Read Mizo_Old_version Jeremia 48 Bible Online

Jeremia 48 - Mizo_Old_version bible

Jeremia 48

¹Moab chungchâng thu: sipaihote LALPA, Israel Pathian chuan heti hian a ti: “Nebo chung a pik e! Tihṭiauvin a awm ta! Kiriathaim chu tihmualphovin a awm ta, lâk sawn a ni a. Misgap chu tihmualpho leh tihchhiatin a awm ta.

²Moab hmingthanna a bo ta. Hesbon-ah a chhiatna tûr rêlin, ‘Hawh u, hnam a nihna ata i tibo vang u,’ an ti a. Aw Madmen khua, nang pawh tihreh dêr i ni ang a, Khandaihin a ûm dâwn a che.

³Horonaim aṭanga au thâwm: ‘Rawkrâl leh tihchhiatna nasa tak mai chu!’

⁴Moab a boral e; A fanaute ṭap thâwm hriat tûr a awm e;

⁵Luhith Chhovah ṭapin an chho va, Horonaim chhukah boralna au thâwm manganthlâk an hria.

⁶Tlân bo ula, in nun humhim rawh u, Thlalêr ramsabengtung angin awm rawh u.

⁷I kutkawih leh i sum leh pai i rin vângin, Nang pawh manin i awm dâwn a ni; Kemos chu sala hruai a ni ang a, A puithiamte leh a hotute nên.

⁸Khaw tinah tichhetu a lo thleng ang, Khaw pakhat mahin a pumpelh lo vang; Phai ram pawh chu a boral ang, Phaizâwl pawh tihchhiat a ni ang, LALPAN a sawi tawh ang ngei khân.

⁹A thlawh bo theih nân Moab chu thla pe ula, A khuate chu a ram ang a, luahtu awm lovin.

¹⁰Thlahdah taka LALPA hna thawktu chu ânchhe dawngin awm sela, Thisen chhuah tûra a khandaih hmang duh lotu chu ânchhe dawngin awm rawh se.

¹¹A tleirâwl lai ata Moab chu a nuamsa a; Ngâ ngul khawpin a tling reng a, Bêl danga ruah chhuah pawh a tâwk lo va, Sala hruaiin a awm ngai hek lo. A tui ngaia tui rengin, a rim pawh a dang chuang lo ve.

¹²“Chu vâng chuan ngai rawh u, ni chu a lo thleng e, a bun chhuaktu tûr chu ka rawn tîr ang a; tin, annin an bun chhuak ang,” tih hi LALPA thuchhuak a ni: “A bêlte chu a tiruak ang a, a bûrte chu a tisawm ang.

¹³Israel chhûngten an rin pui ber Bethel an zahpui angin, Moab chuan Kemos a zahpui tawh ang.

¹⁴“ ‘Pasalṭha leh râl tu mi huaisen kan ni e,’ Engtiziaa ti nge in nih?

¹⁵Moab chu tihramin a awm a, A khawpui chu meikhuah a chang zo ta, A vâl rual ṭha zawng an tlu hlum zo,” Tih hi Lalber, a hming sipaihote LALPA thuchhuak a ni e.

¹⁶“Moab chhiatna chu a lo thleng mêk a, A tuarna tûr a ṭuah ṭêp a ni.

¹⁷Nangni a vêla mi zawngten amah sûnin, A hming hria zawng zawng pawhin, ‘Tiang khauh leh tiang ropui a tliah tâk le!’ ti rawh u.

¹⁸Aw nang fanu, Dibon-a chêng, i ropuina chhuksan la, Tuihâlin ṭhu rawh; Moab rawktu chuan a bei chia, I kulhte chu a tichhe ta si a.

¹⁹Aw Aroer-a chêngnu, kawng bulah ding la, en thlîthlai rawh, Tlânchhepa leh relhrunu zâwt la, ‘Eng nge ni ta le?’ tiin.

²⁰Moab tihmualpho a ni ta, a lo sawprawp ta si. Chiau vak vakin ṭap rawh u! Moab tihram a ni ta, Tih Arnon-ah puang rawh u.

²¹“Ram zâwl chungah rorêlna a lo thleng ta, Holon-ah te, Jahzah-ah te, Mephaath-ah te,

²²leh Dibon-ah te, Nebo-ah te, Beth-diblathaim-ah te,

²³leh Kiriathaim-ah te, Beth-gamul-ah te, Beth-meon-ah te,

²⁴leh Kerioth-ah te, Bozra-ah te, Moab rama khua zawng zawng, a hla leh a hnaiahte pawh.

²⁵Moab ki chu râwt chhum a ni a, a bân chu tihtliah a ni ta,” tih hi LALPA thuchhuak a ni.

