Read Mizo_Old_version Jeremia 32 Bible Online

Jeremia 32 - Mizo_Old_version bible

Jeremia 32

¹Juda lal Zedekia kum sâwmna, Nebukadnezzara kum sâwm leh kum riatnaa Jeremia hnêna LALPA thu lo thleng chu.

²Chumi lai chuan Babulon lal sipai rual chuan Jerusalem an hual a; tin, zâwlnei Jeremia chu Juda lal in vêngtu hung chhûngah a tâng a ni.

³Juda lal Zedekia chuan, “Engah nge, ‘LALPA chuan heti hian a ti: “Ngai rawh, hemi khawpui hi Babulon lal kutah ka pe ang a, a la ang;

⁴Juda lal Zedekia pawh Kaldai mite kut ata a chhuak lo vang a, Babulon lal kuta mantîrin a awm ngei zawk ang a, inhmachhawnin an inbia ang a, a mit ngeiin a hmêl a hmu ang;

⁵tin, Zedekia chu Babulon ramah a hruai ang a, amah ka tlawh hma loh chuan chutah chuan a awm reng ang; Kaldaite chu do mah ula in hlawhtling lo vang,” tih hi LALPA thuchhuak a ni,’ tia i sawi ni?” tiin a tântîr a ni.

⁶Tin, Jeremia chuan, “LALPA thu chu ka hnênah a lo thleng a:

⁷Ngai rawh, i pami Saluma fapa Hanamela chu, ‘Anathoth khuaa ka lo chu i tân lei rawh; ro khâwm thei i nih avângin mi leisak tûr a ni e,’ tiin i hnênah a lo kal ang,” tiin.

⁸Tichuan, ka pami fapa Hanamela chu LALPA thu ang zêlin vêngtu hung chhûngah chuan ka hnênah a lo kal a, ka hnênah, “Benjamin rama Anathoth khuaa ka lo chu mi leisak ta che, ro khâwm thei i nih avângin i tlan tûr a ni, i tân lei mai rawh,” a ti a. Tichuan, hei hi LALPA thu kha a ni tih ka hre ta a.

⁹Tin, ka pami fapa Hanamela, Anathoth khuaa mi lo chu ka lei ta a, tangka chu ka han bûksak a, tangkarua sekel sâwm leh pasarih zet a ni.

¹⁰Tin, lehkha ka ziak a, ka châr a, hretute ka ko va, tangka chu bûknaah ka khai a.

¹¹Tin, inleina lehkha, inlei dân leh a awmzia ziakna, châr leh châr lohte chu ka la a.

¹²Tin, ka pami fapa Hanamela mit hmuhah leh hretu leinaa hming chuang vete mit hmuhah leh, vêngtu hung chhûnga Juda ṭhu zawng zawng hmaah chuan, Maaseia fapa Neria fapa Baruka chu thu ka pe a.

¹³Tin, Baruka chu an hmaah thu ka pe a,

¹⁴“Israel Pathian, sipaihote LALPA chuan heti hian a ti: Hêng lehkha, leina lehkha, châr leh châr lohte hi la la, hlum bêlah dah la, a awm rei theih nân.

¹⁵Israel Pathian, sipaihote LALPA chuan heti hian a ti si a: ‘He ramah hian inte, lote, grêp huante miten an la lei leh ang,’ ” tiin.

¹⁶Tin, Neria fapa Baruka hnêna leina lehkha ka hlan hnuah chuan LALPA hnênah ka ṭawngṭai a,

¹⁷“Aw Lalpa PATHIAN, ngai rawh, i thiltihtheihna nasa leh i kut pharin lei leh vân i siam a; i tân thiltih harsa lutuk a awm rêng rêng lo.

¹⁸Sâng tam takte hnêna khawngaihna vûr ṭhîntu, leh pate khawlohna an hnua an fate chunga thungrûltu, Pathian ropui leh thiltithei, a hming sipaihote LALPA,

¹⁹remruat thiam tak, thiltithei tak, mihring fate awm dân zawng zawng hmu chiangtu, mi tin an awm dân leh an thiltih ang zêla rûltu;

²⁰Aigupta rama chhinchhiahna leh thil mak titu, vawiin thlenga Israel-ah leh mi dang zînga ti zêltu, vawiin ang renga mahni hming tilangtu,

²¹i mi Israel-te Aigupta ram ata chhinchhiahna te, thil mak te, kut chak leh bân phar leh thil râpthlâk nasa taka hruai chhuaktu,

²²he khawizû leh hnutetui luang ram an thlahtute hnêna chhechhama pêk tiama petu chu i ni.

²³An lo lût a, an luah vek a; mahse, i awkâ an awih lo va, i dân an zâwm hek lo. Tih tûra i pêk rêng rêng an ti lo va; chuvângin, hêng thil ṭha lo zawng zawng hi an chungah i thlentîr a nih hi.

