Read Mizo_Old_version Jeremia 42 Bible Online

Jeremia 42 - Mizo_Old_version bible

Jeremia 42

¹Tin, sipai pâwl hotute leh Karea fapa Johanana leh Hosaia fapa Jezania leh mipui zawng zawng, a tê ber aṭanga a lian ber thlengin an lo hnai a,

²zâwlnei Jeremia hnênah, “I hmaah kan dîlna pawm ni sela, hêng mi la awm chhun zawng zawng tân ngei hian i Pathian hnênah min ṭawngṭaisak tûrin kan ngên a che; min hmuh ang ngei hian mi tam tak zîng ata tlêm tê chauh hnutchhiahin kan awm ta si a,

³LALPA i Pathianin kan kalna tûr kawng leh kan tih tûr thil min kawhhmuh theihna tûrin,” an ti a.

⁴Tin, zâwlnei Jeremia chuan an hnênah, “In thu chu ka hria e. Ngai rawh u, in thu ang zêlin LALPA in Pathian hnênah chuan ka dîl ang e; tin, heti hi a ni ang a, LALPAN a chhânna che u apiang ka hrilh zêl ang che u, in lakah eng mah ka zêp lo vang,” a ti a.

⁵Tin, anni chuan Jeremia hnênah, “LALPA i Pathianin kan hnêna a tirhna che thu zawng zawng ang zêla kan tih loh chuan, kan lakah LALPA chu thu hretu dik leh rinawm ni rawh se.

⁶A chhia emaw, a ṭha emaw, kan tirhna che LALPA kan Pathian ṭawngka chhuak chu kan awih ngei ngei ang; LALPA kan Pathian ṭawngka chhuak kan awih chuan kan tân ṭhat theihna tûr a ni,” an ti a.

⁷Tin, heti hi a ni a, ni sâwm hnuah LALPA thu chu Jeremia hnênah a lo thleng a.

⁸Tichuan, Karea fapa Johanana leh a hnêna sipai pâwl hotu awm zawng zawng leh sipai zawng zawng, a tê ber aṭanga a lian ber thlengin a ko va,

⁹an hnênah, “LALPA in Pathian, a hmaa in dîlna thlen tûra in mi tirhna khân heti hian a ti e:

¹⁰‘He ramah hian in awm reng chuan ka tungding ang che u a, ka ṭhiat lo vang che u, ka phun ang che u a, ka pawt phawi lo vang che u, in chunga thil ṭha lo ka thlente chu ka sim tawh si a.

¹¹Babulon lal in hlauh ṭhina chu hlau tawh suh u, amah chu hlau suh u,’ tih hi LALPA thuchhuak a ni; a kut ata chhandam tûr leh chhanchhuak tûr che uin in hnênah ka awm si a.

¹²Tin, in chungah zah a ngaih theih nân zahngaihna ka phal ang che u a, in ram ngeiah ka kîrtîr ang che u.

¹³Amaherawhchu, ‘He ramah hian kan awm lo vang,’ tia LALPA in Pathian aw chu in awih lohva,

¹⁴‘Hnai lo ve, Aigupta ramah kan kal zâwk ang a, tah chuan indona rêng rêng kan tawk lo vang a, tawtawrâwt ri pawh kan hre lo vang a, chaw tlâkchham a awm hek lo vang, tah chuan kan chêng zâwk ang,’ in tih chuan,

¹⁵aw Juda awm chhunte u, LALPA thu chu hre rawh u khai. Sipaihote LALPA, Israel Pathian chuan heti hian a ti: ‘Aigupta rama lût tûr leh chuta chêng tûra in hawi lui a nih chuan,

¹⁶heti hi a lo ni ang a, khandaih, in hlauh ngeia khân Aigupta ramah chuan a nang ang che u a, ṭâm, in hlauh ṭhina pawh khân Aigupta ramah chuan a ûmzui zêl ang che u, tah chuan in thi ang.

¹⁷Aigupta rama chêng tûra hawi luite zawng zawng chu chutiang chuan an awm ang a, khandaih te, ṭâm te, hri tein an thi ang, thil ṭha lo an chunga ka thlen tûr lakah chuan tu mah an chhuakin an him lo vang.’

¹⁸“Sipaihote LALPA, Israel Pathian chuan heti hian a ti a ni: ‘Jerusalem-a chêngte chunga ka thinurna ka leih ang bawkin, Aigupta ram in luh hunah chuan in chungah ka thinrimna ka leih bawk ang. Anchhe dawng leh mak tih huai huai, mi kamchhe tleuhna, sawichhiat in ni ang a, he hmun hi in hmu leh tawh rêng rêng lo vang.’

¹⁹Aw, Juda awm chhunte u, LALPA chuan in chungchâng a sawi tawh hi, ‘Aigupta ramah chuan lût suh u!’ Vawiinah hian ka hriat chiantîr che u tih hre mawlh rawh u.

²⁰In nunna chân phah tûrin in inbum a ni mai; LALPA in Pathian hnênah chuan, ‘LALPA kan Pathian hnênah chuan min ṭawngṭaisak la, LALPA kan Pathianin a tih apiang chu min hrilh la, kan ti zêl ang e,’ tiin mi tîr kha a ni a.

²¹Vawiinah hian in hnênah ka puang ta a nih hi; mahse, in hnêna a mi tirhna engah mah LALPA in Pathian awka chu in awih si lo va.

²²Chuvângin, tûnah zawng hre rawh u, chên in châkna hmun ngeiah chuan khandaih te, ṭâm te, hri tein in thi ngei dâwn a ni, tiin,” a ti a.