Read Mizo_Old_version Jeremia 28 Bible Online

Jeremia 28 - Mizo_Old_version bible

Jeremia 28

¹Tin, heti hi a lo ni a, chumi kum vêk, Juda lal Zedekia lal ṭan tirh lam, a kum lina, thla nganaah chuan zâwlnei Hanania, Azura fapa, Gibeon mi chuan puithiamte leh mipui zawng zawng hmaah LALPA inah chuan mi bia a, ka hnênah,

²“Sipaihote LALPA, Israel Pathian chuan heti hian a ti: ‘Babulon lal nghâwngkawl chu ka titliak ta.

³Kum hnih pumhlûm chhûngin LALPA in bungbêl Babulon lal Nebukadnezzaran hemi hmun ata a lâka, Babulon thlenga a kalpui zawng zawng kha, he hmun ngeiah hian ka rawn thlen leh vek ang.

⁴He hmunah hian Juda lal Jehoiakima fapa, Jekonia leh Babulon-a kal Juda sal zawng zawng chu ka hruai kîr leh ang; Babulon lal nghâwngkawl chu ka titliak dâwn si a,’ tih hi LALPA thuchhuak a ni,” tiin.

⁵Tin, zâwlnei Jeremia chuan puithiamte leh LALPA ina ding mipui zawng zawng hmaah chuan zâwlnei Hanania hnênah,

⁶zâwlnei Jeremia ngei chuan, “Amen! LALPA chuan chutiangin ti tak rawh se; LALPA ina bungbêlte leh sal tânnaa mi zawng zawng, Babulon ata hemi hmuna rawn thlen tûra i sawi chu LALPA chuan ti ngei rawh se.

⁷Amaherawhchu, mipui zawng zawng leh nangma benga ka thusawi hi ngaithla rawh khai.

⁸Keimah leh nangma hmaah hmasâng zâwlneite chuan, ram tam takte chungah leh lalna ram ropui takte chungah indona te, thil ṭha lo te, leh hripui thu te an sawi ṭhîn a.

⁹Zâwlnei, muanna thu sawitu thusawi chu a lo thlen hunah, chu zâwlnei chu LALPA chuan a tîr ngei a ni tih a hriat mai ang chu,” a ti a.

¹⁰Tin, zâwlnei Hanania chuan nghâwngkawl, zâwlnei Jeremian a bah chu a la a, a titliak a.

¹¹Tin, mipui zawng zawng hmaah Hanania chuan, “Heti hian LALPA chuan a ti: ‘Hetiang ngei hian Babulon lal Nebukadnezzara nghâwngkawl chu, kum hnih pumhlûm chhûng ngeiin hnamte zawng zawng nghâwng ata ka titliak ang,’ tiin,” a ti a. Tin, zâwlnei Jeremia chuan a kalsan ta a.

¹²Tin, zâwlnei Hanania chuan zâwlnei Jeremia nghâwng ata nghâwngkawl a tihtliah hnuah chuan Jeremia hnênah LALPA thu a lo thleng a,

¹³“Kal la, Hanania hnênah heti hian va ti rawh, ‘Heti hian Lalpa chuan a ti: “Thing nghâwngkawl chu i titliak a, a aiah thîr nghâwngkawl i siamsak zâwk a nih hi.”

¹⁴Heti hian Israel Pathian, sipaihote LALPA chuan a ti si a: “Babulon lal Nebukadnezzara rawng an bâwl theih nân, hêng hnam zawng zawng hi thîr nghâwngkawl bahtîr a ni; ama rawng an bâwl ang. Ramhnuaia ramsate pawh amah ka pe bawk a ni,” ’ ” tiin.

¹⁵Tin, zâwlnei Jeremia chuan zâwlnei Hanania hnênah, “Ngai rawh, Hanani, LALPAN a tîr awzâwng lo che; hêng mite hi dâwt i rintîr mai a nih zâwk hi.

¹⁶Chuvângin, heti hian LALPA chuan a ti: ‘Ngai teh, lei chung ata hi ka tibo daih ang che. LALPA laka helna thu i sawi avângin kumin ngeiah hian i thi ang,’ ” a ti a.

¹⁷Tichuan, chumi kum vêk, thla sarihnaah chuan zâwlnei Hanania chu a thi ta a.