Read Mizo_Old_version Jeremia 4 Bible Online

Jeremia 4 - Mizo_Old_version bible

Jeremia 4

¹“Aw Israel, i inlamlêt chuan, ka hnênah ngei i lo lêt tûr a ni,” Tih hi LALPA thuchhuak a ni. “I tenawmnate ka mit hmuh lohva i dah bova,

²Tihtakzeta, thurêl dik tak hmanga, fel taka, ‘LALPA a nuna a nun chhûng chu,’ tia chhia i chham chuan, Hnamte chu amahah chuan engthâwl an inti ang a, Amah chu an chhuang tawh ang.”

³Juda mite leh Jerusalem hnênah LALPA in Pathian chuan heti hian a ti e: “In lei khêk chu let ula, Hlîng zîngahte chi theh suh u.

⁴Nangni Judai rama mi leh Jerusalem-a chêngte u, LALPA tân in serh tan ula, in thinlung serh tan rawh u; Chuti lo chu, in thil sual tihte avângin, Ka thinurna chu mei angin a chhuak ang a, Tu ma ṭhelh theih lohvin a kâng dah ang e.

⁵Judai ramah hril ula, Jerusalem-ah puang rawh u: Ram pumah chuan tawtawrâwt hâm ula, Ring takin au rawh u; ‘Rawn inkhâwm ula, kulh nei khawpuiahte i lût ang u,’ ti ru.

⁶Zion lamah puanzâr khai ula, Himna zawngin tlân ula, muang suh u, Hmâr ata thil ṭha lo ka rawn thlen dâwn, Chhiatna nasa tak mai chu.”

⁷Ngaw hnuai pik ata sakeibaknei a chhuak e, Hnamte tichhetu tûr chu; A hmun ata a chhuak ta, a lo kal mêk e, I ram tichhe tûr leh, I khawpuite luahtu nei lo khawpa tiram tûrin.

⁸Chumi avâng chuan saiip puan fêng ula, ṭap ula, chiau vawng vawng rawh u; Kan laka LALPA thinurna nasa tak mai chu A la kiang si lo va.

⁹“Chumi niah chuan heti hi a lo ni ang,” Tih hi LALPA thuchhuak a ni: “Lal thinlung a zâm zo vang a, Hotute thinlung pawh; Puithiamte chu an hrilhhai ang a; Zâwlneite chuan mak an ti êm êm ang.”

¹⁰Tin, kei chuan, “A, Lalpa PATHIAN, He mite leh Jerusalem hi nasa takin i bum a nih hi, ‘Muanna in nei ang,’ i ti a, Khandaihin nunna a chhun tâk zâwk si hi,” ka ti a.

¹¹Chutih hunah chuan he mite leh Jerusalem hnênah, “Thlalêr tlâng kawlh vul ata thli lum tak, ka fanu, ka mite zâp fai tûr ni lo, thliar fai tûr ni hek lo,

¹²thli na lutuk ka thuin a lo thleng dâwn a ni; tûnah pawh an chung thu rêltu hi keimah ka ni,” tih a ni ang.

¹³“Ngai teh, a lo chho vang, chhûmpui angin, A tawlailîr ṭhâwngaleivir ang maite chu; A sakawrte chu mupui aiin an chak zâwk, Kan chung a va pik êm! Kan ral thûm a nih hi.”

¹⁴Aw Jerusalem, suahsualna ata i thinlung tlêng fai la, Chhandama i awm theihna tûrin; Eng chen nge i ngaihtuahna sual chu i pai dâwn?

¹⁵Dan ram ata aw a lo chhuak a, Ephraim tlâng aṭangin thil ṭha lo a puang e.

¹⁶“Hnamte chu hrilh ula, Jerusalem-ah puang rawh u, Ngai teh, ram hla tak ata beitute an lo thleng, Judai khawpuite chungah an chhuah e.

¹⁷Thlawhhma vêngtute ang maiin a vêlin an hual a, Ka chunga a hel avângin,” Tih hi LALPA thuchhuak a ni.

¹⁸“I awm dân leh i thiltihte chuan, Hêng hi i chungah a thlen a nih hi, Hei hi i chhiatna tûr chu a ni, A na êm êm a, i thinlung a chhun a ni.”

¹⁹Ka thin a nâ, ka thin a nâ, Ka thinlung ngeiah a nâ, Ka chhûngah ka thinlung a buai zo ta, Ka awm hle hle thei lo, Aw ka nunna, tawtawrâwt ri, Indona hawhaw i hriat avângin.

²⁰Chhiatna chungah chhiatna a thleng ta, Ram pum pui chu rawkin a awm ta, Ka puan inte chu an tichhe phut a, Ka puanzârte pawh mit khap kâr lovah.

²¹Eng chen nge indona puanzâr ka hmuh anga, Tawtawrâwt ri ka hriat ang?

²²“Ka mite chu an â êm a, mi hre si lo va, Naupang â tak, hriatna nei lo ang mai an ni, Thil sual tih an thiam a, Thil ṭha tih dân erawh chu an thiam si lo.”

²³Leilung hi ka han en a, ngai teh, Eng mah awm lo leh ruakin a awm; Vânte pawhin êng an nei lo.

²⁴Tlângte ka en a, ngai teh, a nghîng a, Mual zawng zawng pawh an phe hlawk hlawk a.

²⁵Ka han en a, ngai teh, mihring an awm lo va, Chunglêng sava zawng zawng pawh an thlâwk bo zo ta.

²⁶Ka han en a, ngai teh, Thlawhhma ṭhate chu thlalêr a chang ta, Khawpui zawng zawng pawh a chim zo ta, LALPA leh a thinurna nasa tak hmaah chuan.

²⁷ LALPA chuan heti hian a ti a ni: “Ram pum pui a ṭiau ang a; mahse, ka titâwp hlen lo vang.

²⁸Chumi avâng chuan lei chuan a sûn ang a, Chung lam vânte pawh a thim a. Thu ka sawi tawh a, ka tum tawh a, Ka inchhîr lo va, ka inlamlêt dâwn hek lo.”

²⁹Sakawr chunga chuang leh thal ngul hmangtute thâwmah, Khawpui pum pui chu an tlânchhia a. Ngawah an lût a, lungpui hmunahte an lâwn a. Khaw tin mai an rauhsan a, Luahtu pakhat mah awm lovin.

³⁰Tin, nang, rawka i awm hun chuan engtin nge i tih ang? Puan senlâra inthuamin, Incheina rangkachaka incheiin, I mitte hnawih dur mah la, I intimawi thlâwn mai mai a ni; I tlangvâlte chuan an hmusit tho chia, I nun lâk an tum a ni.

³¹Hmeichhe nau vei au thâwm ang ka hria a, Fa tîr hringtu na tuar lai, Zion fanu thaw huam huam ri chu; A kutte phara, “Ka chung a va pik êm! Tualthattute vângin ka nun a chau zo ta,” ti chu.