Read Mizo_Old_version Jeremia 27 Bible Online

Jeremia 27 - Mizo_Old_version bible

Jeremia 27

¹Juda lal Josia fapa Zedekia lal ṭan tirhin, LALPA hnên ata he thu hi a lo thleng a.

²LALPA chuan ka hnênah heti hian a ti: “Nghâwngkawlte leh a hruite siam la, i nghâwngah bât rawh.

³Tin, Edom lal te, Moab lal te, Amon mite lal te, Tura lal te, Zidon lal te hnênah, Juda lal Zedekia hnêna mi tirh Jerusalem-a lo kalte kutah thawn rawh.

⁴Hêng thu hi an pute hnênah sawitîr rawh: Heti hian Israel Pathian, sipaihote LALPA chuan a ti: ‘Hetiang hian in pute hnênah in sawi tûr a ni:

⁵Ka thiltihtheihna ropui tak leh ka bân pharin lei te, mihring te leh lei chunga sa te ka siam vek a, pêk âwm ka tihte hnênah chuan ka pe a.

⁶Tûnah pawh ka rawngbâwltu Babulon lal Nebukadnezzara kutah he ram zawng zawng hi ka pe tawh a ni; ramsate pawh ama rawng bâwl tûrin ka pe bawk a ni.

⁷A tlûkchhiat hun a thlen hma chuan, hnam zawng zawngin amah leh a fapate leh a fapaa fapate rawng an bâwl ang, chumi hnuah erawh chuan hnam tam takte leh lal ropui takte chuan amah chu bawihah an siam ang.

⁸“ ‘Tin, heti hi a ni ang a, Babulon lal Nebukadnezzara nghâwngkawl bât duh lo leh a rawngbâwl duh lo hnam leh lalna ram chu, khandaih leh ṭâm leh hripuiin, ama kuta ka tihboral vek hma zawng anmahni ka hrem zêl ang.

⁹Nangni erawh chuan in zâwlnei te, in aienthiam te, in mumang te, in chhamphual thiam te, in dawithiam te, in hnêna, “Babulon lal rawng in bâwl lo vang,” tia sawitute chu ngaithla suh u.

¹⁰In ram aṭanga hla taka hruai bova in awm theih nân, in hnênah dâwt thu an sawi lâwk a ni; ka hnawh chhuah che ua in boral phahna tûrin.

¹¹Amaherawhchu, Babulon lal nghâwngkawl bâta, a rawng bâwl duh hnam chu an ram ngaiah ka awmtîr ang a, lei an let ang a, chutah chuan an chêng reng ang,’ ” tih hi LALPA thuchhuak a ni.

¹²Tin, Juda lal Zedekia hnênah hêng thu zawng zawng ang zêl hian ka sawi a: “Babulon lal nghâwngkawl bât ula, amah leh a mite rawng bâwl ula, in nung dâwn nia.

¹³Babulon lal rawngbâwl duh lo hnam chungchâng LALPAN a sawi tawh ang khân engah nge khandaih te, ṭâm te, hripuitea nang leh i mite chu in thih ang le?

¹⁴Tin, zâwlnei, in hnêna, ‘Babulon lal rawngbâwl suh u,’ titute thu chu ngaithla suh u, in hnênah dâwt thu an sawi mai a ni si a.

¹⁵‘Ka tirh an ni si lo va, ka hming chhâlin dâwt thu an sawi zâwk ṭhîn, nangni leh in hnêna thusawitu zâwlneite chu ka hnawh chhuaha, in boral theih nân,’ ” LALPA chuan a ti.

¹⁶Puithiamte leh hêng mipuite zawng zawng hnênah pawh hian ka sawi bawk a: “LALPA chuan heti hian a sawi a ni: Zâwlnei in hnêna thusawitu, ‘Ngai rawh u, Babulon aṭangin LALPA in hlum bêlte chu rawn thlen a ni thuai dâwn e,’ titute thu chu ngaithla suh u, in hnênah dâwt an sawi a ni si a.

¹⁷Anmahni ngaithla hauh suh u; Babulon lal rawngbâwl ula, in nung dâwn nia. Engah nge he khawpui hi a chhiat ang le?

¹⁸Mahse, zâwlnei an niha, LALPA thu an hnêna awm a nih meuh chuan, LALPA in leh Juda lal in leh Jerusalem-a bungbêl hnutchhiaha la awmte chu, Babulon-ah thlen a nih loh nân sipaihote LALPA hnênah ngên ang hmiang.

¹⁹Sipaihote LALPA chuan, ban sâng te, dâr tuizêm te, a nghahchhante leh he khawpuia bungbêl hnutchhiaha awm chhunte,

²⁰Babulon lal Nebukadnezzaran Juda lal, Jehoiakima fapa, Jekonia leh Juda leh Jerusalem-a mi ṭha zawng zawng, Jerusalem aṭanga Babulon sala a hruai ṭuma a lâk bâng chungchâng thu heti hian a sawi a,

²¹a ni, sipaihote LALPA, Israel Pathian chuan LALPA in leh Juda lal in leh Jerusalem-a bungbêl hnutchhiaha la awm chungchâng thu a sawi a ni:

²²‘Babulon-ah lâk bo an ni ang a, anmahni ka rawn kan hma loh chuan chutah chuan an awm reng ang; tin, ka la leh ang a, he hmunah hian ka dah kîr leh ang,’ ” tih hi LALPA thuchhuak a ni.