Read Mizo_Old_version Jeremia 41 Bible Online

Jeremia 41 - Mizo_Old_version bible

Jeremia 41

¹Tin, heti hi a ni a, thla sarihnaah chuan Elisama fapa Nethania fapa Ismaela, lal chia mi, lal khâwnbâwlte zînga pakhat chu, mi sâwm hruaiin Mizpa khuaah Ahikama fapa Gedalia hnênah a lo kal a; tin, Mizpa khuaah chuan chaw an ei ho va.

²Tin, Nethania fapa Ismaela chu a mi hruai sâwmte nên chuan an tho va, Saphana fapa Ahikama fapa, Babulon lalin ram awptua a siam Gedalia chu khandaihin an that ta a.

³Tin, a hnêna Juda mi awm zawng zawng, Mizpa khuaa Gedalia hnêna awmte leh Kaldai râl tu mi awm vete chu Ismaela chuan a that bawk a.

⁴Tin, Gedalia a thah hnu ni hnihnaah chuan heti hi a ni a, tu mân an hriat hmain,

⁵Sekem aṭang te, Silo aṭang te, Samaria aṭang tein mi sawmriat, an khabe hmul mêta, an silhfênte thlêra, mahni inzaiin, chhang hlante leh rimtuite kengin LALPA inah hlân tûrin an lo kal a.

⁶Tin, Nethania fapa Ismaela chu Mizpa khua aṭangin anmahni hmuak tûrin a chhuak a, kawng tluanin a ṭap zêl a; tin, heti hi a ni a, anmahni a han hmuh chuan an hnênah, “Ahikama fapa Gedalia hnênah lo kal rawh u,” a ti a.

⁷Tin, heti hi a ni a, khawpui chhûng an han thlen chuan Nethania fapa Ismaela leh a mi hruaite chuan anni chu an that a, khuarkhurumah an paih ta a.

⁸An zînga mi sâwm erawh chuan Ismaela hnênah, “Min that suh, ramah chuan buh te, buhban te, hriak te, khawizûte kan thukru ṭeuh si a,” an ti a. Tichuan, anmahni chu a zuah a, an unaute zîngah chuan a that tel ta lo va.

⁹Tin, khuarkhurum, Ismaelan Gedalia ruala a mi thahte ruang a paihna chu, Lal Asan Israel lal Baasa a hlauh avânga a siam a ni. Nethania fapa Ismaela chuan chu chu ruangtein a tikhat a.

¹⁰Tin, Ismaela chuan Mizpa khuaa mi nung awm chhun, lal fanute, Ahikama fapa Gedalia hnêna vêngtu hotu Nebuzaradanan a kawltîr, Mizpa khuaa la awm zawng zawng nên chuan salah a hruai ta vek a; Nethania fapa Ismaela chuan chûngte chu sala hruaiin Amon mite ram panin a chhuak a.

¹¹Amaherawhchu, Karea fapa Johanana leh a hnêna awm sipai pâwl hotu zawng zawng chuan, Nethania fapa Ismaela thil ṭha lo tih zawng zawng chu an lo hriatin,

¹²mi zawng zawng an hruai chhuak a, Nethania fapa Ismaela bei tûrin an kal a, tui tam tak awmna hmun Gibeon-ah chuan an va hmu a.

¹³Tin, heti hi a ni a, Ismaela hnêna mi zawng zawng chu, Karea fapa Johanana leh a hnêna sipai pâwl hotu zawng zawng an hmuh chuan, an lâwm ta êm êm mai a.

¹⁴Tichuan, Ismaelan Mizpa khua aṭanga sala a hruai zawng zawng chu an hawi a, an kîr a, Karea fapa Johanana hnênah an kal ta duak a.

¹⁵Nethania fapa Ismaela erawh chu mi pariat nên Johanana lakah an tlân chhuak hrâm a, Amon mite hnênah an kal ta a.

¹⁶Tin, Karea fapa Johanana leh a hnêna sipai pâwl hotu zawng zawng chuan, Nethania fapa Ismaelan Ahikama fapa Gedalia a thah hnua, Mizpa khua aṭanga Nethania fapa Ismaela laka Johananan a chhanchhuah tawh, mi la awm chhun zawng zawng - indo mite, hmeichhiate, naupangte, mi tilrehte, Gibeon aṭanga a hruai lehte chu an hruai ta vek a.

¹⁷Tin, an chhuak a, Kaldai-ho avânga Aigupta ramah tlân luh tumin Bethlehem khaw bula Geruth Chimham-ah chuan an châwl a.

¹⁸Nethania fapa Ismaelan Ahikama fapa Gedalia, Babulon lalin chu ram awptua a siam chu a thah avângin, anni chu an hlau ta êm êm si a.