Read Mizo_Old_version Jeremia 39 Bible Online

Jeremia 39 - Mizo_Old_version bible

Jeremia 39

¹Tin, Juda lal Zedekia lal kum kuana, thla sâwmnaah chuan, Babulon lal Nebukadnezzara leh a sipai zawng zawng chuan Jerusalem an bei a, an hual a.

²Zedekia lal kum sâwm leh pakhatna, thla lina, chumi thla ni kuanaah chuan khawpui kulh chu an su tlang a.

³Tin, heti hi a ni a, Jerusalem an lâk chuan Babulon lal hotute zawng zawng chu an lo lût a, kawngka laitaah chuan an ṭhu a: Nergal-sarezera te, Samgar-neboa te, Sarsekima te, Rabsaria te, Nergal-sarezera te, Rabmaga te leh Babulon lal hotu dang zawng zawng nên.

⁴Tin, heti hi a lo ni a, Juda lal Zedekia leh râl tu mi zawng zawng chuan anni chu an hmuhin an tlânchhia a, khawpui ata zânah lal huan kawng lamah kulh bang pahnih kâr kawngkaah an tlân chhuak a, ani chu Araba kawng lamah a chhuak a;

⁵mahse, Kaldai-ho sipai rual chuan ani chu an ûm a, Jeriko phaizâwlah Zedekia chu an ûm phâk ta a; tin, an man hnu chuan Babulon lal Nebukadnezzara hnênah, Hamath rama Ribla khuaah chuan an hruai a; tin, amah chuan a chungthu chu a rêl a.

⁶Tin, Babulon lal chuan Ribla khuaah chuan ama mit hmuh ngeiah chuan Zedekia fapate chu a that a, Babulon lal chuan Juda mi ṭha zawng zawng a that bawk a.

⁷Chu lo pawh chu Zedekia mit a kher chhuahsak a, kawl a buntîr a, Babulon-ah a hruai ta a.

⁸Tin, Kaldai-hote chuan lal in leh mi dang in zawng zawng an hâl a, Jerusalem kulh bangte pawh an tichhia a.

⁹Tin, vêngtu hotu Nebuzaradana chuan, khawpuia mipui la awm leh a hnêna mahnia inpete leh mipui la awm chhunte chu Babulon-ah salah a hruai a;

¹⁰mahse, vêngtu hotu Nebuzaradana chuan Juda ram mi rethei, eng mah nei lote chu a hnutchhiah a, grêp huan leh lote a pe nghâl a.

¹¹Tin, Babulon lal Nebukadnezzara chuan Jeremia chungchâng thu-ah chuan vêngtu hotu Nebuzaradana hnênah,

¹²“Ani hi hruai la, ṭha takin ti la, tina rêng rêng suh, i hnêna a sawi ang zêlin ti zâwk rawh,” tiin thu a pe a.

¹³Tin, vêngtu hotu Nebuzaradana chuan Nebusazbana te, Rabsaria te, Nergal-sarezera te, Rabmaga te leh Babulon lal sipai hotu deuh deuhte a chah vek a;

¹⁴anni chuan Jeremia chu vêngtu hung chhûng ata an ko chhuak a, Saphana fapa Ahikama fapa Gedalia hnênah a ina hâwn tûrin an kawltîr ta a; tichuan, mite zîngah chuan a khawsa ta a.

¹⁵Tin, LALPA thu chu, vêngtu hung chhûnga khârkhipa a awm lai chuan Jeremia hnênah a lo thleng a,

¹⁶“Ethiopia mi Ebed-meleka hnênah, ‘Sipaihote LALPA, Israel Pathian chuan heti hian a ti: “Ngai rawh, a ṭhatna tûr ni lovin, he khawpui chhiatna tûr zâwkin ka thute ka rawn thlen ang a, chumi ni ngei chuan i hmaah hlen a ni ang.

¹⁷Chumi niah chuan nang erawh chu ka chhanchhuak ang che,” tih hi LALPA thuchhuak a ni, “I mi hlauhte kutah pêk i ni lo vang.

¹⁸Ka chhanhim ngei dâwn si chia, khandaihin i tlu lo vang a, i nun chu chhanhim a ni ang, kei mi rin avângin,” tih hi LALPA thuchhuak a ni,’ tiin va sawi rawh,” a ti a.