²⁴En teh, khawpui lâkna tûr lei chhûn pâwnte a lo awm tâk hi! Khandaih te, ṭâm te, hripui te avângin khawpui pawh chu a beitu Kaldaite kutah pêk a ni ta. I sawi tawh chu a lo thleng ta; en teh, i hmuh tâk hi.

²⁵Aw, Lalpa PATHIAN, nangin ka hnênah, ‘Lo chu tangkain lei la, thuhretute ko rawh,’ i ti a, khawpui erawh zawng Kaldaite kutah pêk a ni ta a ni,” tiin.

²⁶Tin, LALPA thu Jeremia hnênah a lo thleng a,

²⁷“Ngai rawh, kei LALPA hi tîsa nei zawng zawngte Pathian ka ni a, ka tân harsa lutuk a awm em ni?” tiin.

²⁸“Chuvângin, LALPA chuan heti hian a ti: ‘Ngai rawh, he khawpui hi Kaldaite kutah leh Babulon lal Nebukadnezzara kutah ka pe ang a, a la ang.

²⁹Tin, hemi khawpui beitu Kaldaite hi an lo kal ang a, he khawpui hi an hâl ang a, a kâng ang, mi tithinur tûra Baala hnêna rimtui hlanna, pathian dangte hnêna in tûr hlan leih chhuahna in chung nei in zawng zawngte nên.

³⁰Israel fate leh Juda fate chuan an tleirâwl têt ata ka mit hmuhah thil ṭha lo hlîr an ti si a. Israel fate chuan an kut hnathawhte chuan mi tithinur mai a ni,’ tih hi LALPA thuchhuak a ni.

³¹‘He khawpui hi an sak tirh ata tûn thlengin mi tithinurtu leh mi tithinrimtu a ni reng si a, ka hma ata ka tihbo daihna tûrin;

³²Israel fate leh Juda fate mi tithinur tûra an thil ṭha lo tih tâkte zawng zawng avângin, anmahni, an lalte, an hotute, an puithiamte, an zâwlneite, Juda mite Jerusalem luahtu zawng zawngte nên.

³³Ka lam hawi lovin an tukkhum chhah mi chhawn a, ngun taka beiin zirtîr tawh mah ila, zirtîrna chu dawngsawng tûrin an bengkhawn si lo.

³⁴Ka hming chuanna in chu tibawrhbâng tûrin an thil tenawmte an dah zâwk a.

³⁵Tin, Ben-hinom ruama mi Baala biakna hmun sângte chu an din a, an fanute, an fapate Moleka hnêna meia an paihna tûrin Juda-ho thil sual tihtîr tûra he tenawmna an tih hi ka thupêk a ni hauh lo va, ka rilruah pawh a lût ngai hek lo.’

³⁶“Chuvângin, tûnah zawng LALPA, Israel Pathian chuan he khawpui, ‘Khandaih te, ṭâm te, hripui tein Babulon lal kutah pêk a ni tawh,’ in tih ṭhin thu-ah chuan heti hian a ti:

³⁷‘Ngai teh, ka thinrimna te, ka lungnih lohna te, ka thinurna nasa tak tea anmahni ka hnawh bona ram zawng zawng ata ka hruai khâwm ang a, he hmunah hian ka rawn thlen ang a, him takin ka awmtîr tawh ang.

³⁸Tin, ka mite an ni ang a, kei an Pathian ka ni ang.

³⁹Kumkhuaa mi ṭih hlen theih nân thinlung hmun khat leh awm dân hmun khat ka siamsak ang, anmahni leh an hnua an fate ṭhatna tûrin.

⁴⁰Tin, an hnênah kumkhaw thuthlung ka siam ang a, anmahni hawisan lovin, an ṭhatna ka ti fo vang; mi hransan loh nân an thinlungahte chuan mi ṭihna ka dah ang.

⁴¹A ni, an ṭhatna tih chu ka lâwm zâwng a ni ang a, ka thinlung zawng zawngin he ramah hian ka phun nghet ngei ang.’

⁴²LALPA chuan heti hian a ti a ni: ‘He mite chunga thil ṭha lo nasa tak ka thlen ang ngei khân, anmahni hnêna thil ṭha ka tiam zawng zawngte chu ka thlen ngei ang.

⁴³“Ram ṭiau, Kaldaite kuta pêk tawh, mi leh sa awm tawh lo,” in tih ramah hian lote an inlei leh dâwn a ni.

⁴⁴Benjamina ramah te, Jerusalem khawpui vêl hmunah te, Judai ram khawpuiah te, tlâng ram khawpuiah te, phai ram khawpuiah te leh chhim lam khawpuiahte chuan miten tangkain lo an lei ang a, leina lehkha an ziak ang a, an châr ang a, hretute an ko vang; an awm dân ka lamlêt dâwn si a,’ tih hi LALPA thuchhuak a ni.”