²⁶“Amah chu tirui rawh u, LALPA chungah a intilian si a. Moab chu ama luakah a tâl ang a, nuihzatbûrin a awm bawk ang.

²⁷Israel chu i tân nuihzatbûr a ni tawh lâwm ni kha? Rûkhmang zîngahte a tel em ni? Ama chungchâng i sawi apiangin i lu i thing si a.

²⁸“Moab-a chêngte u, Khawpuite tlânsan ula, khâm kârah chêng rawh u, ṭhuro, pûk kotlânga bu khuar ṭhîn angin awm ru.

²⁹Moab chapona chu kan lo hre ta, a chapo nangei mai, A indahsânzia te, a chapozia te, a chaltlaizia te leh A thinlung induhzia te chu.

³⁰A thinurna chu eng mah a ni lo tih ka hria; A uanthuannate chuan eng mah a thawk kaw lo,” Tih hi LALPA thuchhuak a ni.

³¹Tichuan, Moab chungchângah ka chiau vak vak ang a, A ni, Moab pum pui tân ka ṭap ang; Kir-heres mite sûn an ni ang.

³²Jazer ṭah aia nasain ka ṭah ang che, Aw Sibma grêp kûng! I pêngte chu tuipui chungah an zâr duai a, Jazer tuipui pawh a thleng ta hial e. I nipui thei leh grêp rahte chu tichhetuin a bâwm e.

³³Hlimna leh lâwmna a bo zo ve, Thei hmun leh Moab ram ata; Uain sâwr khura ka uain ka tikin ta a, Tu mân hlima auvin an chîl tawh lo vang, Au thâwm chu hlim thâwm a ni tawh lo vang.

³⁴“Hesbon leh Eleale-ah an au va, Jahaz thleng thlengin aw an chhuah a, Zoar aṭanga Horonaim thleng, Eglath-selis thleng pawhin; Nimrim tuikhurte a ṭhing ṭhup ang.

³⁵Chu lovah pawh, Moab bâwlhmun thil hlântu leh a pathiante tâna rimtui hâltu chu ka tibo vang,” LALPA thuchhuak chuan a ti.

³⁶“Tichuan, phênglâwng angin ka thinlung chu Moab tân a ri a, Kir-heres mite tân thil tum rîk angin ka thinlung a ri a; chuvângin, hnianghnâra thil a dawn tawhte kha a rîral zo ta a.

³⁷“Lu tinrêng ziah kâwn a ni a, khabe hmul tinrêng meh a ni; kut zawng zawng zai a ni a, kâwngahte saiip puan a awm hlawm a.

³⁸Moab in chung zawng zawngah te, kawtthlêrah te, hmun tinah ṭahna a awm a; Moab chu bêl ṭangkai tawh lo angin ka tikeh zo ta a ni,” tih hi LALPA thuchhuak a ni.

³⁹“A va chhe tawh êm! An chiau nasatzia chu! Moab chu mualphovin a lehhawi tâk chu! Tichuan, Moab chu a vêla mite zawng zawng tân nuihzatbûr leh râpthlâk a lo ni ta.”

⁴⁰ LALPA chuan heti hian a ti a ni: “Ngai rawh, mu angin a thlâwk dâwn, Moab chungah a thla a zâr ang.

⁴¹Kerioth chu lâk a ni a, a kulhte chu an ṭhâwng thut a; Chumi nia Moab pasalṭhate thinlung chu, Hmeichhe nau vei thinlung ang mai a ni ang.

⁴²Moab a boral ang, hnam a tling tawh lo vang; LALPA a chungtlâk zâwk avângin.

⁴³Hlauhna, khuarkhurum leh thangte, Aw Moab luahtu, i chungah a thleng e,” Tih hi LALPA thuchhuak a ni.

⁴⁴“Hlauhna tlânsantu chu khuarkhurumah a tla ang, Khuarkhuruma chhuak chu thangah a âwk ang. A hremna kum ka rawn thlen dâwn si, A chungah, Moab chung ngeiah chuan,” Tih hi LALPA thuchhuak a ni.

⁴⁵“Hesbon hlimah tlânchheho chu chau dêrin an ding ang. Hesbon aṭangin mei a chhuak a, Sihon zîng aṭangin meialh, Moab bek sam a kâng zo va, Sa mur murho chhîp samte nên.

⁴⁶I chung a pik e, aw Moab! Kemos mite an ral ta; I fapate sala hruaiin, i fanute salah an tâng ta.

⁴⁷Mahse, ni hnuhnûngahte chuan Moab awm dân chu ka lamlêt ang,” Tih hi LALPA thuchhuak a ni. Heti chen hi Moab chung thu a ni e.