Read Mizo_Old_version Jeremia 36 Bible Online

Jeremia 36 - Mizo_Old_version bible

Jeremia 36

¹Tin, heti hi a ni a, Juda lal Josia fapa Jehoiakima lal kum linaah, he thu hi LALPA hnên ata Jeremia hnênah a lo thleng a:

²“Lehkhabu zial la la, chutah chuan i hnêna ka thusawi zawng zawng, Israel chung thu te, Juda chung thu te, hnam zawng zawng chung thu te, i hnêna thu ka sawi ni ata, Josia hun lai ata vawiin thlenga thu chu ziak rawh.

³Juda chhûngte chuan an chunga thil ṭha lo tih ka tum zawng zawng chu, an ngaihthlâkin mi tinin an awm dân sual an lamlêt thei mahna, an khawlohna leh an sualna ka ngaihdam theih nân,” a ti a.

⁴Tin, Jeremia chuan Neria fapa Baruka a ko va; tin, Baruka chuan LALPA thu zawng zawng, a hnêna a lo sawi tawh chu Jeremia ṭawngka ata lehkhabu zialah chuan a ziak a.

⁵Tin, Jeremia chuan Baruka hnênah, “Khuahkhirh ka ni a, LALPA inah chuan ka kal thei lo va;

⁶chuvângin, nang kal la, LALPA thu ka ṭawngka ata lehkhabu ziala i ziak kha chaw nghei niah, LALPA ina mipuite beng hriatah va chhiar chhuak rawh; an khawpui ata lo chhuak Juda-te zawng zawng beng hriatah pawh i chhiar chhuak bawk tûr a ni.

⁷Mi tinin an awm dân sual an lamlêtin, LALPA hmaah khawngaih an dîlna chu an thlen thei mahna, he mite chunga thinrimna leh thinurna LALPAN a puan tawh chu a nasa êm êm si a,” tiin thu a pe a.

⁸Tichuan, Neria fapa Baruka chuan zâwlnei Jeremia thupêk zawng zawng ang zêl chuan, LALPA inah LALPA thu lehkhabua mi chu a chhiar ta a.

⁹Tin, heti hi a ni a, Juda lal Josia fapa Jehoiakima lal kum ngana, thla kuanaah chuan, Jerusalem-a mi zawng zawngte leh Judai khawpui ata Jerusalem-a lo kal zawng zawngte chuan chaw nghei thu an puang ta a.

¹⁰Tin, Baruka chuan LALPA Kawngka Thar luhnaah, hung chhûng chungnung zâwka ziaktu Saphana fapa Gemaria pindan, LALPA ina miah chuan Jeremia thu lehkhabua mi chu, mi zawng zawng beng hriatah a chhiar a.

¹¹Tin, Saphana fapa Gemaria fapa Mikaia chuan lehkhabua mi LALPA thu zawng zawng chu a lo hriat chuan,

¹²lal inah a chhuk a, ziaktu pindanah chuan a lût a; tin, ngai teh, tah chuan hotu zawng zawng chu an lo ṭhu a - ziaktu Elisama te, Semaia fapa Delaia te, Akbora fapa Elnathana te, Saphana fapa Gemaria te, Hanania fapa Zedekia te leh hotu zawng zawngte chu.

¹³Tin, Mikaia chuan mite beng hriata Barukan lehkhabua mi a chhiar thu a lo hriat zawng zawngte chu a hrilh a.

¹⁴Tin, hotu zawng zawngte chuan Kusia fapa Selemia fapa Nethania fapa, Jehudia chu Baruka hnênah an tîr a, a hnênah, “Mite beng hriata i lo chhiar lehkhabu chu kengin lo kal rawh,” ti tûrin. Tichuan, Neria fapa Baruka chu lehkhabu zial kengin an hnênah a lo kal a.

¹⁵Tin, a hnênah, “Ṭhu la, kan beng hriat ngeiah chhiar rawh le,” an ti a; tichuan, Baruka chuan an beng hriatah a chhiar ta a.

¹⁶Tin, heti hi a lo ni a, chûng thute chu an hriat chuan hlauvin an inen hlawm a, Baruka hnênah chuan, “Hêng thu zawng zawng hi lal kan hrilh ngei ngei ang,” an ti a.

