Read Mizo_Old_version Jeremia 26 Bible Online

Jeremia 26 - Mizo_Old_version bible

Jeremia 26

¹Juda lal Josia fapa Jehoiakima lal ṭan tirhin he thu hi LALPA hnên ata a lo thleng a,

²“LALPA chuan heti hian a ti: LALPA in hung chhûngah ding la, Juda khawpui zawng zawng, Pathian be tûra LALPA ina lo kalte hnênah chuan, an hnêna sawi tûr thu ka pêk zawng zawng chu pakhat mah zêp lovin sawi vek rawh.

³Mi tinin an awm dân sual kalsanin an ngaithla mial mahna, an thil tihsual avânga an chunga thil ṭha lo tih ka tum chu ka lamlêt theih nân.

⁴“Tin, nangin an hnênah, ‘LALPA chuan heti hian a ti: “Mi ngaihthlâk lohva, ka dân in hmaa ka dah in zawm lohva,

⁵zîng taka thova tîrin, in hnêna ka tirh ka rawngbâwltu zâwlnei thu in bengkhawn loh chuan (in lo bengkhawn tawh si lo va),

⁶he in hi Silo angin ka siam ang a, lei chunga hnam zawng zawngte ânchhia dawng tûrin ka siam ang,” ’ ti ang che.”

⁷Tin, puithiamte, zâwlneite leh mipui zawng zawngte chuan LALPA ina Jeremian hêng thu a sawi hi an ngaithla a.

⁸Tin, heti hi a ni a, mipui zawng zawngte hnêna sawi tûra LALPAN thu a pêk zawng zawng chu a sawi zawhin, puithiamte, zâwlneite leh mipui zawng zawng chuan amah chu an man ta a. “I thi mawlh ang!

⁹Engah nge LALPA hming chhâla, ‘He in hi Silo ang a ni ang a, he khawpui hi luahtu awm lovin a ṭiau vang,’ tia i sawi ni?” an ti a. Tichuan, LALPA inah chuan mipui zawng zawng chuan Jeremia chu an bâwr ta huai huai a.

¹⁰Tin, Juda hotute chuan hêng thu hi an hriatin, lal in aṭangin LALPA in luhna kawngka tharah an ṭhu a.

¹¹Tin, puithiamte leh zâwlneite chuan hotute leh mipui zawng zawngte hnênah chuan, “He mi hi thi tlâk a ni! Khawpui chhiat tûr thu, in benga in hriat angin a sawi lâwk si a,” an ti a.

¹²Tin, hotute leh mipui zawng zawngte hnênah chuan Jeremia chuan, “In thu ngaihthlâk tâk zawng zawng ang khân, he in leh he khawpui chhiat tûr thu hi sawi tûrin LALPAN mi tîr a ni.

¹³Chuvângin, tûnah hian in awm dân leh in chêt dân siam ṭha ula, LALPA in Pathian thu chu awih rawh u; tichuan, LALPA chuan in chunga thil ṭha lo lo thleng tûr a puan tawh chu a lamlêt thei ang.

¹⁴Kei erawh chu hei, in kuta ka awm hi. Dik leh ṭha in tih ang angin mi ti rawh u.

¹⁵Mi tihhlum chuan, nangmahni leh he khawpui leh khua leh tuite chungah, mi thiam thisen in thlen ngei dâwn a ni tih hre mai rawh u; dik takin in benga hêng thu zawng zawng hi sawi tûrin LALPAN in hnênah mi tîr zuk nia,” a ti a.

¹⁶Tichuan, hotute leh mipuite chuan puithiamte leh zâwlneite hnênah chuan, “He mi hi thi tûr a ni lo ve, LALPA kan Pathian hminga kan hnêna thu sawi a nih hi,” an ti a.

¹⁷Tin, chumi rama upa tute emaw an lo ding a, mipui awm khâwmte hnênah chuan,

¹⁸“Mika, Moreseth mi chuan Juda lal Hezekia lal lai khân thu a sawi a; tin, Juda mi zawng zawngte hnênah chuan, ‘Sipaihote LALPA chuan heti hian a sawi: “Zion chu lo anga leh a ni ang a, Jerusalem chu thil chhe awm khâwm a ni ang, A in tlâng chu ramngaw hmun sâng ang a ni ang,” a ti a.’

¹⁹“Juda lal Hezekia leh Juda-te zawng zawng khân amah an tihlum em ni? LALPA hlauvin LALPA duhsakna chu an ngên a, LALPA chuan an chunga thil ṭha lo thleng tûr a puan chu a lamlêt ta a ni lo vem ni? Keini zawngin kan chungah thil ṭha lo kan thlen dâwn a nih hi.”

²⁰Tin, mi dang, LALPA hminga thu sawi Kiriath-jearim-a mi Semaia fapa Uria kha a awm bawk a, Jeremia thusawi zawng zawng ang bawkin he ram leh khawpui chhiat tûr thu hi a sawi a.

²¹Lal Jehoiakima leh a mi ropuite zawng zawng leh hotute zawng zawngin an hriatin, lal chuan tihhlum a tum a; mahse, Urian a hriatin a hlau va, a tlân bo va, Aigupta ramah a kal ta a.

²²Lal Jehoiakima chuan Aigupta ramah mi a tîr a, Akbora fapa Elnathana leh mi dangte.

²³Aigupta ram aṭangin Uria chu an hruai chhuak a, lal Jehoiakima hnênah an rawn hruai a, ani chuan khandaihin a that a, a ruang chu vântlâng thlânah an paih lût a.

²⁴Mahse, Saphana fapa Ahikama chuan, mipui hnêna tihhlum tûra an pêk loh nân Jeremia chu a ṭan a.