Read Mizo_Old_version Jeremia 44 Bible Online

Jeremia 44 - Mizo_Old_version bible

Jeremia 44

¹Aigupta rama Juda awm zawng zawng, Migdol khua te, Tahpanes khua te, Noph khua te leh Pathros rama chêngte chungchânga Jeremia hnêna thu lo thleng chu:

²“Sipaihote LALPA, Israel Pathian chuan heti hian a ti: ‘Jerusalem leh Juda khawpuite zawng zawng chunga thil ṭha lo ka rawn thlen zawng zawng chu in hmu tawh a; tin, ngai teh u, tûnah hian a lo ram ta mai a ni a, tu mah an chêng ta lo;

³anni pawhin, nangni pawhin, in thlahtute pawhin pathian dang an la hriat ngai hleih lohte rawng bâwl tûr leh an hnêna rimtui hâlin, mi tithinur tûra an suahsualna an tih tâk avângin.

⁴Chuti pawhin in hnênah chuan ka rawngbâwltu zâwlneite zawng zawng, zîng tak taka thovin ka tîr a, an hnênah, “Aw, he thil tenawm, ka huat zâwng tak hi chu ti tawh suh u,” tiin.

⁵Mahse, an ngaithla chuang lo va, an suahsualna hawisana pathian dangte hnênah rimtui hâl loh tûr thu chu an bengkhawn hek lo.

⁶Chuvângin, ka thinurna leh ka thinrimna chu Juda khawpuiahte leh Jerusalem kawtthlêrahte ka leihin a alh ta a, vawiina a awm ang hian a ram a, a ṭiau ta a nih hi.’

⁷Chuvângin, tûnah zawng LALPA, sipaihote Pathian, Israel Pathian chuan, ‘In zîng ata a hmei a pa, nausênte leh hnute hne laite Juda zîng ata tu mah zuah lova râwt bo vek tûrin engati nge he thil ṭha lo tak hi in nunna chung ngeia in tih ni?

⁸In va chênna Aigupta ram pathiante hnênah rimtui hâlin khawvêl hnam zawng zawng zînga ânchhe dawng leh sawichhiat in nih theihna tûr leh, râwt bo in nih theihna tûrin in kut kawih ngeiin mi tithinur a ni.

⁹In thlahtute suahsualna te, Juda lalho suahsualna te, an mipuite suahsualna te, nangmahni ngei suahsualna te leh in nupuite suahsualna, Judai ram leh Jerusalem kawtthlêra an tih tâkte chu in theihnghilh ta em ni?

¹⁰Vawiin thleng pawh hian an la inchhîr chuang lo va, in thlahtute leh nangmahni hmaa ka târ lan ka dân leh ka dân siamte chu in zawh lo va, in ṭih hek lo.’

¹¹“Chuvângin, sipaihote LALPA, Israel Pathian chuan heti hian a ti: ‘Ngai rawh u, in chhiatna tûrin Juda zawng zawng râwt bo vek tûrin ka hmachhawn ang che u.

¹²Tin, Juda awm chhun, Aigupta rama chên tuma hawi luite chu ka man ang a, an chimit vek ang; Aigupta ramah chuan an tlu ang a, khandaih leh ṭâmtea tihboralin an awm ang; a tê ber aṭanga a lian ber thlengin khandaih leh ṭâmin an thi ang, ânchhe dawng leh mak tih huai huai leh mi kamchhe tleuhna leh sawichhiat an ni ang.

¹³Jerusalem ka hrem ang bawkin Aigupta rama chêngte chu khandaih te, ṭâm te leh hripuitein ka hrem dâwn si a.

¹⁴Chutichuan, Aigupta rama chêng tûra kal Juda awm chhunte chu Judai ram, an awm nâna kîr leh an châk êm êmna ramah chuan kîr tûrin, pakhat mah nungdamin an chhuak lo vang, a rûka tlân chhuakte chauh lo chu tu mah an kîr lo vang.’ ”

¹⁵Tichuan, mi zawng zawng, an nupuiten pathian dangte hnênah rimtui an hâl tih hriate leh, hmeichhia chuta dingte mipui tam tak, Aigupta rama chêng mipui zawng zawng chuan, Pathros-ah chuan Jeremia chu an chhâng a, heti hian an ti a:

¹⁶“LALPA hminga kan hnêna i thusawite kha zawng kan ngaihthlâksak lo vang che.

