Read Mizo_Old_version Jeremia 29 Bible Online

Jeremia 29 - Mizo_Old_version bible

Jeremia 29

¹Tin, zâwlnei Jeremian Jerusalem aṭanga sal tâng upate, puithiamte, zâwlneite, mi dangte, Nebukadnezzaran Jerusalem aṭanga Babulon-a a hruai tâk, la dam chhunte hnêna a lehkhathawn thu chu hêng hi a ni.

²(Lal Jekonia te, lalnu te, mi tilreh te, Juda leh Jerusalem hotu te, mi themthiam te, thîrdêngten Jerusalem an chhuahsan hnu khân.)

³Saphana fapa Elasa leh Hilkia fapa Gemaria-te kutah a thawn a ni (chûngte chu Juda lal Zedekian Babulon ramah Babulon lal Nebukadnezzara hnêna a tirhte chu an ni):

⁴Israel Pathian, sipaihote LALPA chuan sal tâng zawng zawng, Jerusalem aṭanga Babulon sala ka hruaitîr tâkteho hnênah heti hian a ti:

⁵“Inte sa ula, chutah chuan chêng ula; huante siam ula, a rahte ei ula;

⁶nupuite nei ula, fanute, fapate hring ula; in fapate tân nupui neihsak ula, in fanute pasal neihtîr ula, fanu fapa an hrin theih nân; chutah chuan lo pung ula, kiam lam pan suh u.

⁷Sala ka tântîrna che u khawpui ṭhatna tûr zawng ula, LALPA hnênah dîlsak rawh u; ama ṭhatna chuan nangni pawhin ṭhatna in hmu dâwn si a.”

⁸Israel Pathian, sipaihote LALPA chuan heti hian a ti: “In zîngah zâwlneite leh aienthiamte chuan bum che u suh sela, an mumang an man pawh chu ngaithla hek suh u.

⁹Ka hming chhâlin dâwt thu in hnênah an sawi a ni e; keima tirh an ni lo ve,” tih hi LALPA thuchhuak a ni.

¹⁰ LALPA chuan heti hian a ti si a: “Babulon tân kum sawmsarih chu a kin veleh ka rawn kan ang che u a, in hnêna ka thutiam ṭha tak chu ka hlen ang a, he hmunah hian ka kîrtîr leh ang che u.

¹¹Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna ka ngaihtuah asin.

¹²Tin, min lam ang a, ka hnênah in rawn ṭawngṭai ang a, ka ngaithla ang che u.

¹³Min zawng ang a, in thinlung zawng zawnga min zawn hunah min hmu ang.

¹⁴Nangmahni hmuhin ka awm ang,” Lalpa thuchhuak chuan a ti, “In awm dân ka let ang a, hnam zawng zawng zînga ka tihdarhna che u hmun ata ka hruai khâwm leh ang che u,” tih hi LALPA thuchhuak a ni, “Sala ka mantîrna che u hmun ngeiah khân ka rawn thlen leh ang che u.”

¹⁵“LALPA chuan Babulon ramah pawh hian zâwlnei min dinsak a,” in ti si a.

¹⁶LALPA chuan Davida ṭhutphaha lal chungchâng thu leh, he khawpuia chêng mipui zawng zawng, sala hruai tel loh, in unaute chungchâng thu-ah chuan heti hian a ti si a:

¹⁷Sipaihote LALPA chuan heti hian a ti: “Ngai rawh u, an chungah chuan khandaih te, ṭâm te, hripui te ka rawn thlen ang a, theipui hût, a chhiat êm êm avânga ei tlâk tawp loh ang maiin ka siam ang.

¹⁸Tin, khandaih te, ṭâm te, hripui tein ka ûm zui ang a, lei chunga lalna ram zawng zawngte zîngah thil râpthlâk takah ka siam ang a, anmahni ka tihdarhna hnam zawng zawngte zîngah chuan ânchhe dawngah, mak tih huai huaiah, chek khum tlawk tlawka sawichhiat ni tûrin ka siam ang.

¹⁹Zîng takah thovin ka rawngbâwltu, zâwlneite hmanga ka thu in hnêna ka rawn thlen chu an pawisak loh avângin,” LALPA thuchhuak chuan a ti: “In ngaithla duh si lo,” tih hi LALPA thuchhuak a ni.

²⁰Chuvângin, nangni Jerusalem aṭanga Babulon-a ka tirh, sal tâng zawng zawngte u, LALPA thu chu ngaithla rawh u.

²¹Israel Pathian, sipaihote LALPA chuan Kolaia fapa Ahaba leh Maaseia fapa Zedekia, ka hming chhâla in hnêna dâwt thu sawitute chungchâng thu-ah chuan heti hian a ti: “Ngai rawh u, Babulon lal Nebukadnezzara kutah ka mantîr dâwn e; in mit hmuh ngeiah a that ang.

²²Anmahni thu-ah chuan Babulon rama Juda sal tâng zawng zawng chuan, ‘Babulon lalin meia a rawh Zedekia leh Ahaba ang mai khân LALPAN i chungah ti rawh se,’ tih hi ânchhe lawh fungah an chîn phah ang.

²³Israel ramah chuan thil âtthlâk tak an tiha, an ṭhenawm nupuite an uirea, ka hming chhâlin ka thupêk lohva dâwt thu an sawi avângin; kei a hretu leh a hriatpuitu ka ni e,” tih hi LALPA thuchhuak a ni.

²⁴Nehelam mi, Semaia chungchang thu-ah chuan nangin heti hian i sawi tûr a ni,

²⁵“Israel Pathian, sipaihote LALPA chuan heti hian a sawi a: Jerusalem mipui zawng zawng hnênah te, Maaseia fapa zâwlnei Zephania leh zâwlnei zawng zawng hnênah te, nangma hming ngeiin lehkha i thawn a,

²⁶‘LALPA chuan puithiam Jehoiada aiah puithiamah a siam che a, LALPA in vêngtu in ni a, mi â zâwlnei inti apiangte chu kawlte, thîrkawlte i buntîr tûr a ni a.

²⁷Tichuan, engah nge Anathoth khuaa mi Jeremia, in hnêna zâwlnei inti chu in zilh loh?

²⁸Babulon ramah kan hnênah: Sal tân hun tûr chu a rei dâwn a. Chuvângin, inte sa ula, chutah chuan chêng ula; huante siam ula, a rahte ei rawh u, tih thu min thawn a ni,’ ” tiin.

²⁹Puithiam Zephania chuan chumi lehkha chu zâwlnei Jeremia hriatah a chhiar a:

³⁰Jeremia hnênah LALPA thu a lo thleng a:

³¹“Sal tângho zawng zawng hnênah chuan Nehelam mi Semaia chungchâng thu-ah chuan LALPAN heti hian a ti: ‘Ka tirh hauh lohvin Semaian in hnênah thu a sawi a, dâwt thu a rintîr che a;

³²chuvângin, LALPAN heti hian a ti: Ngai rawh u, Nehelam mi Semaia leh a thlahte chu ka hrem ang a, hêng mite zîngah mi pakhat mah a nei lo vang a, ka mite tâna thil ṭha ka tih tûr chu a hmu hek lo vang; LALPA chungah helna thu a sawi avângin, tih hi LALPA thuchhuak a ni,’ tiin thawn rawh,” a ti a.