Read Mizo_Old_version Jeremia 34 Bible Online

Jeremia 34 - Mizo_Old_version bible

Jeremia 34

¹Babulon lal Nebukadnezzara te, a sipai rual zawng zawng te, ama thuhnuaia lei lalna ram zawng zawngte leh mipui zawng zawngten, Jerusalem leh a khawpui zawng zawngte an beih laia LALPA hnên ata Jeremia hnêna thu lo thleng chu:

²“Israel Pathian, LALPA chuan heti hian a ti: Juda lal Zedekia va bia la, heti hian hrilh rawh, ‘LALPA chuan heti hian a ti: Ngai rawh, he khawpui hi Babulon lal kutah ka pe ang a, meiin a hâl ang.

³A kut ata i chhuak tawp lo vang; man i ni ang a, a kutah an pe ang che; i mit ngeiin Babulon lal chu i hmu ang a, ṭawngka ngeiin in inbia ang a, Babulon ramah i kal ngei ang.

⁴“ ‘Amaherawhchu, aw Juda lal Zedekia, LALPA thu hi ngaithla zêl teh! I chungchâng thu-ah chuan LALPA chuan heti hian a ti: Khandaihin i thi lo vang a,

⁵muang takin a nia i thih ang; i hmaa lal hmasa, i thlahtute rimtui an hâlsak ang khân nang pawh an hâlsak ang che; an sûn ang chia, “Ehei, ka pu!” tiin. Thu ka thlah tawh hi, tih hi LALPA thuchhuak a ni,’ ” tiin.

⁶Tin, zâwlnei Jeremia chuan hêng thu zawng zawng hi Jerusalem-a Juda lal Zedekia hnênah a sawi a,

⁷Babulon lal sipai rualte chuan Jerusalem leh Juda khawpui la awm zawng zawng, Lakis leh Azeka an beih lai chuan; Juda khawpui zînga kulh neite chu hêngte chauh hi an ni tawh si a.

⁸Lal Zedekian Jerusalem-a awm mipui zawng zawngte hnênah, “Mi tinin an chhiahhlawhnu te, an chhiahhlawhpa te, Hebrai nu emaw, Hebrai pa emaw an nih chuan, an chhuah tûr a ni; a unaupa Hebrai mi rawngbâwlsakin tu mah an awm tûr a ni lo,” tia zalênna thu a puana thuthlung a siam hnua LALPA hnên ata Jeremia hnêna thu lo thleng chu:

¹⁰mi tinin rawngbâwltunu emaw, rawngbâwltupa emaw a chhuah tûr a ni a, anmahni rawngbâwlsakin tu mah an awm tûr a ni lo, tih thuthlung pawmtu hotu zawng zawng leh mipui zawng zawngte chuan thuthlung chu an awih a, an chhuahtîr ta ngei a;

¹¹amaherawhchu, chumi hnuah chuan an inlamlêt a, an rawngbâwltunu leh an rawngbâwltupa an chhuahtîr tawhte chu an hnûk kîr a, an thuhnuaiah rawngbâwltuah an dah leh a.

¹²Chuvângin, Jeremia hnênah LALPA thu chu a lo thleng leh a;

¹³“LALPA, Israel Pathian chuan heti hian a ti: ‘Aigupta ram, bawih tânna ram ata ka hruai chhuah ni khân in thlahtute hnênah thuthlung ka siam a.

¹⁴“Mi tinin a unaupa, Hebrai mi, a hnêna hralh tawh, kum ruk a rawng lo bâwl tawh chu, a kum sarihna tâwpah chuan a chhuah tûr a ni,” tiin. In thlahtute erawh chuan min ngaithla lo va, an beng an dawh hek lo.

¹⁵Tûnah nangnin, in lo inlamlêt a, mi tinin a ṭhenawmpa hnêna zalênna thu puangin ka mit hmuhah thil dik chu in lo ti ta a; ka hming vuah inah chuan ka hmaah thuthlung in lo siam ta a.

¹⁶Mahse, in inlamlêt leh a, ka hming in tibawrhbângin, an duh ang taka in chhuah tawh hnu, in chhiahhlawhnu leh in chhiahhlawhpa chu in hruai kîr leh a, in thuhnuaiah rawngbâwltuah leh chhiahhlawhah te in dah leh a.’

¹⁷Chuvângin, LALPA chuan heti hian a ti: ‘Mi tinin mahni unau leh mahni ṭhenawm hnêna zalênna thu puang tûrin ka thu in ngaithla lo va; ngai rawh u, keiin in hnênah zalênna thu ka puang e,’ tih hi LALPA thuchhuak a ni: ‘Khandaih te, hripui te, ṭâm tein a ni ang; leia lalramte zawng zawng zîngah vawrh lân vawrh lân tûrin ka siam ang che u.

¹⁸Tin, ka thuthlung bawhchhiate, ka hmaa bâwngno zai phel kâra kal tlang meuhva thu tiama hlen lotu:

¹⁹Juda hotute leh Jerusalem hotute, mi tilrehte, puithiamte, mipui zawng zawng, bâwngno zai phel kâra kalte chu;

²⁰an hmêlmate leh an nunna zawngtute kutah ka pe ang. An ruangte chu chunglêng savate leh leia ramsate chaw atân mai a ni ang.

²¹Tin, Juda lal Zedekia leh a hote chu an hmêlmate leh an nunna zawngtute leh Babulon lal sipai rual, nangmahni kalsan tawhte kutah ka pe ang.

²²Ngai rawh u, hemi khawpuia lo kîr leh tûrin thu ka pe ang a,’ tih hi LALPA thuchhuak a ni, ‘Tichuan, an bei ang a, an la ang a, meiin an hâl ang; tin, luahtu awm lovin Juda khawpuite chu ka tiṭiau vek ang,’” tiin.