Read Mizo_Old_version Jeremia 47 Bible Online

Jeremia 47 - Mizo_Old_version bible

Jeremia 47

¹Pharaoan Gaza a suasam hmaa, Philistia mite chungchânga zâwlnei Jeremia hnêna LALPA thu lo thleng chu:

² LALPA chuan heti hian a ti: “A kuang khatin a luang liam ang; Ram chu a chîm ang a, a chhûnga awm zawng zawng nên, Khawpui leh a chhûnga chêngte pawh chu; Mite an ṭap ang a, rama mi zawng zawng an chiau vawng vawng ang.

³A sakawr chak phei khâwng ri-ah, A indo tawlailîr ri dur durah, A tawlailîr nghawr thâwmah te, Pate an zâm a, an fate hawi lo lêkin.

⁴Philistia mi zawng zawng rawkna ni, Tura leh Sidon ata ṭanpuitu awm chhunte sah chhumna ni avângin, LALPA chuan tuipui kam Kaptor-a la awm chhun, Philistia mite chu a tichhe dâwn si a.

⁵Gaza mite lu a lo kâwng ta, Askelon chu a chimit ta a, A ram phaia la chêng chhunte chu; Eng chen nge i inzai dâwn?

⁶Aw LALPA khandaih, i awm hle hle hma eng chen nge? I paiah inkhungin châwl la, awm hle hle rawh.

⁷ LALPAN tih tûr a pêk si che chuan, Engtin nge i awm hle hle theih ang? Askelon leh tuipui kam chunga che tûrin, A ruat miau si che chuan.”