Read Mizo_Old_version Jeremia 49 Bible Online

Jeremia 49 - Mizo_Old_version bible

Jeremia 49

¹Amon fate thu. LALPA chuan heti hian a ti: “Israelan fate a nei lo vem ni? Rokhâwmtu a nei na nge? Engati nge Gad chu Milkoman a luah tâka, A mite a khawpuiahte an chên tâk?

²Chuvângin, ngai rawh u, nite a lo thleng e,” Tih hi LALPA thuchhuak a ni. “Indo thâwm ri ka hriattîr ang, Amon fate, Raba khuaah; Thil ram awm khâwm mai a lo ni ang a, A fanute chu meiin a kâng ang. Tichuan, Israel chuan amah neitu chu a nei thung ang,” LALPAN a ti.

³“Aw Hesbon, chiau vak vak la, Ai chu an rawk zo tawh si; Raba fate u, ṭap rawh u, Ṭap ula, hungna chhûngahte tlân vêl rawh u. Milkoma chu sala hruaiin a awm dâwn si, A puithiam leh a mi liante nên.

⁴Engah nge i ruam ṭhate i chhuan, aw rinawm lonu? A neih ṭha ṭhate ringa, ‘Tu nge mi bei ang?’ ti ṭhîntu,

⁵Ngai rawh, hlauhna i chungah ka rawn thlen dâwn, I vêla mi zawng zawng lak ata,” Tih hi Lalpa, sipaihote PATHIAN thuchhuak a ni: “Mi tin hnawh chhuah in ni vek ang; Tu mân tlânchheho chu an khâwm lo vang.

⁶Chumi hnuah erawh chuan Amon fate awm dân ka lamlêttîr ang,” tih hi LALPA thuchhuak a ni.

⁷Edom thu. Sipaihote LALPA chuan heti hian a ti: “Teman-ah finna a awm tawh na nge? Remhre remhriatna a bo zo ta em ni? An finna a bo zo vem ni?

⁸Aw Dedan-a chêngte u, tlânchhia ula, lehhawi ula, Pil bo daih rawh u! Esauva chhiatna a chungah ka rawn thlen dâwn e, Amah ka hrem hunah chuan.

⁹Grêp lotute chu i hnênah an lo kalin, hmaih an nei dâwn lâwm ni? Zâna rûkrute chuan duh tâwk an ngah hma chu An rawk zêl dâwn lo vem ni?

¹⁰Esauva chu ka tisaruak ta a; A khuh rûk ṭhinte chu ka hawng ta, A biru thei tawh lo vang. A thlahte tihchhiat an ni a, A unaute, a ṭhenawmte nên, A ral thûm ta.

¹¹I nau, pa nei lohote chu ngaihsak suh, Keiin ka hum ang, I hmeithaiten mi ring rawh se.”

¹² LALPA chuan heti hian a ti: “No in lo tûrte pawhin an in tlat chuan, nang hrem loh tawpin i chhuak dâwn em ni? Hrem lohvin i chhuak lo vang, i in mawlh ang.

¹³LALPA chuan mahni inchhâlin chhia ka chham ta si a, Bozra chu mak tih huai huai, sawichhiat, tihram, ânchhe dawng a ni ang a, a khua zawng zawng pawh a ram hlen ang.”

¹⁴ LALPA hnên ata thupuan ka lo hre ta, Hnamte hnênah tirhkoh tirh a ni: “Inpun khâwm ula, amah bei ula, Indo puahchah rawh u!

¹⁵Ngai rawh, hnamte zîngah ka titê ta si chia, Mihringte hmuhsitin.

¹⁶I intihrâpthlâkna kha i thinlung chapo bumna che a ni, Aw nang khâm lung kâra tlâng chhîpa chêng ṭhîn! Mu angin, sâng takah i bu chhep mah la, Chumi aṭang chuan ka la thla tho vang che,” Tih hi LALPA thuchhuak a ni.

¹⁷“Tin, Edom chu mak tih huai huai a lo ni ang a, mi veivâk apiangin mak an ti ang a, a chhiat nasat vâng chuan an chek khum ang.

¹⁸Sodom leh Gomorra leh a vêla khawpuite tihchhiata a awm ang bawkin, tu mah an chêng tawh lo vang a, mihring fa tu mah chutah chuan an awm ngai tawh lo vang,” LALPAN a ti.

¹⁹“Ngai rawh u, Jordan ramngaw aṭanga sakeibaknei, ran thlahna hmunah a lo chho vang a; a lak aṭangin anmahni ka tlân botîr nghâl ang a, a chunga thu nei tûrin ka duh apiang ka ruat ang. Keimah ang hi tu nge awm ni? Tuin nge hunbi mi thliahsak ang? Berâmpu tu nge ka hmaa ding tûr chu?”

