Read Mizo_Old_version Jeremia 46 Bible Online

Jeremia 46 - Mizo_Old_version bible

Jeremia 46

¹Hnamte chungchânga zâwlnei Jeremia hnêna LALPA thu lo thleng chu:

²Aigupta thu: Euphrates lui kama Karkhemis khuaa awm, Juda lal Jehoiakima, Josia fapa kum linaa Nebukadnezzaran a nghaisak Aigupta lal Pharao-nekoa sipai rual chungchâng thu:

³“Phaw bial te, phaw sâwl te peih ula, râl tâwn rawh u!

⁴Sakawr thuam ula, sakawr chuang mite u, chuang rawh u! Dâr lukhum khumin ding nghet ula, Fei tât hriamin thîr kawr ha rawh u!

⁵Engtizia nge! An zâm ta, tukkhum an chhawn, An râl tu mite chu an tlâwm a; bak lêngin an tlânchhia, Hnung lam hawi lo lêkin, Kil tinah râl a ṭi,” Tih hi LALPA thuchhuak a ni.

⁶“Mi zuanzâng an tlân bo thei lo, Râl tu mi an chhuak chuang hek lo; Saw hmâr Euphrates lui kamah sâwn an pai a, an tlu zo ta.

⁷Nile lui anga lo lian hi tu nge ni? Luipui tui fâwn vêl ang mai hi?

⁸Aigupta chu Nile lui angin a lian a, Luipui tui fâwn vêl ang maiin; ‘Ka lian ang a, lei chung ka dâp ang, Khawpuite leh a luahtute ka tichhia ang,’ a ti a.

⁹Aw sakawrte u, tâwn zêl ula, Aw tawlailîrte u, che vak rawh u! Râl tu mite chuan hma tâwn se, Ethiopia mi leh Put mi, phaw chawitute, Lub mi thal ngul hmang thiamte nên.

¹⁰Chumi ni chu a ni, Lalpa, Sipaihote LALPA ni chu, Phuba lâk ni, a hmêlmate chunga phuba a lâkna ni chu. Khandaih chuan a ei zo vang a, a hnê hlui ang, An thisen chu tlai takin a in ang; Sipaihote LALPA chuan hmâr lam ramah Euphrates lui kamah inthawi nân mi tam tak a hlân ta.

¹¹Aw, Aigupta fanu thianghlim, Gilead-ah chho la, thing hnai hnawih mi han la rawh; Damdawi tam tak i hmang thlâwn ta; I tân damna rêng a awm lo ve.

¹²Hnamte chuan i mualphona chu an hria a, I ṭap chuan lei pum a khat e; Râl tu mi leh râl tu mi an insu a, Leiah an tlu dûn reng mai,” tiin.

¹³Nebukadnezzara, Babulon lal a lo kala, Aigupta ram a rawn nghaisak tûrzia thu LALPAN zâwlnei Jeremia hnêna a sawi chu:

¹⁴“Aigupta ramah chuan hril ula, Migdol-ah puang rawh u; Noph-ah leh Tahpanes-ah chuan puang ula; ‘Ding nghetin inrâlring rawh u, I vêla mi khandaihin a ei zo tawh si a,’ tiin sawi rawh u.

¹⁵Engati nge i mi chakte hnâwl bo an nih? An ding zo lo, LALPAN a paih thlâk vângin.

¹⁶Mi tam takte chu a petektîr a, A ni, an insu tlu rem rum a, ‘Hnehchhiahna khandaih tlânsanin Hawh u, i kîr ang u, kan pianna ramah, Kan mite hnênah chuan,’ an ti a.

¹⁷‘Aigupta lal Pharaoa hi thâwm chang lian mai, A hun tak chu a pumpelh a,’ tiin Tah chuan an au va.

¹⁸‘A nuna ka nun chhûng hi chuan,’ Tih hi Lalber, a hming sipaihote LALPA thuchhuak a ni e, ‘Tlângte zînga Tabor tlâng angin, Tuipui bula Karmel tlâng angin a lo kal ngei ang.

¹⁹Aw nang, fanu, Aigupta rama chêng, Sal tâng tûrin insiam mai rawh; Noph khua chu a ṭiau dâwn si a, Chêng tûr awm lovin a kâng ral ang.

²⁰Aigupta chu bâwnglâ nalh tak a ni; Mahse, hmâr ata ei chhetu tûr lo thawkin a lo kal e.

²¹An zînga sipai rawih laite chu bâwngtuai châwm thau ang mai an ni. Tukkhum an chhawn a, an tlânchhia, ding lovin, An chungah an chhiatna ni a thleng ta a ni, an hremna hun tûr chu.

²²Rûlpui tleng ang maiin thâwm a nei a, A hmêlmate chu a rualin an lo kal a, Thing kittute angin hrei nên an rawn bei a.

²³A ram ngawpui fan chhuah zawh loh chu An rawn ṭhiat ang, Khau puang aiin an tam zâwk si a, Chhiar sên rual an ni lo.

²⁴Aigupta fanu chu a mualpho vang, Hmâr lama mi kutah mantîrin a awm ang.’ ”

²⁵Sipaihote LALPA, Israel Pathian chuan heti hian a ti: “Ngai rawh u, No khuaa Amona leh Pharaoa, Aigupta leh a pathiante, a lalte, Pharaoa ngei leh amah ringtute chu ka hrem ang.

²⁶An nunna zawngtute kutah leh Babulon lal Nebukadnezzara leh a rawngbâwltute kutah chuan ka mantîr ang. Chumi hnuah chuan luahin a awm ang, hmasâng nite ang bawkin,” tih hi LALPA thuchhuak a ni.

²⁷“Aw Jakob, ka rawngbâwltu, hlau suh la, Aw Israel, zâm hek suh, Ngai rawh, hla tak ata ka chhanchhuak dâwn si chia, I thlahte pawh an sal tânna ram ata chu. Tin, Jakoba chu a lo kîr ang a, Muang takin a awm hle hle ang a, Tu mân an tihlau tawh lo vang.

²⁸Aw Jakob, ka rawngbâwltu, hlau suh, Ka awmpui che hi,” tih hi LALPA thuchhuak a ni, “Ka hnawh darhna che hnam zawng zawng chu ka titâwp ang a, Nang erawh chu ka titâwp hlen lo vang che. Dik takin ka hrem ang chia, Hrem loh chuan ka chhuah lo vang che.”