Read Mizo_Old_version Jeremia 35 Bible Online

Jeremia 35 - Mizo_Old_version bible

Jeremia 35

¹Juda lal Josia fapa Jehoiakima lal laia LALPA hnên ata Jeremia hnêna thu lo thleng chuan,

²“Rekaba chhûngte hnênah kalin va bia la, LALPA ina pindan pakhatah hruai lût la, uain in tûr pe rawh,” a ti a.

³Tin, Habazinia fapa, Jeremia fapa, Jaazania leh a unaute, a fapa zawng zawngte, Rekaba chhûngte zawng zawng nên ka hruai a;

⁴tin, Pathian mi Igdalia fapa Hanana fate pindan, LALPA inah chuan ka hruai lût a; chu pindan chu hotute pindan bul kawngka vêngtu Saluma fapa Maaseia pindan chunga awm a ni.

⁵Tichuan, Rekaba thlahte paho hmaah chuan berhbute, note uaina khat ka hûng a, an hnênah, “Uain hi in rawh u,” ka ti a.

⁶Anni erawh chuan, “Uain chu kan in tawp lo vang; kan thlahtu Rekaba fapa Jonadaba chuan, ‘Nangmahni leh in thlahte pawhin kumkhuain uain in in tûr a ni lo.

⁷Inte in sain, thlai chi in tuhin, grêp huante in siamin in nei tûr a ni hek lo; in dam chhûng niahte chuan puan inahte in chêng zawk tûr a ni, in awmna ramah chuan in dam rei theih nân,’ tiin thu min pe a ni.

⁸Tichuan, kan thlahtu Rekaba fapa Jonadaban awkaa thu min chah zawng zawng, kan dam chhûnga keimahni leh kan nupuite, kan fapate leh kan fanuten uain in loh tûr te,

⁹kan chênna in sak loh tûr te, grêp huan emaw, lo emaw, thlai chi emaw neih loh tûr chenin kan zâwm a ni.

¹⁰Puan inahte chuan kan chêng zâwk a, kan thlahtu Jonadaba thupêk zawng zawng chu awihin kan zâwm vek a ni.

¹¹Tin, heti hi a lo ni a, Babulon lal Nebukadnezzaran ram a rawn beih lai khân keini chuan, ‘Hawh u, Kaldai sipai rualte leh Suria sipai rualte hlauh avângin Jerusalem-ah i kal ang u,’ kan ti a; tichuan, Jerusalem-ah hian kan lo chêng ta mai a ni,” an ti a.

¹²Tin, LALPA thu chu Jeremia hnênah a lo thleng a,

¹³“Israel Pathian, sipaihote LALPA chuan heti hian a ti: ‘Judai rama mite leh Jerusalem-a mi chêngte hnênah va sawi la, “Ka thute ngaithla tûrin zirtîrna chu in dawngsawng lo vang maw?” tih hi LALPA thuchhuak a ni.

¹⁴Rekaba fapa Jonadaba thu, a fapate hnêna a pêk, uain in loh tûr chu an zâwm a, vawiin thlengin eng mah an in lo va, an thlahtu thupêk chu an zâwm êm êm a ni. Kei erawh chuan zîng tak taka thovin in hnênah thu ka sawi a, mi ngaithla lo va.

¹⁵Ka rawngbâwltu zâwlneite chu zîng tak taka thovin in hnênah ka tîr a, “Mi tin in awm dân sual aṭangin lo kîr vek ula, in thiltihte chu siam ṭha ula, pathian dangte chu an rawngbâwl tûrin zui suh u; chutichuan, nangni leh in thlahtute hnêna ram ka pêkah chuan in chêng ang,” tiin; mahse, in beng in dawh lo va, mi ngaithla hek lo.

¹⁶Rekaba fapa Jonadaba thlahte chuan an thlahtu thupêk an zâwm a, he mite erawh hi chuan mi ngaithla si lo va.’

¹⁷Chuvângin, LALPA, Israel Pathian, sipaihote Pathian chuan heti hian a ti: ‘Ngai rawh u, Juda leh Jerusalem-a chêng zawng zawngte chungah chuan, thil ṭha lo an chunga lo thleng tûr ka sawi chhuah tawhte kha ka rawn thlen ang; an hnênah thu ka sawi a, an ngaithla si lo va, anmahni ka auh leh min chhâng hek lo,’ ” tiin.

¹⁸Tin, Jeremia chuan Rekaba thlahte hnênah, “Sipaihote LALPA, Israel Pathian chuan heti hian a ti: ‘In thlahtu Jonadaba thupêk in zawma, a thuchhuak zawng zawng in zawma, a thupêk zawng zawng ang zêla in tih avângin,

¹⁹“Rekaba fapa Jonadaba chuan kumkhuain ka hmaa ding tûr mi a hmai ngai lo vang,” ’ tiin,” sipaihote LALPA, Israel Pathian chuan a ti.