¹⁷Tin, Baruka chu, “Hêng thu zawng zawng hi a ka ata engtiziaa ziak nge i nih min hrilh teh khai,” tiin an zâwt a.

¹⁸Tin, Baruka chuan, “Hêng thu zawng zawng hi a ṭawngkain mi hrilh a, lehkhatuiin lehkhabuah chuan ka ziak mai a ni,” tiin a chhâng a.

¹⁹Tin, hotute chuan Baruka hnênah, “Kal la, Jeremia nên chuan biru rawh u; tu mân in awmna hre suh se,” an ti a.

²⁰Tin, hung chhûngah lal hnênah an lût a; lehkhabu zial erawh chu ziaktu Elisama pindanah an dah a, a thu zawng zawngte chu ṭawngkain lal an hrilh a.

²¹Tichuan, lal chuan lehkhabu zial chu la tûrin Jehudia a tîr a, ziaktu Elisama pindan aṭang chuan a rawn la a. Tin, Jehudia chuan lal leh lal bula ding hotu zawng zawngte beng hriatah a chhiar a.

²²Thla kuana a ni a, lal chu a thlasik inah chuan a ṭhu a, a hmaah chuan meihawl thuka vâm a awm a.

²³Tin, heti hi a ni a, Jehudia chuan thlep thum emaw, thlep li emaw a han chhiar chuan lal chuan a chemtein a zai bung a, thuk meiah chuan a zial bu pum kâng ral vek tûrin a theh lût zêl a.

²⁴Tin, lal leh a rawngbâwltu, hêng thu zawng zawng ngaithlatu tu mahin an hlau lo va, an silhfên an pawt thlêr hek lo.

²⁵Chu chang ni lovin, Elnathana leh Delaia leh Gemaria-te chuan lehkhabu zial chu hâl lo tûrin lal hnênah an ngên a; mahse, a ngaithla duh lo.

²⁶Tin, lal chuan lal fapa Jerameela leh Azriela fapa Seraia leh Abdeela fapa Selemia-te chu ziaktu Baruka leh zâwlnei Jeremia-te man tûrin thu a pe a; mahse, LALPA chuan anni chu a thukru a.

²⁷Tin, lehkhabu zial leh Jeremia ka ata Barukan a ziak zawng zawng thute lalin a hâl ral hnuah chuan, LALPA thu chu Jeremia hnênah a lo thleng a,

²⁸“Lehkhabu zial dang la la, lehkhabu zial hmasaa thu zawng zawng, Juda lal Jehoiakiman a hâl ral tâkte chu ziak leh vek rawh.

²⁹Tin, Juda lal Jehoiakima chungchâng thu-ah chuan heti hian ti ang che: ‘LALPA chuan heti hian a ti: “Babulon lal a lo kal ngei ang a, he ram hi a tichhiain, heta ta mi leh sa a tiboral vek ang,” tia ziakna chu, “Engah nge chutiang thu i ziak?” tiin lehkhabu ziak chu i lo hâl ral ta a.

³⁰Chuvângin, Juda lal Jehoiakima chungthuah chuan LALPA chuan heti hian a ti: Davida ṭhutphahah chuan mi ṭhu tûr a nei lo vang; a ruang pawh chu chhûn ni saah leh zân vûr hnuaiah paih chhuah a ni ang.

³¹Tin, an khawlohna avângin amah leh a thlahte leh a rawngbâwltute ka hrem ang; tin, anmahni leh Jerusalem-a chêngte leh Juda mite chungah chuan an chunga ka puan tawh, an ngaihthlâk loh thil ṭha lo zawng zawngte chu ka rawn thlen ang,’ ” tiin.

³²Tichuan, Jeremia chuan lehkhabu zial dang a la a, ziaktu Baruka, Neria fapa chu a pe a, ani chuan chutah chuan Jeremia kâ ata lehkhabu ziak tawh zawng zawng, Juda lal Jehoiakiman meia a hâl ral tâk thute chu a ziak a; chumi bâkah a anpui thu tam tak a belh bawk a.