Read Mizo_Old_version Jeremia 37 Bible Online

Jeremia 37 - Mizo_Old_version bible

Jeremia 37

¹Tin, Josia fapa Zedekia, Babulon lal Nebukadnezzaran Judai ram lala a siam chu, Jehoiakima fapa Konia aiah a lo lal ta a.

²Mahse, amah leh a rawngbâwltute leh a rama mite chuan, LALPA thu zâwlnei Jeremia kaa sawi chu an ngaithla lo va.

³Tin, Lal Zedekia chuan Selemia fapa Jehukala leh Maaseia fapa puithiam Zephania chu zâwlnei Jeremia hnênah, “LALPA kan Pathian hnênah mi tawngṭaisak rawh,” ti tûrin a tîr a.

⁴Tin, Jeremia chu mipuite zîngah a duh duhin a la lêng thei a, tân inah an la dah si lo va.

⁵Tin, Pharaoa sipai rualte chu Aigupta aṭangin an lo chhuak tawh a; tin, Kaldai-ho, Jerusalem hualtute chuan an chanchin an hriatin Jerusalem chu an kîrsan ta a.

⁶Tichuan, LALPA thu chu zâwlnei Jeremia hnênah a lo thleng a,

⁷“LALPA, Israel Pathian chuan heti hian a ti: ‘Juda lal, mi râwn tûra tîrtu hnênah chuan, “Ngai rawh, Pharaoa sipai rual, nangmahni ṭanpui tûra lo kalte chu anmahni ram Aigupta-ah an kîr leh ang.

⁸Kaldaite erawh chu an lo kal ang a, he khawpui hi an bei ang a, an la ang a, meiin an hâl ang.” ’

⁹LALPA chuan heti hian a ti: ‘ “Kaldaite chuan min kalsan ngei ang,” tiin mahni inbum suh u; an kal dâwn si lo.

¹⁰Nangmahni beitu Kaldai sipai rual zawng zawng hi sawisa nek mah ula, an zînga mi hliam awm chhunte chauh pawhin mahni puan in aṭanga lo thovin, he khawpui hi meiin an hâl tho vang,’ tiin i sawi tûr a ni,” tiin.

¹¹Tin, heti hi a ni a, Pharaoa sipai rualte hlauva Kaldai sipai rualten Jerusalem an kalsan lai chuan,

¹²Jeremia chuan mite zînga a chanvo la tûrin, Benjamin rama lût tûrin Jerusalem a chhuahsan a.

¹³Tin, Benjamina Kawngka a thlen chuan vêngtu hotu, Hanania fapa Selemia fapa, a hming Irija a lo awm a; chu chuan, “Kaldaite hnênah i inpe a ni!” tiin zâwlnei Jeremia chu a lo man a.

¹⁴Tin, Jeremia chuan, “Dâwt a ni! Kaldaite hnênah ka inpe lo ve,” a ti a; mahse, a ngaithla lo va. Tichuan, Irija chuan Jeremia chu a man a, hotute hnênah a hruai a.

¹⁵Tin, hotute chu Jeremia chungah an thinur êm êm a, an vua a, ziaktu Jonathana inah an tântîr a; chu chu tân in atân an hman a ni si a.

¹⁶Tin, Jeremia chu lei hnuai ripa a luha, ni tam tak a awm hnuin,

¹⁷Lal Zedekia chuan a ko chhuak a; tin, lal chuan a inah a rûk têin a zâwt a, a hnênah, “Lalpa hnên ata thu eng emaw tal a awm em?” a ti a. Tin, Jeremia chuan, “Awm e,” a ti a. A hnênah, “Babulon lal kutah mantîrin i awm ang,” a ti bawk a.

¹⁸Tin, Jeremian Lal Zedekia hnênah chuan, “Nangmah emaw, i rawngbâwltu emaw, hêng mite chungah hian eng thil nge ka tihsuala mi mantîr ni?

¹⁹I hnêna, ‘Babulon lal chu nangmah leh he ram do tûrin a lo kal lo vang,’ tia thu sawitu i zâwlneite chu khawiah nge an awm tâk?

²⁰Aw ka pu, lalber, ngaithla rawh, ka ngên a che; ka dîlna hi lo pawm ta che, ka ngên a che; ziaktu Jonathana inah chuan mi kîrtîr lul suh, chutah chuan ka thi dah ang e,” a ti a.

²¹Tin, Lal Zedekia chuan thu a pe a; tin, Jeremia chu vêngtu hung chhûngah chuan a tântîr a, chhang siamtute kawtthlêr ata ni tin chhang hlâwm khat, khawpuia chhang a awm chhûng chu a pe a; chutiang chuan Jeremia chu vêngtu hung chhûngah chuan a awm reng a.