwl tûr leh chibai bûk tûr leh, in kut hnathawha ka thin tiur tûrin kal suh u; tichuan, ka tina lo vang che u,’ an ti ṭhîn a.

⁷Mahse, in tâna ṭha lo tûra in kut hnathawha mi tithinur tûrin mi ngaithla lo,” LALPAN a ti.

⁸“Chuvângin, sipaihote LALPA chuan heti hian a ti: ‘Ka thu in ngaihthlâk loh avângin,

⁹ngai teh u, hmâr lam hnam zawng zawng chu ka chah ang,’ LALPA thuchhuak chuan a ti. ‘Ka rawngbâwltu, Babulon lal Nebukadnezzara pawh ka chah ang a, anni chu he ram leh a chhûnga awmte leh, hêng vêla hnam awm zawng zawngte bei tûrin ka rawn hruai ang a; ka tiboral dêr ang a, mak tihah leh chek khumah leh ṭiau reng atân ka siam ang.

¹⁰Tin, an hnên ata hlimna thâwm leh lâwmna thâwm te, moneitu aw leh mo aw te, buh râwt thâwm ri leh khâwnvâr êng te ka la bo vang.

¹¹He ram pum pui hi a chhia ang a, a ram ang; tin, hêng hnamte hian Babulon lal rawng kum sawmsarih an bâwl ang.

¹²Tin, kum sawmsarih a ral hunah Babulon lal leh chu hnam chu, Kaldai-ho ram chu, an sualna avângin ka hrem ang a; kumkhuain ka tiṭiau vang,’ LALPA thuchhuak chuan a ti.

¹³Chu ram chungah chuan ka thu an chunga ka sawi zawng zawng, Jeremian hnam zawng zawng chunga a sawi, he lehkhabua ziak zawng zawng hi ka thlentîr ang.

¹⁴Hnam hrang hrangte leh lal ropui tak takte chuan an zînga an mi duh an thing dâwn si a; an thiltih ang zêl leh an kut hnathawh ang zêlin ka thungrûl dâwn a ni.”

¹⁵ LALPA, Israel-te Pathian chuan ka hnênah heti hian a ti: “Ka kuta he thinurna uain no hi la la, ka tirhna tûr che hnam zawng chu intîr rawh.

¹⁶An in ang a, an pai thlawk thlawk ang a, an â ang, an hnêna ka tirh tûr khandaih avâng chuan,” tiin.

¹⁷Tin, LALPA kuta no chu ka la a, LALPAN mi tirhna hnam zawng chu ka intîr a;

¹⁸chûng chu hêngte hi an ni: Jerusalem leh Judai khawpui te, chuta lalte leh hotute chu, ṭiauna te, mak tihah te, chek khumah te, ânchhiaah te chang tûrin, tûna an awm dân ang hian;

¹⁹Aigupta lal Pharaoa leh a chhiahhlawhte, a hotute leh a mi zawng zawngte;

²⁰hnam dang pawlhtu zawng zawng te; Uz rama lal zawng te; Philistia rama lal zawng zawng, Askelon leh Gaza leh Ekron leh Asdod-a la awm chhun lalte chu;

²¹Edom leh Moab leh Amon thlahte;

²²Tura lal zawng zawngte leh Zidon lal zawng zawng leh tuipui kam lalte;

²³Dedan leh Tema leh Buz leh an bak sam mêt zawng zawngte;

²⁴Arabia lal zawng zawngte, thlalêra chêng hnam inchawhpawlhho lal zawng zawngte;

²⁵Zimri lal zawng zawngte, Elam lal zawng zawngte, Media lal zawng zawngte;

²⁶hmâr lam lal zawng zawngte, a hla leh a hnaia mi a indawt zêlin; lei chunga awm khawvêl lalram zawng zawngte chu; tin, an in hnuah chuan Sesak lalin a in ang.

²⁷“Tin, an hnênah, ‘Sipaihote LALPA, Israel-te Pathian chuan heti hian a ti: “In ula, rui ula, lua ula, tlu ula, tho leh suh u, khandaih in zînga ka tirh tûr avâng chuan,” ti ang che.’

²⁸“Tin, i kuta no chu in tûra an lâk duh loh chuan an hnênah heti hian ti ang che: ‘Sipaihote LALPA chuan heti hian a ti: “In in ngei ang!

²⁹Hei, ka hming vuah khawpuiah thil ṭha lo ka ti ṭan a, nangni hrem loh tawpin in awm ang maw? Hrem lohvin in awm lo vang, leilunga chêng zawng zawngte chungah khandaih ka lek dâwn si a,” tih hi sipaihote LALPA thuchhuak a ni.’

³⁰“Chuvângin, an chungah hêng hi sawi la, an hnênah heti hian ti rawh: ‘LALPA chu hmun sâng aṭangin a rûm ang, A chênna thianghlim aṭangin a râwl a chhuah ang; A huang chhûngah nasa takin a rûm ang. Grêp sâwrtute angin a au vang, Leilung luah zawng zawngte chungah chuan.

³¹Leilung tâwp thlengin thâwm a thangkhâwk ang a, LALPA chuan hnamte a khing a, tîsa zawng zawng chungah ro a rêl dâwn, Mi suaksual chu khandaih hnênah a pe ang,’ ” LALPA thuchhuak chuan a ti.

³²Sipaihote LALPA chuan heti hian a ti: “Ngai teh, thil ṭha lo chuan hnam tin a rawn hrût dâwn e, Thlipui na tak mai lei hmun tâwp aṭangin a lo thawk dâwn.

³³“Chumi nia LALPA thahte chuan lei tâwp aṭangin lei tâwp thlengin an dâp ang a; sûn loh leh khâwm loh leh phûm lohvin an awm ang a; lei chunga êkdûr mai an ni ang.

³⁴Berâmpute u, chiau vak vak ula, ṭap rawh u! Nangni berâm rual zînga puipate u, tâl tawp tawp rawh u! Thaha in awm ni leh in darhsarh nite a lo thleng takzet a nih hi; Bêl duhawm angin in tlu ang.

³⁵Berâmpute chuan tlân bona kawng an nei lo vang a, Berâm rual zînga puipate pawhin pumpelhna kawng an nei lo vang.

³⁶Berâmpute ṭap thâwm chu, Berâm rual zînga puipate chiau ri nên, LALPAN an tlat hmun a tihram mêk avângin.

³⁷Huang muanawmte chu tihreh ṭhiapin an awm ta e, LALPA thinrimna nasa tak avângin.

³⁸A tawmna a chhuahsan ta, sakeibaknei ang maiin. An ram chu a chhe zo ta si a, Hnehchhiahna râwng tak avâng Leh a thinrimna nasa tak avângin.”