²⁰Chu vâng chuan Edom chunga LALPA thurâwn leh Teman mite chunga a thil ruat, tih a tum tâkte chu ngaithla rawh u: ran rual notête ngei chu hnuh bovin an awm ang a; an chênna chu a tiṭiau vang.

²¹An tlûkchhiatna thâwmah chuan lei hi a khûr a; an ṭap thâwm chu Tuipui Senah pawh hriat a ni ang.

²²Ngai rawh u, mupui angin a lo thlâwk chho vang a, Bozra chungah chuan a thla a zâr ang; chumi ni chuan Edom mi huaisente thinlung pawh chu hmeichhe nau vei thinlung ang mai a ni ang.

²³Damaska thu. “Hamath chu a zak ta, Arpad nên, Thu ṭha lo an hre ta si a, an rîral ta; Tuipui fâwn awm hle hle thei lo angin an buai a.

²⁴Damaska a rawih zo ta; Tlânchhiat a tum a, khurhin a nang ta. Lungngaihna leh nâin a vuan ta, hmeichhe nau vei ang maiin.

²⁵Khawpui hmingthang leh hlim chu a va ṭhing ta êm!

²⁶Tichuan, chumi niah chuan a tlangvâl rualte chu kawtlaiah an tlu ang a, A râl tu mi zawng zawng an boral ang,” Tih hi sipaihote LALPA thuchhuak a ni.

²⁷“Tin, Damaska kulh bangah mei ka chhuah ang a, Benhadada lal inte chu a kâng zo vang.”

²⁸Kedar leh Hazor ramte Babulon lal Nebukadnezzaran a suasam thu. LALPA chuan heti hian a ti: “Tho ula, Kedar bei ula, khawchhak fate chu sawisa rawh u!

²⁹An puan inte, an ran rualte an lâksak ang. An puanzârte, an bungbêl zawng zawngte, An sanghâwngseite chu an kal bopui ang; ‘Kil tinah hlauhawm a awm!’ Tiin miten an au khum ang.

³⁰Tlânchhia ula, vâk bo daih rawh u! Pil bo daih rawh u, aw Hazor-a chêngte u,” Tih hi LALPA thuchhuak a ni. “Babulon lal Nebukadnezzara chuan A phiar che u, in chungah tih tum a nei ta e.

³¹Tho ula, thlamuang taka awm, Mahnia khawsa, kulh kawngkhâr pawh nei lo, Kalhna thîr tlâwn pawh nei lo hnam chu bei rawh u,” Tih hi LALPA thuchhuak a ni.

³²“An sanghâwngseite chu râlin an la ang a, An sebâwng rual nâwlpui chu an kawi ang; Baksam ziat kâwnghote chu kil tinah ka tidarh ang, An chhiatna tûr chu kil tin aṭangin ka rawn thlen ang,” Tih hi LALPA thuchhuak a ni.

³³“Tin, Hazor chu sihal chên hmun a ni ang a, A ram kumkhua ang; Tah chuan tu mah an chêng tawh lo vang a, Mihring fate rêng rêng an khawsa tawh lo vang.”

³⁴Juda lal Zedekia lal ṭan tirha Elam chungchânga LALPA thu, zâwlnei Jeremia hnêna lo thleng chu:

³⁵“Sipaihote LALPA chuan heti hian a ti: ‘Ngai rawh u, Elam thal ngul, an chakna bul ber chu, Ka titliak ang;

³⁶Kâwlkil li ata thli palite ka rawn thlen ang, Elam chungah chuan; Ka tidarh ang, kâwlkil tinah chuan; Elam hnawh chhuah mite thlen lohna hnam rêng a awm lo vang.

³⁷An hmêlma, an nun zawngtute hmaah chuan, Elam-ho chu ka tizâm zo vang. An chungah chhiatna ka rawn thlen ang, Ka thinur nasa tak mai chu,’ Tih hi LALPA thuchhuak a ni. ‘Anmahni chu khandaih ka ûmtîr ang, Ka tihral vek hma loh chu.

³⁸An lalte leh an hotute tiralin, Elam-ah chuan ka lalṭhutthlêng ka hûng ang,’ Tih hi LALPA thuchhuak a ni.

³⁹‘Mahse, ni hnuhnûngahte chuan heti hi a ni ang, Elam awm dân ka lamlêttîr ang,’ Tih hi LALPA thuchhuak a ni e.”