¹⁷Keini leh min thlahtute, kan lalte leh kan hotuten Juda khawpuiahte leh Jerusalem kawtthlêrahte an lo tih tawh ṭhin ang khân, vân lalnu hnêna rimtui hâlte leh a hnêna in tûr thilhlan bun chhuah te, kan ṭawngka chhuak apiang ang zêl khân kan ti ngei ngei ang; chutih lai chuan kan hmuingîl a, ei leh bâr tûr a tam a, chhiatna rêng kan hmu hlei nêm.

¹⁸Vân lalnu hnêna thil hâl leh a hnêna in tûr thilhlan bun chhuahte kan bân chinah hian engkim kan tlachham ta zâwk a, khandaih leh ṭâmtea tihboralin kan awm ta a ni,” tiin.

¹⁹Tin, hmeichhiate chuan, “Vân lalnu hnêna rimtui kan hâl lai leh, a hnêna in tûr thilhlan kan bun chhuah laite khân, kan pasalte remtih lohvin em ni a biak nân chhang kan siama, a hnênah in tûr thilhlante kan bun chhuah kha?” an ti a.

²⁰Tichuan, Jeremia chuan mipui zawng zawng - a hmei a pa, amah chhângtu zawng zawng hnên ngeiah chuan,

²¹“Juda khawpuiahte leh Jerusalem kawtthlêrahte, nangni leh in thlahtute, in lalte leh in hotute, leh rama mipuite rêng rêngin rimtui an hâlte chu LALPAN a hre rengin, a rilruah a khung lo vem ni?

²²In thil sual tih avâng leh in thil tenawm tihte avângin LALPAN a tuar peih ta lo a nih kha; chumi avâng chuan in ram chu tuna a awm ang hian ram chhia, mak tih huai huai, ânchhe dawng, luahtu awm lo a lo nih tâk hi.

²³Rimtui in hâl a, LALPA chungah in sual a, LALPA ṭawngka chhuakte chu in awih lo va, a dân emaw, a dân siamte emaw, a thu hriattîrte emaw in zawm hek loh avângin, he thil ṭha lo hi tûna a awm ang hian in chungah a lo thleng a nih hi,” a ti.

²⁴Chu lo pawh Jeremia chuan mipui zawng zawng leh hmeichhia zawng zawng hnênah, “Aigupta rama Juda zawng zawngte u, LALPA thu hi hre rawh u!

²⁵Sipaihote LALPA, Israel Pathian chuan heti hian a ti: ‘Nangni leh in nupuite chuan, “Vân lalnu hnênah rimtui hâl leh in tûr thil hlan bun chhuahte chu, kan lo tiam tawh ang zêlin kan ti ngei ang,” tiin in kain in sawi tawh a, in kutin in puitlin tawh bawk a. In thutiamte chu tinghet ula, in thu tumte chu hlen law law rawh u.’

²⁶Chuvângin, nangni Juda, Aigupta rama chêng zawng zawngte u, LALPA thu hi ngaithla rawh u: ‘Ngai rawh u, “Lalpa PATHIAN a nuna a nun chhûng chu,” tiin, Aigupta ram pum puia chêng, Juda mi tu kaah mah ka hming a ri tawh ngai lo vang, tiin ka hming ropui chhâlin chhia ka chham a ni, tih hi LALPA thuchhuak a ni.

²⁷Ngai rawh u, an ṭhatna tûr ni lovin, an chhiatna tûrin anmahni ka châng reng a ni. Tichuan, Juda mi, Aigupta rama awm zawng zawng chu khandaih te, ṭâmtea tihralin an awm ang, an boral vek hma loh chuan.

²⁸Tin, khandaih tihral bâng tlêm tê chu Aigupta ram ata chhuakin Judai ramah an lût ang; tin, Juda mi awm chhun zawng zawng, Aigupta rama chêng tûra kal tate chuan tu thu nge ding zâwk dâwn, ka thu nge an thu, an hria ang.

²⁹Tin, hei hi in tân chhinchhiahna a ni ang: ka thu hi in chungah thil ṭha lo lam atân a ding ngei dâwn tih in hriat theih nân, he hmunah hian ka hrem dâwn che u a ni,’ tih hi LALPA thuchhuak a ni.

³⁰LALPA chuan heti hian a ti: ‘Ngai rawh u, Pharao-hophra, Aigupta lal chu a hmêlma, a nunna zawngtute kutah ka mantîr ang, Juda lal Zedekia, a hmêlma, a nunna zawngtu Babulon lal Nebukadnezzara kuta ka pêk ang bawk khân,’ ” a ti a.