Read Mizo_Old_version Jeremia 30 Bible Online

Jeremia 30 - Mizo_Old_version bible

Jeremia 30

¹Jeremia hnêna LALPA thu lo thleng chu,

²“LALPA, Israel-te Pathian chuan heti hian a ti: ‘I hnêna ka thusawi tâk zawng zawng kha lehkhabuah ziak rawh.

³Ngai rawh, ka mi Israel leh Juda-te ka hruai kîr nite chu a lo thleng mêk e; ram, an thlahtute hnêna ka pêkah chuan ka hruai kîr ang a, an luah tawh ang,’ tih hi LALPA thuchhuak a ni,” LALPAN a ti.

⁴Tin, Juda leh Israel chungchâng thua LALPA thusawite chu hêngte hi a ni.

⁵“LALPA chuan heti hian a ti a ni: ‘Thlaphâng thâwm kan hria, hlauva au thâwm, Muanna ni lovin.

⁶Zâwt vêl ula, en vêl teh u, mipain nau an vei ngai em? Engati nge hmeichhe nau vei ang renga, Mipate hian an tai an dawm ṭheuhva, An hmêlte a lo dân zawh tâk?

⁷Ehei! Chumi ni chu a ropui mang e, Chu ang rêng chu a awm lo. Jakoba manganna ni a ni ngei mai; Mahse, chhanchhuahin a awm tho vang.

⁸“ ‘Tin, chumi niah chuan heti hi a ni ang a, a nghâwngkawl bah chu ka titliak ang a, a hrui chu ka tichat ang; awze mite chuan amah chu rawngbâwltuah an hmang ngai tawh lo vang.

⁹LALPA an Pathian leh an lal atâna ka tundin tûr Davida rawng an bâwl zâwk ang.

¹⁰“ ‘Chuvângin, aw ka rawngbâwltu Jakob, Hlau hauh suh, aw Israel, zâm hek suh,’ Tih hi Lalpa thuchhuak a ni. ‘Ngai rawh, hla tak ata ka chhanchhuak ang chia, An sal tânna ata i thlahte ngei chu. Tin, Jakoba chu a kîr leh ang a, Tu mân an tihlau tawh ngai lo vang.

¹¹Chhan tûr chein i hnênah ka awm reng si a, Ka tihdarhna che hnam zawng zawng chu, Ka titâwp ang a, nang erawh chu titâwp lovin. A tâwk lekin ka hrem ang chia, Hrem loh chuan i chhuak tawp lo vang,’ Tih hi LALPA thuchhuak a ni.

¹² LALPA chuan heti hian a ti si a, ‘I hliam chu tihdam rual a ni lo va, I pân chu a nasa a ni.

¹³Ṭanpui tûr che an awm lo va, I damna tûr damdawi a awm hek lo.

¹⁴A ngainatu che chuan an theihnghilh tawh chia; An ngaihsak tawh lo che; Hmêlma hliamin ka hliam ta chia, Dîm lo tawpin ka hrem chia, I khawlohna a nasa a, I thil tihsualte a pun avângin.

¹⁵Engah nge i hliam vânga i ṭah? I nâ chu tihdam rual a ni lo ve. I khawlohna a nasa a, I thil tihsualte a pun vângin, Hêng thil hi i chungah ka ti a nih hi.

¹⁶Amaherawhchu, a eiraltu che zawng zawng chu, Ei ralin an awm ang a; I hmêlma zawng zawng chu mi tin mai, Sala hruaiin an awm ang; A rawktu che chu rawkin an awm ang a, Râllâka latu zawng zawng che chu râllâk atân ka pe ang.

¹⁷Ka tihrisêl leh ang chia, I hliam zawng zawng chu ka tidam ang,’ LALPA thuchhuak chuan a ti; ‘Hnawh chhuah an vuah chia, “Tu ma ngaihsak loh Zion a nih hi,” ’ an tih che avângin.

¹⁸ LALPA chuan heti hian a ti: ‘Ngai rawh, Jakoba puan in, sala tângte chu, ka hruai kîr ang, A chênna hmunte ka khawngaih ang; A khawpui chu a awmna mual ngaiah chuan sak a ni ang a, A lal in chu a awm dân pângngaiin a ding leh ang.

¹⁹Lâwm thu sawina leh hlim thâwmte chu, Chûng aṭang chuan a lo chhuak ang. A mi chu ka tipung ang a, an tlêm tham lo vang; Anni chu ka tiropui ang a, an tênau lo vang.

²⁰An fate pawh tûn hma angin an awm ang a, Ka hmaah an pung khâwmin an nghet ang a; Anmahni hnehchhiahtute tawh phawt chu ka hrem zêl ang.

²¹An hotu chu anmahni mi ngei a ni ang a, An rorêltu chu anmahni zînga lo chhuak ngei a ni ang; Amah chu mi rawn hnaih tûrin ka ti ang a, Ani chuan mi rawn hnaih ang; Mahni thuin tu nge mi rawn hnaih ngam hlei ang?’ Tih hi LALPA thuchhuak a ni.

²²‘Tin, ka mite in ni ang a, Kei in Pathian ka ni ang.’ ”

²³Ngai rawh u, LALPA thlipui, a thinurna thlipui na tak mai chu a chhuak ta! Mi suaksualte lû chu a nuai nek ang.

²⁴A thinlung tumnate a hlena a tih zawh hma loh chuan, LALPA thinurna hlauhawm tak mai chu a lamlêt lo vang. Ni hnuhnûngahte chuan in la hre thiam ang.