Read Mizo_Old_version Jeremia 33 Bible Online

Jeremia 33 - Mizo_Old_version bible

Jeremia 33

¹Tin, Jeremia hnênah, vêngtu hung chhûnga a la awm laiin, LALPA thu chu vawi hnihnaah a lo thleng leh a,

²“Thiltitu LALPA, nghet tûra siamtu LALPA (LALPA chu a hming a ni) chuan heti hian a ti:

³‘Mi au la, ka chhâng ang che, thil ropui leh inthup i hriat ngai loh chu ka entîr ang che.’

⁴Israel Pathian, LALPA chuan he khawpui inte leh Juda lal inte, khandaih leh lei chhûn pâwnte laka vênna siam tûra an ṭhiat chhiat chungchâng thu-ah chuan heti hian a ti:

⁵‘Kaldai-ho bei tûrin an lo kal a, ka thinur leh thinrimnaa ka thah ruangte chuan an tikhat zâwk dâwn, an sualna zawng zawng avângin he khawpui lakah hian ka hmêl ka lo thup tawh si a.

⁶Ngai rawh, damna leh hrisêlna ka rawn thlen ang; ka tidam ang a, muanna leh himna nghet tak ka hmuhtîr ang.

⁷Tin, Juda awm dân leh Israel awm dân ka lamlêt ang a, a tîra ka din ang khân ka din leh ang.

⁸Tin, an khawlohna, ka chunga an thil tihsualna lak ata ka tlêng fai ang a, an khawlohna, ka chunga an thil tihsualna leh ka chunga an bawhchhiatnate zawng zawng chu ka ngaidam ang.

⁹Tin, he khawpui hi leia hnam zawng zawng, an tâna ka tihṭhat zawng zawng hmutute hmaah chuan ka tân hlimna te, chawimawina te, ropuina te a ni ang a; ṭhatna leh muanna an chunga ka thlen zawng zawng avângin hlauvin an khûr ang.’

¹⁰LALPA chuan heti hian a ti: ‘He hmun, “Juda khawpui meuh pawh mi leh sa awm tawh lova ṭiau, Jerusalem kawtthlêr mi leh sa leh luahtu awm lova ram tawh” an tihah hian,

¹¹hlimna aw te, moneitu aw te, mo aw te, “Sipaihote LALPA hnênah chuan lâwm thu hril rawh u, LALPA chu a ṭha si a, a ngilneihna chu kumkhuain a awm dâwn si,” titute aw leh, LALPA ina lâwmna inthawina rawn kengtute aw chu an la hre leh ang. A tîra a awm dân angin ram chu ka awmtîr ang,’ tih hi LALPA thuchhuak a ni.

¹²“Sipaihote LALPA chuan heti hian a ti: ‘He hmun, mi leh sa awm lo khawpa ṭiau tawh leh a khawpui zawng zawngah hian, berâmpu an berâm rual bawhtîrtute chênna hmun a la awm leh ang.

¹³Tlâng ram khawpuiah te, phai ram khawpuiah te, chhim lam khawpuiah te, Benjamina ramah te, Jerusalem vêl hmunah te, Juda khawpuiah te, an chhiartu kut hnuaiah chuan berâmte an kal zung zung ang,’ tih hi LALPA thuchhuak a ni.

¹⁴“ ‘Ngai rawh, nite chu a lo thleng mêk e,’ tih hi LALPA thuchhuak a ni, ‘Israel chhûngte chungchângah leh Juda chhûngte chungchânga thu ṭha tak ka lo sawi tawh chu ka hlen ang.

¹⁵Chûng niahte leh chumi hunah chuan felna Chawrno Juda hnênah ka chhuahtîr ang, chu ramah chuan dik tak leh fel takin ro a rêl ang.

¹⁶Chûng niahte chuan Juda chu chhanhimin a awm ang a, Jerusalem chu him takin a awm ang: tin, a hming put tûr chu hei hi a ni ang: LALPA chu kan felna, tih hi.’

¹⁷“LALPA chuan heti hian a ti a ni: ‘Davida chuan Israel chhûngte lalṭhutthlênga ṭhu tûr mi a hmai ngai lo vang;

¹⁸puithiam, Levia chite pawhin ka hmaa hâlral inthawi hlân tûr leh, buhbâl thil hlân tûr leh, inthawi zêl tûrin mi an hmai hek lo vang.’ ”

¹⁹Tin, LALPA thu chu Jeremia hnênah a lo thleng a:

²⁰“LALPA chuan heti hian a ti: ‘Ka chhûn ruat leh ka zân ruat thu hi in phelh theiha, chhûn leh zân hi an hun taka awm lo tûra in tih theih chuan,

²¹ka rawngbâwltu Davida hnêna ka thuthlung pawh, a lalṭhutthlênga ṭhu tûr fapa a neih loh nân tihchhiat a ni ve chauh vang; Levia chite, puithiamte, ka rawngbâwltute hnêna mi pawh.

²²Vâna awmho chhiar sên loh leh tuipuia ṭiau chhiar sên loh ang maiin, ka rawngbâwltu Davida thlah leh Levia chi rawng mi bâwlsaktute chu ka tipung ang.’ ”

²³ LALPA thu chu Jeremia hnênah a lo thleng a:

²⁴“ ‘Chhûngkaw hnih LALPAN a thlante chu a paih bo ta,’ tia he miten an sawi chu i ngaihtuah ngai lo vem ni? An mit hmuha hnam tih tham an nih loh nân hetiangin ka mite chu an hmusit a ni.

²⁵LALPA chuan heti hian a ti: ‘Ka chhûn leh zân thuruat chu a din hlen lohva, lei leh vân awm dânte hi ka ruat lo a nih chuan,

²⁶Jakoba thlahte leh ka rawngbâwltu Davida thlahte chu ka paih bo vang, Abrahama te, Isaaka te, Jakoba thlahte chunga rorêltuah a thlah ka la bo vang. An awm dânte ka lamlêtsakin, an chungah khawngaihna ka nei dâwn si a.’ ”